柴桢省与磅清扬省发生两起工人通勤车事故 多人伤亡

ព័ត៌មានបឋម៖ នៅវេលាព្រឹកព្រលឹមថ្ងៃទី២៣ ខែឧសភា ឆ្នាំ២០២៦នេះ មានករណីគ្រោះថ្នាក់ចរាចរណ៍ដ៏រន្ធត់ រថយន្ដដឹកកម្មករកម្មការិនីពីរករណីផ្សេងគ្នា ក្នុងទឹកដីខេត្តស្វាយរៀង និងខេត្តកំពង់ឆ្នាំង បណ្ដាលឲ្យមានកម្មករកម្មការិនីជាច្រើនបានរងរបួស និងបាត់បង់ជីវិតនៅកន្លែងកើតហេតុ។ តាមសេចក្ដីរាយការណ៍បឋមដែលកម្ពុជាថ្មីទទួលបាន ករណីគ្រោះថ្នាក់នៅខេត្តកំពង់ឆ្នាំងគឺកើតឡើងរវាងរថយន្ដដឹកកម្មករកម្មការិនី ជាមួយរថយន្ដកូរ៉េដឹកទំនិញ បណ្ដាលរថយន្ដខូចខាតទាំងសងខាង និងកម្មករកម្មការិនីជាច្រើននាក់បានរងរបួស ដែលកើតឡើងនៅលើបណ្ដោយផ្លូវជាតិលេខ៥ ទល់មុខសាលាលេខ៥ ខេត្តកំពង់ឆ្នាំង។ ចំណែកនៅឯខេត្តស្វាយឯណោះវិញ កើតឡើងរវាងរថយន្ដដឹកកម្មករកម្មការិនី ជាមួយរថយន្ដក្រុង និងម៉ូតូ បណ្ដាលឲ្យរថយន្ដដឹកកម្មករកម្មការិនីក្រឡាប់ផ្ងារជើងជះអ្នកជិះចេញក្រៅ ហើយក៏មានជនរងគ្រោះមួយចំនួនកៀបជាប់ក្រោមរថន្ដផងដែរ ដែលករណីនេះកើតឡើងនៅក្រុងបាវិត ខេត្តស្វាយរៀង។ ទោះបីយ៉ាងណា ចំពោះតួលេខជនរងគ្រោះដែលរងរបួស ឬបាត់ជីវិតប៉ុន្មាននាក់ កម្ពុជាថ្មី នៅមិនទាន់ទទួលបាននៅឡើយទេ ក្រុមការងារនឹងតាមដានបន្តទៀត៕