德崇国际机场警察局完成内部审计 严禁参与网络诈骗

នារសៀលថ្ងៃអង្គារ ១០កើត ខែជេស្ឋ ឆ្នាំមមី អដ្ឋស័ក ព.ស២៥៧០ ត្រូវនឹងថ្ងៃទី២៦ ខែឧសភា ឆ្នាំ២០២៦នេះ ឯកឧត្តម ឧត្តមសេនីយ៍ឯក ឈិន សារី អគ្គនាយករង នៃអគ្គនាយកដ្ឋានសវនកម្មផ្ទៃក្នុង ក្រសួងមហាផ្ទៃ និងជាប្រធានប្រតិភូ បានអញ្ជើញជាអធិបតីក្នុងកិច្ចប្រជុំបិទសវនកម្មផ្ទៃក្នុង សម្រាប់កាលបរិច្ឆេទ២០២៥ និងបណ្ដាឆ្នាំពាក់ព័ន្ធ នៅប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ។ ដោយមានការអញ្ជើញចូលរួម ប្រតិភូអមនៃអគ្គនាយកដ្ឋានសវនកម្មផ្ទៃក្នុង លោកឧត្តមសេនីយ៍ត្រី សុខ ធា នាយប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ លោកនាយរងប៉ុស្តិ៍ ប្រធានក្រុមប្រតិបត្តិការ ក្រុមការងារហិរញ្ញកិច្ច នៃអគ្គនាយកដ្ឋានភស្តុភារនិងហិរញ្ញវត្ថុ ប្រធានក្រុមផ្តល់ទិដ្ឋាការ និងមន្ត្រីពាក់ព័ន្ធមួយចំនួនផងដែរ។ លោកឧត្តមសេនីយ៍ត្រី សុខ ធា នាយប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ បានមានប្រសាសន៍ថា ក្នុងនាមជានាយប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ និងតំណាងឱ្យប្រធានក្រុមផ្តល់ទិដ្ឋាការ សូមសម្ដែងនូវការថ្លែងអំណរគុណចំពោះ ឯកឧត្តមជាគណៈអធិបតី និងប្រតិភូអមនៃអគ្គនាយកដ្ឋានសវនកម្មផ្ទៃក្នុងទាំងអស់ ដែលបានអញ្ជើញចុះ មកបំពេញបេសកកម្ម តាមគោលការណ៍ចង្អុលបង្ហាញរបស់ថ្នាក់ដឹកនាំក្រសួងមហាផ្ទៃ ដោយបានអនុវត្ត ការងារធ្វើសវនកម្មសម្រាប់កាលបរិច្ឆេទ២០២៥ និងបណ្តាឆ្នាំពាក់ព័ន្ធ នៅប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ រហូតបានបញ្ចប់ប្រកបដោយជោគជ័យនាពេលនេះ។ លោកឧត្តមសេនីយ៍ត្រី សុខ ធា នាយប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ មានប្រសាសន៍បន្តថា ក្រោមការដឹកនាំប្រកបដោយចក្ខុវិស័យវែងឆ្ងាយរបស់ក្រសួងមហាផ្ទៃ ក្រោមការដឹកនាំ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ តែងតែបានយកចិត្តទុកដាក់ខ្ពស់ក្នុងការជំរុញការបង្កើនល្បឿនកំណែទម្រង់នានាលើគ្រប់វិស័យ និង គ្រប់អង្គភាពជំនាញទាំងអស់ដែលស្ថិតក្នុងដែនសមត្ថកិច្ចក្រសួងមហាផ្ទៃ ក្នុងន័យនេះការពង្រឹងប្រសិទ្ធភាពនៃការអនុវត្ត ការងារ នៃយន្តការសវនកម្មផ្ទៃក្នុងក៏ទទួលបានការគាំទ្រយ៉ាងពេញលេញពីសំណាក់ថ្នាក់ដឹកនាំក្រសួងមហាផ្ទៃផងដែរ ។ ឯកឧត្តម ឧត្តមសេនីយ៍ឯក ឈិន សារី អគ្គនាយករង នៃអគ្គនាយកដ្ឋានសវនកម្មផ្ទៃក្នុង មានប្រសាសន៍ថា ដោយទទួលបានការណែនាំ និងការចាត់តាំងពីសំណាក់ ឯកឧត្តម ឧត្តមសេនីយ៍ឯក ងួន ស្រេង អគ្គនាយកសវនកម្មផ្ទៃក្នុង លោកបានដឹកនាំសហការីចុះធ្វើសវនកម្ម នៅប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ នាពេលនេះ។ ឯកឧត្តម ឧត្តមសេនីយ៍ឯក ឈិន សារី បានថ្លែងអំណរគុណដល់លោកឧត្តមសេនីយ៍ត្រី សុខ ធា នាយប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ ព្រមទាំងសហការីទាំងអស់ដែលបានចូលរួមយ៉ាងសកម្ម និងជួយសម្រួលដល់ក្រុមការងារសវនករ ធ្វើសវនកម្មសម្រាប់កាលបរិច្ឆេទ២០២៥ និងបណ្តាឆ្នាំពាក់ព័ន្ធ នាពេលនេះប្រកបដោយជោគជ័យ។ ឯកឧត្តម ឧត្តមសេនីយ៍ឯក ឈិន សារី អគ្គនាយករង នៃអគ្គនាយកដ្ឋានសវនកម្មផ្ទៃក្នុង បានណែនាំអោយកម្លាំងប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ មានសាមគ្គីភាពផ្ទៃក្នុង គោរពវិន័យកងកម្លាំងនគរបាលជាតិ សូមជៀសឆ្ងាយពីគ្រឿងញៀន ជាពិសេសកុំពាក់ព័ន្ធជាមួយបទល្មើស Online Scams៕ ✅ប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ ☎️ទំនាក់ទំនង 0188200300 👉Telegram Chanel : https://t.me/kticheckpoint 🗺 ទីតាំង (Map) : https://maps.app.goo.gl/HWxU68PC8A1wvTsR7?g_st=ipc