柬中社区发展协会向陆军防空司令部捐赠物资 支援前线部队

រាជធានីភ្នំពេញ÷ថ្ងៃសៅរ៍ ទី២៣ ខែឧសភា ឆ្នាំ២០២៦ នៅទីបញ្ជាការដ្ឋានការពារអាកាសកងទ័ពជើងគោក ឯកឧត្តម ឧត្តមសេនីយ៍ទោ សុខ ប៉ាង នាយសេនាធិការរងកងទ័ពជើងគោក មេបញ្ជាការ បញ្ជាការដ្ឋានការពារអាកាស និងសហការីបានទទួលអំណោយពី ឯកឧត្តម បណ្ឌិត អុី សុវណ្ណារ៉ា ប្រធានក្រុមប្រឹក្សាភិបាលសមាគមសហគមន៍អភិវឌ្ឍន៍កម្ពុជា-ចិន និងសហការី ដែលបានឧបត្ថម្ភអង្ករចំនួន១៥០បេ ស្មើហ្នឹង១,៥០០គីឡូក្រាម និងទឹកបរិសុទ្ធប្រូវីដាចំនួន២៤០កេស ជូនបញ្ជាការដ្ឋានការពារអាកាសកងទ័ពជើងគោក ដើម្បីជួយផ្គត់ផ្គង់វីរ:កងទ័ពជួរមុខដែលកំពុងបំពេញបេសកកម្មនៅសមរភូមិមុខ ប្រើប្រាស់តាមតម្រូវការជាក់ស្តែង។ ឯកឧត្តម ឧត្តមសេនីយ៍ទោ សុខ ប៉ាង នាយសេនាធិការរងកងទ័ពជើងគោក មេបញ្ជាការ បញ្ជាការដ្ឋានការពារអាកាស បានថ្លែងអំណរគុណយ៉ាងជ្រាលជ្រៅបំផុតចំពោះ ឯកឧត្តម បណ្ឌិត អុី សុវណ្ណារ៉ា និងសហការី ដែលបានបរិច្ចាគឧបត្ថម្ភជាស្បៀង និងទឹកបរិសុទ្ធ ជូនអង្គភាពនាពេលនេះ ថាពិតជាបានជួយទ្រទ្រង់ដល់ខឿនការពារជាតិពិតប្រាកដមែន ទាំងនេះបង្ហាញអំពីការសាមគ្គីឯកភាពជាតិជាធ្លុងមួយ ដើម្បីបុព្វហេតុការពារបូរណភាពទឹកដី រួមចំណែកជាមួយរាជរដ្ឋាភិបាល ដោះស្រាយរាល់ទុក្ខលំបាកវីរ:កងទ័ពជួរមុខ ដែលបច្ចុប្បន្នកងកម្លាំងយើងបាននឹងកំពុងបំពេញបេសកកម្មត្រៀមប្រយុទ្ធការពារជាតិយ៉ាងអង់អាចក្លាហានទប់ទល់នឹងសត្រូវឈ្លានពាន។ ឯកឧត្តម ឧត្តមសេនីយ៍ទោ សុខ ប៉ាង នាយសេនាធិការរងកងទ័ពជើងគោក មេបញ្ជាការ បញ្ជាការដ្ឋានការពារអាកាស បានប្រគល់លិខិតថ្លែងអំណរគុណ ទុកជាការដឹងគុណក្នុងការរួមចំណែកជួយទ្រទ្រង់ខឿនការពារជាតិមាតុភូមិយើង ឯកឧត្តមបានបួងសួងដល់គុណតេជះបារមីវត្ថុសាកសិទ្ធក្នុងលោក តាមជួយឃុំគ្រងថែរក្សាការពារវីរៈកងទ័ពយើងនៅគ្រប់សមរភូមិជួរមុខ និងឯកឧត្តមបណ្ឌិត អស់លោក លោកស្រីទាំងអស់ ដែលជាម្ចាស់ទានក្នុងពេលនេះ សូមឲ្យមានសុខភាពល្អបរិបូរណ៍ឈ្នះអស់មាសត្រូវគ្រប់ទិសទី និងប្រកបរបរទទួលទានមានបាន ជោគជ័យគ្រប់ភារកិច្ច៕