司法部与计划部公务员考试9月14日举行

បើមិនមានការប្រែប្រួលទេ ការប្រឡងប្រជែងមន្ត្រីក្រសួងយុត្តិធម៌ និងក្រសួងផែនការ នឹងប្រព្រឹត្តទៅនាថ្ងៃទី១៤ ខែកញ្ញា ឆ្នាំ២០២៦ នារសៀលថ្ងៃទី៣១ ខែសីហា ឆ្នាំ២០២៦ នៅអគារគណៈកម្មាធិការកែទម្រង់រដ្ឋបាលសាធារណៈ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការរៀបចំការប្រឡងប្រជែង បានដឹកនាំកិច្ចប្រជុំអន្តរក្រសួង ដើម្បីស្តាប់របាយការណ៍ ពិនិត្យវឌ្ឍនភាពការងារ និងពិភាក្សាសម្រេចលើការងារបច្ចេកទេសសំខាន់ៗ ក្នុងដំណើរការរៀបចំការប្រឡងប្រជែងជ្រើសរើសមន្ត្រីរាជការ។ បន្ទាប់ពីបានស្តាប់របាយការណ៍ស្តីពីវឌ្ឍនភាពនៃការទទួលពាក្យ និងការត្រៀមលក្ខណៈប្រឡងរួចមក ថ្នាក់ដឹកនាំ មន្ត្រីជំនាញ និងតំណាងក្រសួង-ស្ថាប័នពាក់ព័ន្ធ ដែលជាសមាជិក សមាជិកានៃអង្គប្រជុំ បានពិភាក្សា និងផ្លាស់ប្តូរមតិយោបល់យ៉ាងផុសផុល អង្គប្រជុំបានឯកភាពសម្រេចកំណត់យកថ្ងៃទី១៤ ខែកញ្ញា ឆ្នាំ២០២៦ ជាកាលបរិច្ឆេទប្រឡង និងកំណត់យកសាលាភូមិន្ទរដ្ឋបាលជាមណ្ឌលប្រឡងរួម សម្រាប់ជ្រើសរើសមន្ត្រីជំនាញច្បាប់ចំនួន ១៥កន្លែង ជូនក្រសួងយុត្តិធម៌ និងមន្ត្រីកិច្ចសន្យាចំនួន ១៦កន្លែង ជូនវិទ្យាស្ថានជាតិស្ថិតិនៃក្រសួងផែនការ។ ការរៀបចំគ្រប់ដំណាក់កាលនៃការប្រឡងប្រជែងនេះ ត្រូវបានអនុវត្តយ៉ាងម៉ឺងម៉ាត់តាមអនុសាសន៍ណែនាំដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងគោលដៅបន្តរុញច្រានការកែទម្រង់រដ្ឋបាលសាធារណៈ ដោយឈរលើគោលការណ៍គុណាធិបតេយ្យ តម្លាភាព យុត្តិធម៌ និងបរិយាបន្ន ពោលគឺ «អ្នកចេះជាប់» និង «ជាប់ដោយមោទនៈ ធ្លាក់ដោយអស់ចិត្ត»។ សូមបេក្ខជនទាំងអស់ តាមដានដោយយកចិត្តទុកដាក់នូវការផ្សព្វផ្សាយជាបន្តបន្ទាប់ និងយកចិត្តទុកដាក់នូវការទាក់ទងដោយផ្ទាល់របស់គណៈកម្មការរៀបចំការប្រឡងប្រជែង ដើម្បីផ្តល់ព័ត៌មានលម្អិតបន្ថែម ក្នុងករណីចាំបាច់ដែលមាន៕