卫生部联合世卫开月度技术会 讨论医疗人力与信息系统

កិច្ចប្រជុំក្រុមការងារបច្ចេកទេសសុខាភិបាល ប្រចាំខែវិច្ឆិកា ឆ្នាំ២០២៦។ — រាជធានីភ្នំពេញ៖ ព្រឹកថ្ងៃទី៥ ខែវិច្ឆិកា ឆ្នាំ២០២៦ ឯកឧត្តមវេជ្ជបណ្ឌិត ម៉ៅ តាន់អ៊ាង អនុរដ្ឋលេខាធិការក្រសួងសុខាភិបាល រួមជាមួយលោកស្រី Amy Cawthorne ទីប្រឹក្សាជាន់ខ្ពស់ នៃអង្គការសុខភាពពិភពលោក(WHO) នៅកម្ពុជា បានអញ្ជើញចូលរួមដឹកនាំ កិច្ចប្រជុំក្រុមការងារបច្ចេកទេសសុខាភិបាល (TWGH) ប្រចាំខែវិច្ឆិកា ឆ្នាំ២០២៦ ដែលរៀបចំនៅទីស្តីការក្រសួងសុខាភិបាល។ កិច្ចប្រជុំ បានដំណើរការដោយផ្តោតលើប្រធានបទពាក់ព័ន្ធនឹងការអភិវឌ្ឍ និងពង្រឹងកម្លាំងពលកម្មសុខាភិបាល និងការពង្រឹងប្រព័ន្ធគ្រប់គ្រងព័ត៌មានសុខាភិបាល ដែលក្នុងនោះបាន៖ (១)ពិនិត្យពិភាក្សាលើវឌ្ឍនភាពការងារ បញ្ហាប្រឈម និងការផ្លាស់ប្តូរបទពិសោធន៍ ក្នុងការពង្រឹងសមត្ថភាព  ការរក្សា និងបែងចែកបុគ្គលិកសុខាភិបាល តាមមូលដ្ខានសុខាភិបាល និងការអភិវឌ្ឍ ការអប់រំបណ្តុះបណ្តាលវិជ្ជាជីវៈសុខាភិបាល រាប់ទាំងការបណ្តុះបណ្តាលមុនចូលបម្រើការងារ និងកំពុងបម្រើការងារ និង(២)ការបង្ហាញ និងពិភាក្សាលើ ផែនការសម្រាប់ពង្រីក និងដាក់ឱ្យអនុវត្តប្រព័ន្ធព័ត៌មានសុខាភិបាលថ្មី ប្រភេទDHIS2 នៅទូទាំងប្រទេស ព្រមទាំងអន្តរប្រតិបត្តិការ (inter-operation) ជាមួយប្រព័ន្ធព័ត៌មានពាក់ព័ន្ធ ដើម្បីឆ្លើយតបនឹងតម្រូវការសេវាសុខាភិបាល និងគាំទ្រដល់ការអនុវត្តផែនការយុទ្ធសាស្ត្រសុខាភិបាល របស់ព្រះរាជាណាចក្រកម្ពុជា។ សូមបញ្ជាក់ថា កិច្ចប្រជុំនេះមានការចូលរួមពី តំណាងនាយកដ្ឋានជំនាញ មជ្ឈមណ្ឌលជាតិ មន្ទីរសុខាភិបាលពាក់ព័ន្ធ និងដៃគូអនុវត្តវិស័យសុខាភិបាល គម្រោងទ្វេភាគី ព្រមទាំងភាគីពាក់ព័ន្ធ ក្នុងការជំរុញការអភិវឌ្ឍកម្លាំងពលកម្មសុខាភិបាល ប្រកបដោយគុណភាព សមធម៌ និងនិរន្តរភាព ព្រមទាំងគ្រប់គ្រងប្រព័ន្ធព័ត៌មានសុខាភិបាល បានសមស្រប ដើម្បីធានាការផ្តល់សេវាសុខាភិបាល ប្រកបដោយប្រសិទ្ធភាព គុណភាព សុវត្ថិភាព និងសមធម៌ឆ្លើយតបនឹងតម្រូវការរបស់ប្រជាពលរដ្ឋ។ **🌐** [Website](https://moh.gov.kh/kh/home) 📱 [Facebook](https://www.facebook.com/MinistryofHealthofCambodia?mibextid=ZbWKwL) 📱 [Telegram](https://t.me/MOHCambodia) 📱 [X (twitter)](https://x.com/MohCambodia) 📱 [Tiktok](https://www.tiktok.com/@mohcambodia) 📱 [YouTube](https://www.youtube.com/@MOHCambodia)