旅游部与农业部签署绿色腰带协议 推动本地农产品供应

[English Below] ពីចម្ការកសិករ ទៅកាន់តុអាហារទេសចរ៖ កម្ពុជាពង្រឹងយុទ្ធសាស្ត្រកាត់បន្ថយការនាំចូលបន្លែ ត្រី សាច់ និងអាហារពីបរទេស និងពង្រឹងខ្សែច្រវាក់ផលិតកម្មក្នុងស្រុក តាម​រយៈ​ការ​រួមគ្នាជំរុញ "ខ្សែក្រវាត់បៃតង" នៅតាមតំបន់ទេសចរណ៍។​   ក្រសួងទេសចរណ៍ និង ក្រសួងកសិកម្ម រុក្ខាប្រមាញ់ និងនេសាទ បានរួមគ្នារៀបចំពិធីចុះហត្ថលេខាលើអនុស្សរណៈនៃការយោគយល់គ្នា (MoU) ស្តីពី «កិច្ចសហប្រតិបត្តិការជំរុញខ្សែក្រវាត់បៃតងនៅតំបន់ទេសចរណ៍ និងពង្រឹងប្រសិទ្ធភាពខ្សែច្រវាក់ផលិតកម្មកសិកម្ម»។ ពិធីនេះបានប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ និង ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដោយមានការអញ្ជើញចូលរួមពី ឯកឧត្តម ប្រាក់ សោភ័ណ អភិបាលនៃគណៈអភិបាលខេត្តសៀមរាប ព្រមទាំងថ្នាក់ដឹកនាំ និងមន្ត្រីរាជការនៃក្រសួងទាំងពីរ សរុប​ប្រមាណ​៦០​រូប។ កិច្ចសហប្រតិបត្តិការរវាងក្រសួងទាំងពីរនេះ ធ្វើឡើងស្របតាមស្មារតី និងអនុសាសន៍ណែនាំនៃវេទិការាជរដ្ឋាភិបាល-ផ្នែកឯកជន លើកទី១៩ ក្នុងគោលបំណងផ្តោតលើការកាត់បន្ថយ «ការលេចធ្លាយសេដ្ឋកិច្ច (Economic Leakage)» ក្នុងវិស័យទេសចរណ៍។ អនុស្សរណៈនៃការយោគយល់គ្នានេះ បានកំណត់នូវគោលបំណងយុទ្ធសាស្ត្រសំខាន់ៗចំនួន ៤ រួមមាន៖ ១. បង្កើនប្រសិទ្ធភាពកិច្ចសហប្រតិបត្តិការ រវាងក្រសួងទាំងពីរ ក្នុងការអនុវត្តវិធានការរាជរដ្ឋាភិបាល ដើម្បីបង្កើតខ្សែក្រវាត់បៃតង និងពង្រឹងខ្សែច្រវាក់ផលិតកម្មកសិកម្ម ២. ផ្លាស់ប្តូរព័ត៌មានតម្រូវការ និងការផ្គត់ផ្គង់ រវាងប្រជាកសិករ/សហគមន៍កសិកម្ម និងប្រតិបត្តិករ ឬអាជីវកម្មទេសចរណ៍ ឱ្យបានទាន់ពេលវេលា និងមានប្រសិទ្ធភាព ៣. រៀបចំផែនការសកម្មភាពជាក់ស្តែង ដើម្បីជំរុញការប្រើប្រាស់ផលិតផលកសិកម្មក្នុងស្រុក នៅតាមមូលដ្ឋានអាជីវកម្មទេសចរណ៍ឱ្យអស់លទ្ធភាព និង​៤. ជំរុញការអភិវឌ្ឍតំបន់កសិ-ទេសចរណ៍ និងអេកូទេសចរណ៍ នៅក្នុងដែនសមត្ថកិច្ចគ្រប់គ្រងរបស់ក្រសួងកសិកម្ម។ ក្នុងឱកាសនៃ​ការ​ចុះ​អនុស្សារណៈនៃ​ការ​យោគយល់​នេះ​ ឯកឧត្តម ហួត ហាក់ បានគូសបញ្ជាក់ថាវិស័យទេសចរណ៍ និងកសិកម្ម គឺជាសសរស្តម្ភសេដ្ឋកិច្ចដ៏សំខាន់ដែលបំពេញបន្ថែមឱ្យគ្នាទៅវិញទៅមក។ ការអភិវឌ្ឍកសិកម្មក្នុងស្រុក មិនត្រឹមតែជួយបង្កើតប្រាក់ចំណូល និងលើកកម្ពស់ជីវភាពប្រជាកសិករនៅមូលដ្ឋានប៉ុណ្ណោះទេ ប៉ុន្តែថែមទាំងជាមូលដ្ឋានគ្រឹះក្នុងការផ្គត់ផ្គង់ចំណីអាហារមានសុវត្ថិភាព និងលើកស្ទួយអត្តសញ្ញាណម្ហូបអាហារខ្មែរជូនដល់ភ្ញៀវទេសចរទៀតផង។ ជាការបំពេញបន្ថែមឱ្យគ្នាទៅវិញទៅមក កំណើនភ្ញៀវទេសចរ គឺជាកាតាលីករជួយបង្កើតទីផ្សារដ៏ធំទូលាយសម្រាប់កសិករ និងសហគមន៍។ សួនអាស៊ាន-កូរ៉េ (សួនក្រញ៉ូង), ថ្ងៃ​ទី​១ ខែ​សីហា ឆ្នាំ​២០២៦