柬埔寨庆祝国际青年节 强调青年参与社会发展

ចំណាប់អារម្មណ៍របស់តំណាងយុវជនកម្ពុជាទាំងមូលផ្ញើជូនវីរកងទ័ពនៅជួរមុខក្នុងឱកាសប្រារព្ធខួបលើកទី២៧ ទិវាអន្តរជាតិសម្រាប់យុវជន ១២ សីហា _____________________  ខ្ញុំបាទ ហេង ឌីមែន  ជាសិស្សមកពីវិទ្យាល័យព្រះយុគន្ធរ សាលារៀនជំនាន់ថ្មី រាជធានីភ្នំពេញ។ ថ្ងៃនេះ ខ្ញុំបាទពិតជាមានកិត្តិយសជាអនេក ដែលមានឱកាសបានតំណាងឱ្យយុវជនកម្ពុជាទាំងមូល ឈរលើវេទិកាដ៏សែនអស្ចារ្យនៃការប្រារព្ធខួបលើកទី២៧ ទិវាអន្តរជាតិសម្រាប់យុវជន ១២ សីហា។   ទិវាអន្តរជាតិសម្រាប់យុវជន ១២ សីហា ២០២៦ ក្រោមប្រធានបទ៖ **«**បរិបទខុសគ្នា** **បំណងប្រាថ្នារួមគ្នា**»**។ អង្គពិធីទាំងមូលជាទីគោរព ក្រោមប្រធានបទដ៏មានអត្ថន័យមួយនេះ បានបង្ហាញពីតួនាទីដ៏មានសក្តានុពលរបស់យុវជន ក្នុងការផ្លាស់ប្តូរពិភពលោកឱ្យបានល្អប្រសើរ។  ទោះបីជាយុវជនយើងរស់នៅក្នុងបរិបទសង្គម វប្បធម៌ និងស្ថានភាពសេដ្ឋកិច្ចខុសៗគ្នាក៏ដោយ ប៉ុន្តែយើងមានបំណងប្រាថ្នារួមគ្នាតែមួយ គឺការចង់បានពិភពលោកមួយដែលមានសមធម៌ សន្តិភាព និងការអភិវឌ្ឍប្រកបដោយចីរភាព។ សំឡេង និងសកម្មភាពរបស់យុវជន គឺជាកម្លាំងចលករមិនអាចខ្វះបាន ក្នុងការជម្នះរាល់ឧបសគ្គ ទោះស្ថិតក្នុងកាលៈទេសៈណាក៏ដោយ ដើម្បីធានាថាគ្មានយុវជនណាម្នាក់ត្រូវបានបោះបង់ចោលឡើយ។ ឯកឧត្តមលោកជំទាវ លោកគ្រូអ្នកគ្រូជាទីគោរព មិត្តៗយុវជនជាទីរាប់អាន វត្តមានខ្ញុំបាទក្នុងថ្ងៃនេះ មិនមែនគ្រាន់តែតំណាងឱ្យខ្លួនឯង សាលារៀនរបស់ខ្ញុំនោះឡើយ ប៉ុន្តែជាសំឡេងមួយដែលតំណាងឱ្យសំឡេងរាប់លានរបស់យុវជនទូទាំងពិភពលោក។ នៅថ្ងៃនៃការប្រារព្ធទិវាអន្តរជាតិសម្រាប់យុវជននេះ ខ្ញុំចង់និយាយទៅកាន់យុវជនទាំងអស់គ្នាថា៖ យើងទាំងអស់គ្នាជាកម្លាំងដ៏មានសក្តានុពលដែលអាចដឹកនាំពិភពលោកឆ្ពោះទៅរកវឌ្ឍនភាព ប្រកបដោយភាពសុខក្សេមក្សាន្ត។ ពិភពលោកទាំងមូលរីកចម្រើន សុខក្សេមក្សាន្តទៅបានគឺអាស្រ័យលើយើងទាំងអស់គ្នា ត្រូវប្រកាន់ខ្ជាប់ចំណុចចាំបាច់ ដូចខាងក្រោម៖ - ពង្រឹងសមត្ថភាព៖ យើងទាំងអស់គ្នាត្រូវខិតខំរៀនសូត្រចាប់យកចំណេះ ជំនាញមួយឱ្យច្បាស់លាស់ស្របតាមច្បាប់សង្គមជាតិ។ - បណ្តុះស្មារតីសាមគ្គីភាព៖ យើងទាំងអស់គ្នាត្រូវចេះស្រឡាញ់ គោរពសិទ្ធិឱ្យតម្លៃគ្នាទៅវិញទៅមក។ - ប្រកាន់យកនូវសច្ចៈភាព៖ យើងទាំងអស់គ្នាត្រូវរស់នៅក្នុងទទួលយក ទទួលស្គាល់ការពិត ចេះកែតម្រូវ ផ្លាស់ប្តូរចំណុចមិនល្អចេញពីជីវិត។ - រួមគ្នាដោះស្រាយបញ្ហា៖ យើងទាំងអស់ត្រូវចូលរួមដោះស្រាយបញ្ហាដែលកើតមាននៅក្នុងសង្គមដោយមិនទម្លាក់បន្ទុករង់ចាំនរណាម្នាក់ដោះស្រាយបញ្ហានោះឡើយ រួមដោះស្រាយបញ្ហាតាមសមត្ថភាព លទ្ធផលដែលខ្លួនមាន អាចធ្វើបាន ដើម្បីសង្គមជាតិបានប្រសើរ។ ខ្ញុំបាទសូមថ្លែងអំណរគុណយ៉ាងជ្រាលជ្រៅដល់ប្រមុខថ្នាក់ដឹកនាំគ្រប់ជាន់ថ្នាក់ សម្តេចអគ្គមហាសេនាបតីតេជោ ហ៊ុន សែន បិតាសន្តិភាព សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ដែលបានខិតខំអស់ពីកម្លាំងកាយចិត្ត ដើម្បីប្រទេសជាតិមានភាពរីកចម្រើន។** **គុណបំណាច់ដែលមិនអាចកាត់ថ្លៃបាន ដែលកូនខ្មែរគ្រប់រូបមិនអាចបំភ្លេចបាននោះ** **គឺវីរកងទ័ពកម្ពុជាគ្រប់រូប ខ្ញុំពិតជាសូមគោរពដឹងគុណជាអនេកនូវការលះបង់ ការបូជាសាច់ស្រស់ ឈាមស្រស់ សូម្បីតែជីវិតមិនខ្លាចញញើតនឹងលះបង់ដើម្បីបុព្វហេតុការពារជាតិមាតុភូមិពីការឈ្លានពានពីប្រទេសអមិត្ត។ យើងទាំងអស់គ្នាជាកូនខ្មែរ សូមបួងសួងដល់បុព្វបុរសខ្មែរគ្រប់ជំនាន់ ជួយតាមថែរក្សាលោកអ៊ំ លោកពូ បងប្អូនកងទ័ពទាំងអស់គ្នាជួបប្រទះតែសុខសុវត្ថិភាព។ ការលះបង់ដ៏ធំធេងរបស់លោកអ៊ំ លោកពូ បងប្អូនកងទ័ពទាំងអស់គ្នា ដែលបានពលីជីវិតគឹ៖ • ដើម្បីការពារមាតុភូមិ • ដើម្បីការពារជីវិតប្រជាជន • ដើម្បីការពារអធិបតេយ្យភាពជាតិ ទោះបីជាការសម្រាកមិនបានគ្រប់គ្រាន់ អាហារបរិភោគគ្រាន់តែចុងមាត់ចុងក ការហត់នឿយ និងភាពអស់កម្លាំងបានក្លាយជារឿងប្រចាំថ្ងៃក៏ដោយ លោកពូ អ្នកមីង បងប្អូនកងទ័ពជួរមុខ នៅតែឈរយ៉ាងរឹងមាំលើសមរភូមិ ដោយមិនដែលបោះបង់តួនាទី និងភារកិច្ចដ៏ឧត្តុង្គឧត្តមក្នុងការការពារបូរណភាពទឹកដី សន្តិភាព និងសេចក្តីសុខសាន្តរបស់ប្រជាជនខ្មែរទាំងមូល។ ស្នាមញញឹមដែលលោកអ្នកផ្តល់ឱ្យប្រជាជននៅជួរក្រោយ មិនមែនជាស្នាមញញឹមធម្មតានោះទេ ប៉ុន្តែជាស្នាមញញឹមដែលលាក់បាំងនូវភាពនឿយហត់ ការលះបង់ និងក្តីស្រឡាញ់ដ៏ជ្រាលជ្រៅចំពោះមាតុភូមិ។ នៅពីក្រោយទាហានម្នាក់ គឺមានឪពុកម្តាយដែលទន្ទឹងរង់ចាំ មានភរិយា មានស្វាមី មានកូនៗ និងក្រុមគ្រួសារដែលតែងតែបួងសួងឱ្យលោកអ្នកមានសុវត្ថិភាពជារៀងរាល់ថ្ងៃ។ ប៉ុន្តែ ដើម្បីឱ្យប្រជាជនរាប់លាននាក់អាចរស់នៅដោយសុខសាន្ត លោកអ្នកបានសម្រេចចិត្តដាក់ប្រយោជន៍ជាតិ និងប្រជាជនជាធំ ជាជាងផលប្រយោជន៍ផ្ទាល់ខ្លួន។ ការលះបង់នេះ គឺជាគុណូបការៈដ៏ធំធេង ដែលយុវជនជំនាន់ក្រោយមិនអាចបំភ្លេចបានជារៀងរហូត។