国土规划部官员在组织教师内部竞争考试期间，因父亲去世表达哀悼

**កតញ្ញូ និងការទទួលខុសត្រូវរបស់មន្ត្រី «ការងារជាតិមិនឱ្យចន្លោះ កាតព្វកិច្ចជាកូនប្រុសមិនឱ្យខ្វះខាត»** នេះជាស្មារតីលះបង់** **ឧត្តមភាពមន្ត្រី** **និងការទទួលខុសត្រូវខ្ពស់របស់** **ឯកឧត្តម** **ង៉ឺយ** **ធឿន** **ក្នុងគ្រាដែលដួងចិត្តកំពុងសោកសង្រេង ដោយសារការបាត់បង់លោកឪពុកបង្កើត។ នៅក្នុងកិច្ចដំណើរការរៀបចំការប្រឡងប្រជែងផ្ទៃក្នុង សម្រាប់គ្រូបង្រៀនជាមន្ត្រីរាជការក្របខ័ណ្ឌ ដើម្បីផ្ទេរកន្លែងការងារពីគ្រឹះស្ថានសិក្សាសាធារណៈទូទាំងប្រទេស មកបំពេញតម្រូវការនៅតាមគ្រឹះស្ថានសិក្សាសាធារណៈ ក្នុងភូមិសាស្ត្ររាជធានីភ្នំពេញ ថ្នាក់ដឹកនាំ និងគណៈកម្មការរៀបចំការប្រឡងប្រជែងទាំងមូល សូមសម្តែងនូវការកោតសរសើរ និងវាយតម្លៃខ្ពស់បំផុតចំពោះ ឧត្តមភាពមន្ត្រី និងស្មារតីលះបង់ដ៏ឧត្តុង្គឧត្តមមិនអាចកាត់ថ្លៃបានរបស់ ឯកឧត្តម ង៉ឺយ ធឿន នាយករងសាលាភូមិន្ទរដ្ឋបាល និងជាប្រធានអនុគណៈកម្មការតាក់តែងវិញ្ញាសា។ ទោះបីជាពេលនេះ ឯកឧត្តមកំពុងតែជួបប្រទះនូវទុក្ខក្រៀមក្រំយ៉ាងធ្ងន់ធ្ងរ និងជាការបាត់បង់ដ៏ធំធេងបំផុតក្នុងឆាកជីវិត គឺការទទួលមរណភាពរបស់ ឧបាសក ង៉ឺយ ជិន ដែលត្រូវជាលោកឪពុកបង្កើតក៏ដោយ ក៏ឯកឧត្តមនៅតែបន្តបង្ហាញវត្តមានផ្ទាល់ និងដាក់ចិត្តដាក់កាយបំពេញតួនាទីប្រកបដោយ ការទទួលខុសត្រូវខ្ពស់បំផុត។ វត្តមានតាំងពីព្រលឹមស្រាងៗ និងការដឹកនាំដោយផ្ទាល់របស់ឯកឧត្តម គឺដើម្បីធានាឱ្យបាននូវការប្រឡងប្រជែងមួយប្រកបដោយសុក្រឹតភាព តម្លាភាព គុណធិបតេយ្យ និងការរក្សាការសម្ងាត់ខ្ពស់បំផុត។ ចប់ការងារភ្លាម ឯកឧត្តមឆាប់រួសរាន់ទៅបំពេញកាតព្វកិច្ចកតញ្ញូចំពោះ លោកឪពុកភ្លាម នៅខេត្តតាកែវ ហើយធ្វើដំណើរទៅមកៗ ក្នុងករណីចាំបាច់។ ការសុខចិត្តលះបង់ពេលវេលាដ៏កម្សត់ និងមានតម្លៃបំផុតចុងក្រោយ ដើម្បីតម្កល់ប្រយោជន៍ជាតិ និងស្ថាប័នជាធំ ក្នុងកាលៈទេសៈដ៏សែនលំបាកនេះ មិនត្រឹមតែឆ្លុះបញ្ចាំងពីមនសិការវិជ្ជាជីវៈ និងភាពជាគំរូនៃមន្ត្រីសាធារណៈប៉ុណ្ណោះទេ ប៉ុន្តែថែមទាំងជាការបង្ហាញយ៉ាងច្បាស់នូវកតញ្ញូតាធម៌ ដ៏ជ្រាលជ្រៅបំផុតចំពោះលោកឪពុក។ ការប្រកាន់ខ្ជាប់នូវគុណធម៌ សេចក្តីថ្លៃថ្នូរ និងការបម្រើជាតិមាតុភូមិដោយស្មោះត្រង់នេះហើយ គឺជាដំបូន្មាន និងជាកិត្តិយសដ៏ខ្ពង់ខ្ពស់បំផុត ដែលកូនប្រុសម្នាក់អាចតបស្នងជូនលោកអ្នកមានគុណ។ គណៈកម្មការរៀបចំការប្រឡងប្រជែង សូមចូលរួមរំលែកទុក្ខយ៉ាងក្រៀមក្រំជាទីបំផុតជាមួយឯកឧត្តម និងក្រុមគ្រួសារ ព្រមទាំងសូមឧទ្ទិសបួងសួងឱ្យដួងវិញ្ញាណក្ខន្ធរបស់ ឧបាសក ង៉ឺយ ជិន បានទៅសោយសុខក្នុងសុគតិភពកុំបីឃ្លៀងឃ្លាតឡើយ។