柬埔寨生殖医学协会举办年度会议 聚焦生殖健康

សន្និសីទប្រចាំឆ្នាំលើកទី២ របស់សមាគមគ្រូពេទ្យបង្កកំណើតកម្ពុជា ក្រោមប្រធានបទ៖ "រួមគ្នាដើម្បីលើកកម្ពស់សុខភាពបន្តពូជប្រកបដោយក្រមសីលធម៌វិជ្ជាជីវៈ"។ —— រាជធានីភ្នំពេញ៖ ព្រឹកថ្ងៃទី១៥ ខែសីហា ឆ្នាំ២០២៦ ឯកឧត្តមសាស្ត្រាចារ្យ យីត ស៊ុនណារ៉ា រដ្ឋលេខាធិការក្រសួងសុខាភិបាល បានអញ្ជើញជាអធិបតីក្នុងពិធីបើក សន្និសីទប្រចាំឆ្នាំលើកទី២ របស់សមាគមគ្រូពេទ្យបង្កកំណើតកម្ពុជា ក្រោមប្រធានបទ៖ "រួមគ្នាដើម្បីលើកកម្ពស់សុខភាពបន្តពូជប្រកបដោយក្រមសីលធម៌វិជ្ជាជីវៈ"។ សន្និសីទលើកទី២នេះ មានគោលបំណងក្នុងការពង្រឹង និងបង្កើតចំណេះដឹងវិជ្ជាជីវៈបន្ថែម ជូនដល់គ្រូពេទ្យគ្រប់រូបឱ្យកាន់តែមានសមត្ថភាពខ្ពស់ ក្នុងការផ្តល់សេវាថែទាំព្យាបាលស្ត្រីលំបាកមានកូន ប្រកបដោយគុណភាព សុវត្ថិភាព ប្រសិទ្ធភាព ក្រមសីលធម៌វិជ្ជាជីវៈ និងគោរពឱ្យបាននូវច្បាប់លិខិតបទដ្ឋានគតិយុត្ត។ សន្និសីទថ្ងៃនេះ បានដើរតួជាវេទិកាដ៏សំខាន់ សម្រាប់អ្នកឯកទេសទាំងក្នុង និងក្រៅប្រទេស ដើម្បីផ្លាស់ប្តូរបទពិសោធន៍ ពង្រឹងសមត្ថភាពវិជ្ជាជីវៈឱ្យទាន់តាមស្ថានភាពរីកចំរើន នៃវិទ្យាសាស្ត្រ។ មុននឹងបញ្ចប់ ឯកឧត្តមសាស្ត្រាចារ្យរដ្ឋលេខាធិការ បានផ្តល់នូវអនុសាសន៍ជូនដល់អង្គសន្និសីទ មានដូចខាងក្រោម៖ ១.បន្តរៀបចំនូវសន្និសីទប្រចាំឆ្នាំរបស់ខ្លួន ឱ្យបានខ្ជាប់ខ្ជួន យកចិត្តទុកដាក់ក្នុងការបណ្តុះ​បណ្តាលវិជ្ជាជីវៈបន្ត ឱ្យបានទូលំទូលាយ ២.រាល់ការបណ្តុះបណ្តាលវិជ្ជាជីវៈ ឬសន្និសីទនានាពាក់ព័ន្ធ ត្រូវមានការផ្សព្វផ្សាយ ឱ្យប្រកាន់ខ្ជាប់នូវច្បាប់លិខិតបទដ្ឋានគតិយុត្តពាក់ព័ន្ធ និងក្រមសីលធម៌ក្នុងវិជ្ជាជីវៈជាប់ជាប្រចាំ ជាមួយនឹងការបំប៉នចំណេះដឹងដើម្បីពង្រឹងនូវសមត្ថភាពគ្រូពេទ្យជាប្រចាំ ៣.ការអនុវត្តវិជ្ជាជីវៈត្រូវអនុលោមឱ្យបានខ្ជាប់ខ្ជួន តាមគោលការណ៍ក្រសួងសុខាភិបាល និងច្បាប់លិខិតបទដ្ឋានគតិយុត្តនានា របស់ជាតិជានិច្ច ប្រកបដោយវិជ្ជាជីវៈ គុណធម៌ខ្ពស់ គោរពក្រមសីលធម៌វិជ្ជាជីវៈ។ សូមបញ្ជាក់ផងដែរថា សន្និសីទនេះមានការអញ្ជើញចូលរួមដោយ ឯកឧត្តម លោកជំទាវ សាស្ត្រាចារ្យ ថ្នាក់ដឹកនាំក្រសួងសុខាភិបាល មន្ទីរពេទ្យជាតិ គ្រូពេទ្យ មន្ត្រីសុខាភិបាល និងបុគ្គលិកវេជ្ជសាស្រ្ត ដែលជាសមាជិក សមាជិកា របស់សមាគមគ្រូពេទ្យបង្កកំណើតកម្ពុជា និងភ្ញៀវជាតិ អន្តរជាតិ សរុបចំនួន ១៥០នាក់។ **🌐**[Website](https://moh.gov.kh/kh/home) 📱[Facebook](https://www.facebook.com/MinistryofHealthofCambodia?mibextid=ZbWKwL) 📱[Telegram](https://t.me/MOHCambodia) 📱[X (twitter)](https://x.com/MohCambodia) 📱[Tiktok](https://www.tiktok.com/@mohcambodia) 📱[YouTube](https://www.youtube.com/@MOHCambodia)