柬埔寨司法部与日本JICA召开司法发展项目第四次协调会

ឯកឧត្តមបណ្ឌិត ជិន ម៉ាលីន រដ្ឋលេខាធិការប្រចាំការក្រសួងយុត្តិធម៌ និងជានាយកគម្រោងអភិវឌ្ឍន៍វិស័យច្បាប់ និងយុត្តិធម៌ ជំហានទី៦ អញ្ជើញដឹកនាំកិច្ចប្រជុំគណៈកម្មការសម្របសម្រួលចម្រុះ (JCC) លើកទី៤ =================== នាព្រឹកថ្ងៃពុធ ១១កើត ខែជេស្ឋ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២៧ ខែឧសភា ឆ្នាំ២០២៦ នៅទីស្តីការក្រសួងយុត្តិធម៌៖ ឯកឧត្តមបណ្ឌិត ជិន ម៉ាលីន រដ្ឋលេខាធិការប្រចាំការនៃក្រសួងយុត្តិធម៌ និងជានាយកគម្រោងអភិវឌ្ឍន៍វិស័យច្បាប់ និងយុត្តិធម៌ ជំហានទី៦ និងលោក YAKO Yoshito តំណាងជាន់ខ្ពស់ការិយាល័យ JICA ប្រចាំនៅកម្ពុជា បានដឹកនាំកិច្ចប្រជុំគណៈកម្មការសម្របសម្រួលចម្រុះ (JCC) លើកទី៤ នៃគម្រោងអភិវឌ្ឍន៍វិស័យច្បាប់ និងយុត្តិធម៌ ជំហានទី៦។ កិច្ចប្រជុំមានការអញ្ជើញចូលរួមពីភាគីកម្ពុជារួមមាន ឯកឧត្តម កេង សុម៉ារិទ្ធ រដ្ឋលេខាធិការ ជាអ្នកគ្រប់គ្រងគម្រោង និងប្រធានក្រុមការងារបច្ចេកទេស TWG ឯកឧត្តម តាន់ហ៊ាន ដាវ័ណ្ណ រដ្ឋលេខាធិការ ឯកឧត្តមបណ្ឌិតរដ្ឋ ឈន ព្រលឹង ប្រធានបណ្ឌិត្យសភាភូមិន្ទយុត្តិធម៌កម្ពុជា ថ្នាក់ដឹកនាំក្រសួងយុត្តិធម៌ និងសមាជិកក្រុមការងារបច្ចេកទេសមកពីសាលាជម្រះក្តីគ្រប់ជាន់ថ្នាក់និងគណ:មេធាវីនៃព្រះរាជាណាចក្រកម្ពុជា។ ចំណែកឯភាគីជប៉ុន មានការចូលរួមពី តំណាងស្ថានទូតជប៉ុនប្រចាំកម្ពុជា សាស្រ្តាចារ្យជប៉ុន ក្រុមជំនាញការ និងទីប្រឹក្សាច្បាប់ JICA មកពីនាយកដ្ឋានកិច្ចសហប្រតិបត្តិការអន្តរជាតិ ICD និងវិទ្យាស្ថានស្រាវជ្រាវ និងបណ្តុះបណ្តាល RTI នៃក្រសួងយុត្តិធម៌ប្រទេសជប៉ុន។ អង្គប្រជុំបានធ្វើការពិនិត្យ និងពិភាក្សាយ៉ាងយកចិត្តទុកដាក់លើរបៀបវារៈសំខាន់ៗរួមមាន៖ ១-របាយការណ៍លទ្ធផលនៃការអនុវត្តគម្រោង និងផែនការសកម្មភាពគម្រោងសម្រាប់ឆ្នាំបន្ទាប់ ២០២៦-២០២៧ ២-កិច្ចពិភាក្សា និងមតិយោបល់ពាក់ព័ន្ធនឹងលទ្ធផល និងផែនការសកម្មភាពឆ្នាំបន្ទាប់ ៣-កិច្ចសហប្រតិបត្តិការលើការងារដោះស្រាយវិវាទក្រៅប្រព័ន្ធតុលាការ និងការធ្វើវិសោធនកម្មក្រមរដ្ឋប្បវេណី និងក្រមនីតិវិធីរដ្ឋប្បវេណី ៤-ពិនិត្យនិងពិភាក្សាលើលទ្ធភាពនៃការបន្តគម្រោងសម្រាប់ជំហានទី ៧ ដោយផ្តោតលើការបណ្តុះបណ្តាលធនធានមនុស្សក្នុងវិស័យុត្តិធម៌ និងការធ្វើវិសោធនកម្មក្រមរដ្ឋប្បវេណី និងក្រមនីតិវិធីរដ្ឋប្បវេណី។