柬埔寨教育部启动2026学年合同制教师招聘 线上选拔

**ឯកឧត្តម ពេជ្រ វិជ្ជាគន្ធី លម្អិតពីសាវតា និងតម្លាភាពនៃការប្រឡងប្រជែងជ្រើសរើសគ្រូបង្រៀនផ្អែកលើកិច្ចព្រមព្រៀងការងារ** នៅក្នុង «វេទិកាព័ត៌មាន សម្រាប់ការប្រឡងប្រជែងជ្រើសរើសគ្រូបង្រៀនផ្អែកលើកិច្ចព្រមព្រៀងការងារ ឆ្នាំសិក្សា២០២៦-២០២៧» នាព្រឹកថ្ងៃទី២៥ ខែកញ្ញា ឆ្នាំ២០២៦ ឯកឧត្តម ពេជ្រ វិជ្ជាគន្ធី អគ្គនាយកនៃអគ្គនាយកដ្ឋានគ្រប់គ្រងមុខងារសាធារណៈ នៃក្រសួងមុខងារសាធារណៈ បានពន្យល់ពីសាវតា និងមូលហេតុចម្បងនៃការជ្រើសរើសគ្រូកិច្ចព្រមព្រៀងការងារ គឺធ្វើឡើងដើម្បីបំពេញបន្ថែមនៅតាមបណ្តាសាលារៀនដែលកំពុងជួបប្រទះការខ្វះខាតគ្រូបង្រៀនជាក់ស្តែង។ ឯកឧត្តមបានបញ្ជាក់ថា គ្រូកិច្ចព្រមព្រៀងការងារ នឹងទទួលបានអត្ថប្រយោជន៍ និងរបបផ្សេងៗដូចគ្នាទៅនឹងគ្រូក្របខ័ណ្ឌដែរ ដោយកំណត់ស្តង់ដារគុណវុឌ្ឍិខ្ពស់ គឺត្រូវមានកម្រិតវប្បធម៌ចាប់ពីបរិញ្ញាបត្រឡើងទៅ។ វិជ្ជាជីវៈគ្រូបង្រៀន គឺជាវិជ្ជាជីវៈដែលមានតម្លៃខ្ពស់ ដូចនេះបេក្ខជនត្រូវមានសុជីវធម៌ និងឥរិយាបថល្អ ព្រោះការសម្រេចចិត្តដាក់ពាក្យប្រឡងប្រជែងនៅពេលនេះ គឺជាជំហានដំបូង និងជាការចាប់ផ្តើមអាជីពដ៏ឧត្តុង្គឧត្តមក្នុងការក្លាយខ្លួនជាមន្ត្រីរាជការបម្រើជាតិ។ ទន្ទឹមនឹងនេះ ឯកឧត្តមបានលាតត្រដាងយ៉ាងលម្អិតអំពីលំហូរដំណើរការនៃការរៀបចំការប្រឡងប្រជែងទាំងមូល ដោយចាប់ផ្តើមតាំងពីការចេញសេចក្តីជូនដំណឹង និងការទទួលពាក្យតាមប្រព័ន្ធអនឡាញ ការផ្ទៀងផ្ទាត់ និងប្រកាសបញ្ជីឈ្មោះបេក្ខជនដែលមានសិទ្ធិប្រឡង ការរៀបចំសម័យប្រឡងប្រកបដោយសណ្តាប់ធ្នាប់ ការកែវិញ្ញាសា និងបូកសរុការពិន្ទុតាមប្រព័ន្ធបច្ចេកវិទ្យាទំនើបដើម្បីធានាបាននូវភាពត្រឹមត្រូវ រហូតដល់ការប្រកាសលទ្ធផលផ្លូវការ។ សូមរំលឹកពីសមិទ្ធផលការងារកន្លងមក ក្រសួងមុខងារសាធារណៈ បានសហការជាមួយក្រសួង-ស្ថាប័ន ចំនួន១៥ រៀបចំការប្រឡងបានចំនួន ២៨ដង ស្មើនឹង ៦១លើក ដើម្បីជ្រើសរើសមន្រ្តីចំនួន ៨,០៨៨នាក់ ក្នុងចំណោមបេក្ខជនចូលរួមដាក់ពាក្យតាមប្រព័ន្ធអនឡាញជាង ៣០ម៉ឺននាក់។ ក្នុងនោះមន្ត្រីផ្អែកលើកិច្ចព្រមព្រៀងសរុបចំនួន ៣,៣៦៤នាក់ (អប់រំចំនួន ៣,០២៣នាក់, សុខាភិបាលចំនួន ៣,៤១នាក់ និងក្រសួងផែនការចំនួន ១៦នាក់)។