金边森速区社区纠纷已通过协商圆满解决

ទីបំផុត! ករណីចម្រូងចម្រាសនៅចោមចៅទី៣ ត្រូវបានបញ្ចប់ ក្រោយភាគីពាក់ព័ន្ធសម្របសម្រួល និងសុំទោសគ្នាទៅវិញទៅមកព្រោះការយល់ច្រំឡំ (ភ្នំពេញ)៖ រឿងរ៉ាវចម្រូងចម្រាសពាក់ព័ន្ធនឹងករណីបុរសម្នាក់ត្រូវបានជេរប្រមាថ និងមានការអះអាងពីការប្រើអំពើហិង្សា នៅភូមិព្រៃពីងខាងជើង សង្កាត់ចោមចៅទី៣ រាជធានីភ្នំពេញ ពេលនេះត្រូវបានដោះស្រាយបញ្ចប់ហើយ ក្រោយភាគីពាក់ព័ន្ធបានធ្វើការសម្របសម្រួល និងយល់ព្រមសុំទោសគ្នាទៅវិញទៅមក។ តាមការបំភ្លឺ និងការសម្របសម្រួលរវាងភាគីពាក់ព័ន្ធ បានឱ្យដឹងថា ករណីនេះផ្តើមចេញពីការយល់ច្រឡំ និងភាពតានតឹងដែលកើតមានឡើងនៅពេលមានការប្រមូលផ្តុំគ្នារបស់មនុស្សមួយចំនួននៅទីតាំងខាងលើក្នុងពេលយប់ ដែលត្រូវបានអះអាងថា បានបង្កការរំខានដល់អ្នករស់នៅជុំវិញ។ ជុំវិញហេតុការណ៍នេះ លោក សម្បត្តិ ដែលជាភាគីពាក់ព័ន្ធ បានទទួលស្គាល់កំហុសរបស់ខ្លួនចំពោះពាក្យពេចន៍ និងកាយវិការមួយចំនួនដែលមិនសមរម្យ និងបានសុំការអភ័យទោសចំពោះអ្នកដែលរងផលប៉ះពាល់។ ជាមួយគ្នានេះ ភាគីម្ខាងទៀតក៏បានយល់ព្រមសម្របសម្រួល និងសុំទោសចំពោះការយល់ច្រឡំដែលបានកើតមានឡើងផងដែរ ដោយភាគីទាំងសងខាងបានបង្ហាញការយោគយល់ និងអធ្យាស្រ័យឱ្យគ្នាទៅវិញទៅមក។ ក្រោយការសម្របសម្រួល ភាគីពាក់ព័ន្ធទាំងអស់បានឯកភាពគ្នាបញ្ចប់រឿងរ៉ាវនេះ ដោយសន្យាថា នឹងបញ្ឈប់បញ្ហា និងជម្លោះដែលបានកើតឡើង មិនឱ្យបន្តមានរឿងរ៉ាវដដែលនេះតទៅទៀត និងចូលរួមរក្សាសន្តិភាព សណ្តាប់ធ្នាប់ និងការគោរពគ្នាទៅវិញទៅមកនៅក្នុងមូលដ្ឋាន។ ទីបំផុត ករណីដែលធ្លាប់បង្កការយល់ច្រឡំ និងចម្រូងចម្រាស ត្រូវបានបញ្ចប់ដោយសន្តិវិធី តាមរយៈការសម្របសម្រួល សុំទោស និងអធ្យាស្រ័យឱ្យគ្នាទៅវិញទៅមក ដោយគ្រប់ភាគីសង្ឃឹមថា ចាប់ពីពេលនេះតទៅ នឹងមិនមានបញ្ហានេះកើតឡើងជាថ្មីទៀតឡើយ៕