公共工程与运输部将于8月12日启动官员普查

យុទ្ធនាការធ្វើជំរឿនមន្រ្តីនៅតាមរចនាសម្ព័ន្ធក្រសួងសាធារណការ និងដឹកជញ្ជូន នឹងចាប់ផ្តើមនាថ្ងៃស្អែកនេះ ដើម្បីធានាបាននូវប្រសិទ្ធភាព និងដំណើរការដោយរលូន ក្រុមការងារចុះធ្វើជំរឿនមន្រ្តីនៃគណៈកម្មការជំរឿន និងក្រុមការងារទទួលបន្ទុកធ្វើជំរឿនមន្រ្តីនៃក្រសួងសាធារណការ និងដឹកជញ្ជូន បានជួបប្រជុំពិភាក្សាស្ដីពីការត្រៀមលក្ខណៈក្នុងការធ្វើបច្ចុប្បន្នភាពរចនាសម្ព័ន្ធ និងជំរឿនមន្រ្តីជាក់ស្ដែង នៅតាមរចនាសម្ព័ន្ធក្រសួងសាធារណការ និងដឹកជញ្ជូន។ កិច្ចប្រជុំប្រព្រឹត្តទៅនាថ្ងៃទី១០ ខែសីហា ឆ្នាំ២០២៦ នៅទីស្តីការក្រសួងសាធារណការ និងដឹកជញ្ជូន ដឹកនាំដោយសហប្រធាន ឯកឧត្តម ស៊ុយ សាន រដ្ឋលេខាធិការក្រសួងសាធារណការ និងដឹកជញ្ជូន និង ឯកឧត្តម យឿន សម្បត្តិ អនុរដ្ឋលេខាធិការក្រសួងមុខងារសាធារណៈ។ កិច្ចប្រជុំនេះ ជាការពិនិត្យវឌ្ឍនភាព និងពិភាក្សាផ្ទៀងផ្ទាត់ទិន្នន័យចុងក្រោយ ក៏ដូចជារៀបចំក្រុមការងារទទួលបន្ទុកតាមផ្នែកឱ្យបានច្បាស់លាស់ និងការកំណត់រៀបចំទីតាំងធ្វើជីវមាត្រទិន្នន័យមន្រ្តីផ្ទាល់ឱ្យបានរៀបរយ ដើម្បីធានាដល់ថ្ងៃដំណើរការធ្វើជំរឿនមន្រ្តីជាក់ស្តែងប្រកបដោយ គុណភាព ប្រសិទ្ធភាព និងរលូន។ សូមជម្រាបថា យុទ្ធនាការធ្វើបច្ចុប្បន្នភាពរចនាសម្ព័ន្ធ និងជំរឿនមន្រ្តីជាក់ស្ដែង នៅតាមរចនាសម្ព័ន្ធក្រសួងសាធារណការ និងដឹកជញ្ជូន នឹងប្រព្រឹត្តទៅមានរយៈពេល ៣ថ្ងៃ ចាប់ពីថ្ងៃទី១២ ដល់ថ្ងៃទី ១៤ ខែសីហា ឆ្នាំ២០២៦ នៅទីស្តីការក្រសួងសាធារណការ និងដឹកជញ្ជូន។