洪森宣布全额资助患病教师莫索潘 治疗费用由其个人承担

សម្តេចតេជោ ហ៊ុន សែន ប្រកាសទទួលរ៉ាប់រងព្យាបាលអ្នកគ្រូវ័យក្មេង ដែលកំពុងប្រឈមជំងឺខូចតម្រងនោមដំណាក់កាលចុងក្រោយ សម្តេចតេជោ ហ៊ុន សែន ប្រមុខរដ្ឋស្តីទី បានប្រកាសនៅយប់នេះថា នឹងទទួលរ៉ាប់រងចំណាយព្យាបាលទាំងស្រុង ដល់អ្នកគ្រូ ម៉ូវ សុផាន់ ដែលកំពុងប្រឈមជំងឺខូចតម្រងនោមដំណាក់កាលចុងក្រោយ។ តាមសារដែលសម្តេចបានបង្ហោះ បានឱ្យដឹងថា មានសប្បុរសជនជាច្រើនបានអំពាវនាវជួយដល់អ្នកគ្រូរូបនេះ ហើយក្រោយពេលទទួលបានព័ត៌មានតាមរយៈ ឯកឧត្តម សេង ទៀង សម្តេចបានសម្រេចទទួលខុសត្រូវលើការព្យាបាលទាំងមូលចាប់ពីពេលនេះតទៅ។ សម្តេចក៏បានបញ្ជាក់ថា នៅថ្ងៃបន្ទាប់ ឯកឧត្តម សេង ទៀង នឹងទៅជួបអ្នកគ្រូ ដើម្បីពិភាក្សាដំណោះស្រាយបន្ត បន្ទាប់ពីមានការពិភាក្សាជាមួយវេជ្ជបណ្ឌិត គង់ សន្យា ប្រធានមន្ទីរពេទ្យកាល់ម៉ែត្រ ដែលបង្ហាញថាមានសញ្ញាវិជ្ជមានខ្លះរួចហើយ។ ការប្រកាសនេះធ្វើឡើង បន្ទាប់ពីអ្នកគ្រូវ័យ ២៦ឆ្នាំ ដែលទើបប្រឡងជាប់ជាគ្រូកិច្ចព្រមព្រៀង បានបង្ហោះវីដេអូសុំជំនួយលើបណ្តាញសង្គម ដោយសង្ឃឹមទទួលបានការឧបត្ថម្ភសម្រាប់ការព្យាបាលជំងឺធ្ងន់ធ្ងរនេះ។ អ្នកគ្រូ ម៉ូវ សុផាន់ ដែលកំពុងបង្រៀននៅខេត្តព្រៃវែង បានធ្លាក់ខ្លួនឈឺក្រោយបម្រើការងារបានប្រមាណ ៤ខែ ហើយបានសម្រាកព្យាបាលជាង ២ខែមកហើយ។ យុវតីរូបនេះក៏ជាកុមារកំព្រាម្តាយតាំងពីវ័យក្មេងផងដែរ។ សកម្មភាពជួយនេះ បានទាក់ទាញការចាប់អារម្មណ៍យ៉ាងខ្លាំងពីសាធារណជន និងបង្ហាញពីការយកចិត្តទុកដាក់ចំពោះវិស័យអប់រំ និងសុខុមាលភាពគ្រូបង្រៀននៅកម្ពុជា។