劳工部长恒苏 柬埔寨急需AI数字技能人才 补用工缺口

[来源: 柬埔寨国家电视台] [分类提示: NEWS] 标题: ឯកឧត្តមរដ្ឋមន្រ្តី ហេង សួរ៖ ការអភិវឌ្ឍធនធានមនុស្សឱ្យចេះប្រើប្រាស់ជំនាញបច្ចេកទេស ឌីជីថល និង AI ជាគន្លឹះបំពេញតម្រូវការឧស្សាហកម្ម និងលើកកម្ពស់ផលិតភាពការងារ (ភ្នំពេញ)៖ ថ្លែងជាវាគ្មិនក្នុងកិច្ចពិភាក្សាគោលនយោបាយកម្រិតខ្ពស់ពិសេសស្តីពីទីផ្សារការងារ និងគោលនយោបាយឧស្សាហកម្មថ្មីរបស់កម្ពុជា៖ ផលិតភាព ជំនាញ និងបរិវត្តកម្មរចនាសម្ព័ន្ធសេដ្ឋកិច្ច ដែលរៀបចំឡើងក្នុងឱកាសសន្និសីទថ្នាក់ជាតិស្ដីពីសេដ្ឋកិច្ចការងារ ឆ្នាំ២០២៦ នាថ្ងៃទី១១ ខែវិច្ឆិកា ឆ្នាំ២០២៦ នៅសណ្ឋាគារ Shangri-La ឯកឧត្តម ហេង សួរ រដ្ឋមន្រ្តីក្រសួងការងារនិងបណ្តុះបណ្តាលវិជ្ជាជីវៈ បានលើកឡើងថា ការអភិវឌ្ឍធនធានមនុស្សប្រកបដោយជំនាញបច្ចេកទេស និងសមត្ថភាពប្រើប្រាស់បច្ចេកវិទ្យា គឺជាកត្តាស្នូលក្នុងការលើកកម្ពស់ផលិតភាពការងារ បង្កើនប្រសិទ្ធភាពខ្សែច្រវាក់ផលិតកម្ម និងបន្ថែមតម្លៃក្នុងវិស័យឧស្សាហកម្ម ខណៈការកំណត់ទិសដៅគោលនយោបាយឧស្សាហកម្មឱ្យបានច្បាស់លាស់ និងការចូលរួមពីវិស័យឯកជន គឺជាមូលដ្ឋានចាំបាច់ក្នុងការធានាថា ការបណ្តុះបណ្តាលជំនាញឆ្លើយតបនឹងតម្រូវការទីផ្សារការងារជាក់ស្តែង។ ឯកឧត្តមបានគូសបញ្ជាក់ថា ធនធានមនុស្សជាកត្តាកំណត់ដ៏សំខាន់សម្រាប់គាំទ្រដល់ការអភិវឌ្ឍឧស្សាហកម្ម ប៉ុន្តែការអភិវឌ្ឍជំនាញមិនអាចសម្រេចបានប្រកបដោយប្រសិទ្ធភាពនោះទេ ប្រសិនបើគ្មានគោលនយោបាយ និងយុទ្ធសាស្ត្រច្បាស់លាស់ក្នុងការកំណត់វិស័យឧស្សាហកម្មអាទិភាព។ ជុំវិញការអភិវឌ្ឍជំនាញវិជ្ជាជីវៈ ឯកឧត្តមបានលើកឡើងថា ក្រសួងបានបន្តពង្រីកការបណ្តុះបណ្តាលជំនាញបច្ចេកទេសនិងវិជ្ជាជីវៈ ដោយផ្តោតទាំងលើជំនាញរឹង ជំនាញទន់ និងសហគ្រិនភាព ព្រមទាំងជំរុញការភ្ជាប់ទំនាក់ទំនងរវាងគ្រឹះស្ថានបណ្តុះបណ្តាលជាមួយសហគ្រាស ក្រុមហ៊ុន រោងចក្រ និងសិប្បកម្មគ្រប់កម្រិត ដើម្បីលើកកម្ពស់ការចូលរួមរបស់និយោជកក្នុងការបណ្តុះបណ្តាល និងអភិវឌ្ឍជំនាញកម្លាំងពលកម្ម