西哈莫尼国王在京治疗健康状况好转 洪玛尼发文祈福

ទូលព្រះបង្គំជាខ្ញុំ មានសេចក្ដីសោមនស្ស និងត្រេកអរឥតឧបមា ដោយបានទទួលព័ត៌មានពីក្រសួងព្រះបរមរាជវាំង អំពីស្ថានភាពព្រះរាជសុខភាពដែលកំពុងប្រសើរឡើងជាបន្តបន្ទាប់ របស់ព្រះករុណាជាអម្ចាស់ជីវិតតម្កល់លើត្បូង ជាទីគោរពសក្ការៈដ៏ខ្ពង់ខ្ពស់បំផុត បន្ទាប់ពីព្រះអង្គបានគង់ប្រថាប់ទទួលការព្យាបាល និងការថែទាំយ៉ាងយកចិត្តទុកដាក់ខ្ពស់បំផុតពីក្រុមគ្រូពេទ្យជំនាញ នៃមន្ទីរពេទ្យរដ្ឋធានីប៉េកាំង ក្នុងរយៈពេលមួយសប្តាហ៍កន្លងមកនេះ។ ក្នុងនាមជាប្រជានុរាស្ត្រដែលតែងតែគោរពស្រលាញ់ចំពោះព្រះអង្គ ទូលព្រះបង្គំជាខ្ញុំ សូមថ្វាយព្រះពរព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត សូមព្រះអង្គឆាប់បានជាសះស្បើយពេញលេញពីព្រះរោគ និងមានព្រះរាជសុខភាពល្អបរិបូរណ៍ ព្រះកាយពលមាំមួនឡើងវិញ ដើម្បីយាងនិវត្តន៍បន្តគង់ប្រថាប់ជាមហាម្លប់ដ៏ត្រជាក់ត្រជុំ ដល់កូនចៅប្រជានុរាស្ត្រព្រះអង្គជានិច្ចតទៅ។ ជាថ្មីម្តងទៀត សូមថ្លែងអំណរគុណយ៉ាងជ្រាលជ្រៅ ចំពោះរដ្ឋាភិបាលនៃសាធារណរដ្ឋប្រជាមានិតចិន មន្ទីរពេទ្យរដ្ឋធានីប៉េកាំង ព្រមទាំងលោកគ្រូពេទ្យ និងអ្នកគ្រូពេទ្យទាំងអស់ ដែលបានខិតខំយកចិត្តទុកដាក់យ៉ាងខ្ពស់បំផុត ក្នុងការពិនិត្យតាមដាន និងថែទាំព្រះរាជសុខភាព ថ្វាយព្រះអង្គ រហូតទទួលបានលទ្ធផលដ៏ប្រសើរ។