司法部长出席皇家司法学院院长父亲葬礼

ឯកឧត្តមឧបនាយករដ្ឋមន្ត្រី កើត រិទ្ធ អញ្ជើញចូលរួមរំលែកមរណទុក្ខ និងគោរពវិញ្ញាណក្ខន្ធឧបាសក ហេង ហុង ដែលត្រូវជាឪពុកបង្កើតរបស់ឯកឧត្តម ហេង សុខណា នាយកសាលាភូមិន្ទចៅក្រម និងព្រះរាជអាជ្ញា ===================== នារសៀលថ្ងៃអង្គារ ១២កើត ខែស្រាពណ៍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២៥ ខែសីហា ឆ្នាំ២០២៦, ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាប្រធានក្រុមប្រឹក្សាភិបាលនៃបណ្ឌិត្យសភាភូមិន្ទយុត្តិធម៌កម្ពុជា (ប.ភ.យ.ក.) អមដំណើរដោយសមាជិកឧត្តមក្រុមប្រឹក្សានៃអង្គចៅក្រម ថ្នាក់ដឹកនាំក្រសួងយុត្តិធម៌ ថ្នាក់ដឹកនាំ និងមន្ត្រីនៃស្ថាប័នតុលាការ ព្រមទាំងសិស្សវិជ្ជាជីវៈជាច្រើនរូបផងដែរ បានអញ្ជើញចូលរួមរំលែកមរណទុក្ខ និងគោរពវិញ្ញាណក្ខន្ធឧបាសក ហេង ហុង ដែលត្រូវជាឪពុកបង្កើតរបស់ឯកឧត្តម ហេង សុខណា នាយកសាលាភូមិន្ទចៅក្រម និងព្រះរាជអាជ្ញា ដែលបានទទួលមរណភាពដោយជរាពាធកាលពីថ្ងៃអាទិត្យ ទី២៣ ខែសីហា ឆ្នាំ២០២៦ ក្នុងជន្មាយុ ៨៣ឆ្នាំ។ ក្នុងក្តីវិយោគដ៏សែនសោកសង្រេងស្ទើររកទីបំផុតគ្មាននេះ ឯកឧត្តមឧបនាយករដ្ឋមន្ត្រីនិងប្រតិភូអម សូមចូលរួមរំលែកនូវមរណទុក្ខដ៏សែនក្រៀមក្រំប្រកបដោយសេចក្តីស្រណោះអាឡោះអាល័យ ចំពោះការបាត់បង់ដ៏មហាសែនធំធេងក្នុងជីវិតនូវឪពុកបង្កើត ឪពុកក្មេក និងជីតា ជាទីគោរពស្រឡាញ់បំផុត ដែលប្រកបដោយសង្គហធម៌ដ៏ជ្រាលជ្រៅ និងព្រហ្មវិហារធម៌មិនចេះរីងស្ងួតចំពោះកូនចៅទាំងអស់ និងដែលក្នុងមួយឆាកជីវិតរបស់ ឧបាសក ហេង ហុង តែងតែអប់រំទូន្មានប្រៀនប្រដៅកូនចៅទាំងអស់គ្នាឱ្យក្លាយជាមូលធនមនុស្សដ៏សំខាន់សម្រាប់សង្គមជាតិ។ ជាមួយគ្នានេះ ឯកឧត្តមឧបនាយករដ្ឋមន្ត្រី និងប្រតិភូអម សូមឧទ្ទិសបួងសួងសូមឱ្យដួងវិញ្ញាណក្ខន្ធរបស់ ឧបាសក ហេង ហុង សូមឆាប់បានចាប់បដិសន្ធិនៅទីឋានបរមសុខក្នុងសុគតិភពកុំបីឃ្លៀងឃ្លាតឡើយ។