金边胜利大道强降雨积水 市政府紧急抽水恢复通行

**ភ្លៀងធ្លាក់ខ្លាំងធ្វើឱ្យលិចកំណាត់មហាវិថីឈ្នះឈ្នះ! អាជ្ញាធររាជធានីភ្នំពេញ និងមន្ទីរជំនាញ ចុះអន្តរាគមន៍បូមទឹកនិងសម្អាតសំរាម បើកឱ្យចរាចរណ៍ធម្មតាវិញជាបណ្តើរៗ** ​**ភ្នំពេញ៖** ដោយសារស្ថានភាពអាកាសធាតុមានភ្លៀងធ្លាក់យ៉ាងខ្លាំងជាប់ៗគ្នា បណ្តាលឱ្យមានការលិចលង់លើកំណាត់មហាវិថីឈ្នះឈ្នះ រដ្ឋបាលរាជធានីភ្នំពេញ សហការជាមួយរដ្ឋបាលខណ្ឌជ្រោយចង្វារ និងមន្ទីរសាធារណការ និងដឹកជញ្ជូនរាជធានីភ្នំពេញ បានបញ្ចេញកម្លាំងសហការចុះអន្តរាគមន៍យ៉ាងសកម្មភ្លាមៗ។ ​ក្នុងប្រតិបត្តិការសង្គ្រោះបន្ទាន់នេះ ក្រុមការងារបានប្រើប្រាស់មធ្យោបាយសរុប រួមមាន រថយន្តបូមលូ រថយន្តបូមទឹកចល័ត គ្រឿងចក្រកាយប្រឡាយ និងកម្លាំងអន្តរាគមន៍ផ្ទាល់ដើម្បីប្រមូលសំរាមដែលមករាំងស្ទះមាត់លូ ដែលកិច្ចខិតខំប្រឹងប្រែងនេះសម្រេចបានលទ្ធផលល្អប្រសើរយ៉ាងខ្លាំង។ ​គិតត្រឹមម៉ោង ១៨:២០នាទី ស្ថានភាពទឹកបានស្រកចុះប្រមាណ ៨០% ហើយ និងរំពឹងថានឹងស្រកស្ងួតទាំងស្រុងក្នុងរយៈពេលដ៏ខ្លីខាងមុខនេះ ដែលបង្កើតលក្ខខណ្ឌអំណោយផលឱ្យយានយន្តគ្រប់ប្រភេទអាចធ្វើចរាចរណ៍បានជាធម្មតាឡើងវិញប្រកបដោយសុវត្ថិភាព។ ​ជាការពិតណាស់ បញ្ហាកាកសំណល់សំរាមដែលបាំងមាត់លូពេលមានភ្លៀងធ្លាក់ខ្លាំង គឺជាកត្តាមួយធ្វើឱ្យទឹកហូរមិនបានទាន់ពេល។ អាស្រ័យហេតុនេះ អាជ្ញាធរមានសមត្ថកិច្ចសូមសំណូមពរដល់ប្រជាពលរដ្ឋទាំងអស់ មេត្តាចូលរួមថែរក្សាបរិស្ថាន ដោយមិនត្រូវបោះចោលសំរាមពាសវាលពាសកាលចូលក្នុងប្រព័ន្ធលូ ឬប្រឡាយទឹកសាធារណៈ ដើម្បីរួមគ្នាការពារបញ្ហាទឹកជំនន់ទឹកភ្លៀង និងរក្សាបាននូវសោភ័ណភាព ក៏ដូចជារបៀបរៀបរយក្នុងរាជធានីភ្នំពេញយើងទាំងអស់គ្នា។