柬埔寨总理特使会见美方代表商讨边境与投资

ប្រេសិតនាយករដ្ឋមន្ត្រី ពិភាក្សាការងារជាមួយតំណាងអាមេរិកពីស្ថានការណ៍ព្រំដែនកម្ពុជា-ថៃ កិច្ចព្រមព្រៀងសន្តិភាព និងការវិនិយោគ លោកស្រី កឹម មនោវិទ្យា ប្រេសិតពិសេសរបស់នាយករដ្ឋមន្ត្រីកម្ពុជា បានជួបពិភាក្សាការងារជាមួយភារធារីនៃស្ថានទូតសហរដ្ឋអាមេរិកប្រចាំកម្ពុជា លោកស្រី Aleks Zittle អំពីតួនាទីថ្មីជាប្រេសិតពិសេស លើការងារដោះស្រាយបញ្ហាព្រំដែនកម្ពុជា-ថៃ និងការវិនិយោគ។ នេះបើតាមសំណេរលើទំព័រហ្វេសប៊ុករបស់ស្ថានទូតអាមេរិកប្រចាំនៅកម្ពុជា ផ្សាយនាល្ងាចថ្ងៃទី៣ ខែកញ្ញា នេះ។ បើតាមស្ថានទូតអាមេរិក អ្នកទាំងពីរ ក៏ពិភាក្សាអំពីតួនាទីរបស់ប្រធានាធិបតី ត្រាំ ក្នុងការធានាបទឈប់បាញ់។ភារធារីស្ថានទូតអាមេរិក ក៏បានបញ្ជាក់ជាថ្មីអំពីការប្តេជ្ញាចិត្តរបស់សហរដ្ឋអាមេរិកចំពោះការអនុវត្តនៃកិច្ចព្រមព្រៀងសន្តិភាពគូឡាឡាំពួ។ គួរកត់សម្គាល់ថា នេះគឺជាលើកទី ៣ ហើយ ដែលលោកស្រីកឹម មនោវិទ្យា ក្នុងឋានៈជាប្រេសិតពិសេសរបស់នាយករដ្ឋមន្ត្រីកម្ពុជា បានទទួលជួបពិភាក្សាជាមួយអង្គទូតបរទេស ស្របពេលដែលជំនួបលើកទីមួយគឺលោកស្រី បានជួបជាមួយឯកអគ្គរដ្ឋទូតសហភាពអឺរ៉ុប Igor Driesmans និងលើកទី២ ជួបជាមួយឯកអគ្គរាជទូតអង់គ្លេសប្រចាំកម្ពុជា លោក Dominic។ គ្រប់ជំនួបផ្ដោតលើបញ្ហាព្រំដែននិងការវិនិយោគ៕