洪玛奈出席亚洲欧亚大学毕业典礼 强调教育医疗预算不减

ឯកឧត្តម ឯម ច័ន្ទមករា អញ្ជើញចូលរួមពិធីប្រគល់សញ្ញាបត្រដល់និស្សិតសាកលវិទ្យាល័យអាស៊ីអឺរ៉ុប =================== (ភ្នំពេញ)៖ នៅព្រឹកថ្ងៃសុក្រ ថ្ងៃទី២ ខែតុលា ឆ្នាំ២០២៦នេះ ឯកឧត្តម ឯម ច័ន្ទមករា រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ បានអញ្ជើញចូលរួមក្នុងពិធីប្រគល់សញ្ញាបត្រដល់និស្សិតសាកលវិទ្យាល័យអាស៊ីអឺរ៉ុប ចំនួន ២ ៥៧៣អង្គ/នាក់ ក្រោមអធិបតីភាពដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នា មជ្ឈមណ្ឌលសន្និបាត និងពិព័រណ៍កោះពេជ្រ។ នាឱកាសនោះ សម្តេចធិបតី ហ៊ុន ម៉ាណែត មានប្រសាសន៍ថា រាជរដ្ឋាភិបាលមានគោលដៅពង្រឹងមូលដ្ឋានគ្រឹះអប់រំក្នុងសង្គមជាតិ ដោយបង្កលក្ខណៈងាយស្រួលដល់យុវជន និងយុវនារីកម្ពុជា ក្នុងការចូលរួមយ៉ាងសកម្ម និងស្មើសិទ្ធិក្នុងសកម្មភាពសង្គម និងសេដ្ឋកិច្ច ដោយឈរលើមូលដ្ឋាននៃសមត្ថភាព ទេពកោសល្យ និងសីលធម៌វិជ្ជាជីវៈ។ សម្តេចធិបតី បានគូសបញ្ជាក់ថា រាជរដ្ឋាភិបាលបាន និងកំពុងវិនិយោគអាទិភាពលើ «មូលធនមនុស្ស» ដែលជាកម្លាំងចលករយ៉ាងសំខាន់សម្រាប់បង្កើតតម្លៃសេដ្ឋកិច្ច និងអភិវឌ្ឍសង្គមជាតិ តាមរយៈការផ្គួបផ្សំរវាងចំណេះ ជំនាញ បច្ចេកទេសវិជ្ជាជីវៈ បទពិសោធ បំណិនជីវិត ភាពឈ្លាសវៃ និងសុខភាព រួមជាមួយគុណតម្លៃខាងសីលធម៌ គុណធម៌ សុជីវធម៌ មនសិការ អំណត់ និងភាពស្មោះត្រង់, ស្របតាមទិសស្លោក «យុវជនមានទាំងសមត្ថភាព សីលធម៌វិជ្ជាជីវៈ និងវិន័យ, ប្រទេសជាតិមានអនាគត»។ ជាមួយគ្នានេះដែរ សម្តេចធិបតី ហ៊ុន ម៉ាណែត បានថ្លែងបន្ថែមថា ថវិកាជាតិឆ្នាំ២០២៧ ក្នុងវិស័យអប់រំ មានការកើនឡើងប្រមាណ ៤,៧ភាគរយ បើធៀបនឹងឆ្នាំ២០២៦ ចំណែកឯវិស័យសុខាភិបាលកើនឡើង ១,៥ភាគរយ។ សម្តេចធិបតី បានបញ្ជាក់យ៉ាងច្បាស់ថា ទោះបីជាថវិកាឆ្នាំ២០២៧ មានការបង្កើនលើវិស័យការពារជាតិយ៉ាងណាក្តី ក៏រាជរដ្ឋាភិបាលមិនបានកាត់បន្ថយថវិកាសម្រាប់វិស័យអប់រំ និងវិស័យសុខាភិបាលនោះឡើយ៕