柬埔寨公务员部举办公共采购审计培训 提升内部合规管理

ក្រសួងមុខងារសាធារណៈ រៀបចំវគ្គបណ្តុះបណ្តាលស្តីពី «នីតិវិធីសវនកម្មលើកិច្ចលទ្ធកម្មសាធារណៈ និងទ្រព្យសម្បត្តិរដ្ឋ» ជូនដល់ថ្នាក់ដឹកនាំ និងមន្ត្រីជំនាញសវនកម្មផ្ទៃក្នុង នាយកដ្ឋានសវនកម្មផ្ទៃក្នុងនៃក្រសួងមុខងារសាធារណៈ បានសហការជាមួយ អគ្គនាយកដ្ឋានសវនកម្មផ្ទៃក្នុងនៃក្រសួងសេដ្ឋកិច្ចនិងហិរញ្ញវត្ថុ រៀបចំវគ្គបណ្តុះបណ្តាលក្រោមប្រធានបទ «នីតិវិធីសវនកម្មលើកិច្ចលទ្ធកម្មសាធារណៈ និងទ្រព្យសម្បត្តិរដ្ឋ» រយៈពេលពីរថ្ងៃ ចាប់ពីថ្ងៃទី០២ ដល់ថ្ងៃទី០៣ ខែកញ្ញា ឆ្នាំ២០២៦ នៅទីស្តីការក្រសួងមុខងារសាធារណៈ។ វគ្គបណ្តុះបណ្តាលនេះ បានប្រព្រឹត្តទៅក្រោមអធិបតីភាព ឯកឧត្តម ចាន់ វាសនា អនុរដ្ឋលេខាធិការក្រសួងមុខងារសាធារណៈ ដោយមានការចូលរួមពីថ្នាក់ដឹកនាំ និងមន្ត្រីជំនាញសវនកម្មផ្ទៃក្នុង នៃក្រសួងមុខងារសាធារណៈ។ ក្នុងកម្មវិធីរយៈពេលពីរថ្ងៃនេះ សិក្ខាកាមទាំងអស់បានសិក្សា និងពិភាក្សាយ៉ាងស៊ីជម្រៅជាមួយវាគ្មិនកិត្តិយស ដែលជាថ្នាក់ដឹកនាំជំនាញសវនកម្មផ្ទៃក្នុងនៃក្រសួងសេដ្ឋកិច្ចនិងហិរញ្ញវត្ថុ លើប្រធានបទគន្លឹះចំនួន២ ដោយផ្តោតលើខ្លឹមសារលម្អិតរួមមាន៖ (១)សវនកម្មលើទ្រព្យសម្បត្តិរដ្ឋ៖ បទបង្ហាញនេះបានផ្តោតជាសំខាន់លើការដោះស្រាយបញ្ហាប្រឈម និងការពង្រឹងយន្តការគ្រប់គ្រងទ្រព្យសម្បត្តិរដ្ឋឱ្យមានប្រសិទ្ធភាពខ្ពស់។ ក្នុងនោះ រួមមានការណែនាំអំពីវិធីសាស្ត្រផ្ទៀងផ្ទាត់សារពើភ័ណ្ឌ ដើម្បីធានាឱ្យបាននូវវត្តមានជាក់ស្តែង និងសុវត្ថិភាពនៃទ្រព្យសម្បត្តិ, ការវាយតម្លៃតម្លៃទ្រព្យសម្បត្តិរដ្ឋ ស្របតាមស្តង់ដាគណនេយ្យសាធារណៈ ព្រមទាំងការគ្រប់គ្រងវដ្តជីវិតនៃទ្រព្យសម្បត្តិ ចាប់តាំងពីការទិញចូល ការថែទាំ រហូតដល់នីតិវិធីនៃការជម្រះបញ្ជី ឬការផ្ទេរកម្មសិទ្ធិឱ្យបានត្រឹមត្រូវតាមច្បាប់។ (២)សវនកម្មលើកិច្ចលទ្ធកម្មសាធារណៈ៖ បទបង្ហាញនេះបានលាតត្រដាងលម្អិតអំពីបច្ចេកទេស និងជំហានគន្លឹះក្នុងការត្រួតពិនិត្យដំណើរការលទ្ធកម្មទាំងមូល។ ខ្លឹមសារសំខាន់ៗរួមមាន ការពិនិត្យលើភាពត្រឹមត្រូវ តម្លាភាព និងភាពស្របច្បាប់នៃនីតិវិធីដេញថ្លៃ ការផ្ទៀងផ្ទាត់ឯកសារគតិយុត្តនិងសំណើដេញថ្លៃ ដើម្បីបង្ការហានិភ័យនៃអំពើពុករលួយ ឬការឃុបឃិតគ្នា ព្រមទាំងការតាមដានការអនុវត្តកិច្ចសន្យាផ្សេងៗ សំដៅធានាថាការប្រគល់-ទទួលទំនិញ សេវាកម្ម ឬការសាងសង់ ត្រូវបានធ្វើឡើងត្រឹមត្រូវតាមលក្ខខណ្ឌបច្ចេកទេស និងទូទាត់ប្រាក់ចំគោលដៅ។ ក្នុងវគ្គបណ្តុះបណ្តាលនេះផងដែរ ឯកឧត្តម ចាន់ វាសនា បានធ្វើការកោតសរសើរ និងវាយតម្លៃខ្ពស់ចំពោះស្មារតីយកចិត្តទុកដាក់ក្រេបជញ្ជក់ចំណេះដឹងរបស់សិក្ខាកាមទាំងអស់។ ឯកឧត្តមក៏បានផ្តល់អនុសាសន៍ណែនាំ ដល់មន្ត្រីជំនាញសវនកម្មផ្ទៃក្នុងទាំងអស់ ត្រូវយកចំណេះដឹង និងបច្ចេកទេសជំនាញ ដែលទទួលបានពីវគ្គបណ្តុះបណ្តាលនេះ ទៅអនុវត្តក្នុងកិច្ចការងារជាក់ស្តែងឱ្យមានប្រសិទ្ធភាព ម៉ឺងម៉ាត់ និងប្រកបដោយវិជ្ជាជីវៈខ្ពស់ ដើម្បីចូលរួមចំណែកលើកកម្ពស់អភិបាលកិច្ចល្អ ស្របតាមកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈរបស់រាជរដ្ឋាភិបាលកម្ពុជា។ វគ្គបណ្តុះបណ្តាលនេះ បានបញ្ចប់ទៅដោយជោគជ័យ និងទទួលបានលទ្ធផលគាប់ប្រសើរ ដែលជាចំណែកមួយយ៉ាងសំខាន់ ក្នុងការបំពាក់បំប៉នមន្ត្រីជំនាញសវនកម្មផ្ទៃក្នុងនៃក្រសួងមុខងារសាធារណៈ ឱ្យកាន់តែមានសមត្ថភាពខ្ពស់ក្នុងការគ្រប់គ្រង និងទប់ស្កាត់ហានិភ័យហិរញ្ញវត្ថុក្នុងស្ថាប័ន៕