洪玛奈澄清政府预算分配 教育医疗预算将持续增长

សម្តេច ហ៊ុន ម៉ាណែត៖ គ្មានការកាត់ចំណាយពីវិស័យអប់រំ និងសុខាភិបាល ទៅបង្កើនចំណាយវិស័យការពារជាតិឡើយ រដ្ឋ នឹងមិនកាត់ចំណាយក្នុងវិស័យអប់រំ និងវិស័យសុខាភិបាល ឡើយ ទោះបីជាចំណាយវិស័យការពារជាតិ នឹងកើនឡើងក៏ដោយ។ ផ្ទុយទៅវិញ គម្រោងចំណាយលើវិស័យចម្បងទាំងពីរ រួមទាំងវិស័យសង្គមកិច្ច នឹងបន្តកើនឡើង សម្រាប់ឆ្នាំ ២០២៧ ដល់ឆ្នាំ២០២៩បន្ថែមទៀត។ សម្តេច ហ៊ុន ម៉ាណែត ពន្យល់ដូច្នេះក្រោយមានការផ្សព្វផ្សាយដោយយល់ច្រឡំពីបណ្តាញសារព័ត៌មាន។ នៅក្នុងពិធីសម្ពោធអគារ និងសមិទ្ធផលនានា និងប្រគល់សញ្ញាបត្រគ្រូបង្រៀន គរុសិស្ស -និស្សិត នៃវិទ្យាស្ថានជាតិអប់រំកាយនិងកីឡា នៅ ថ្ងៃទី៣ ខែមិថុនានេះ ប្រមុខរាជរដ្ឋាភិបាល បានសង្កត់ធ្ងន់ដូច្នេះ៖ «អត់មានកាត់បន្ថយ ដកលុយពីអប់រំ និងសុខាភិបាល យកទៅបង្កើនឱ្យកងទ័ពនោះទេ។ កងទ័ព, វិស័យការពារជាតិ រដ្ឋាភិបាល មានថវិកាគ្រប់គ្រាន់សម្រាប់បង្កើននៅវិស័យដែលសំខាន់ រួមទាំងវិស័យការពារជាតិ សន្តិសុខជាតិ វិស័យអប់រំ ព្រមទាំងសុខាភិបាល គឺសង្គមកិច្ចនេះឯង។»។