卫生部在实居省开展登革热防治培训 提升基层诊疗水平

ការចុះអភិបាលគាំទ្រ និងតាមដានវឌ្ឍនភាពនៃការគ្រប់គ្រងជំងឺគ្រុនឈាម និងបើកវគ្គបណ្តុះបណ្តាលបច្ចេកទេស នៅខេត្តកំពង់ស្ពឺ។ —— ខេត្តកំពង់ស្ពឺ៖ ថ្ងៃទី១៤ ខែសីហា ឆ្នាំ២០២៦ ឯកឧត្តមទន្តបណ្ឌិត អឿន បូរារ័ត្នន៍ រដ្ឋលេខាធិការក្រសួងសុខាភិបាល បានអញ្ជើញជាអធិបតី ក្នុងពិធីបើកវគ្គបណ្តុះបណ្តាលស្តីពី «ការធ្វើរោគវិនិច្ឆ័យ និងការព្យាបាលជំងឺគ្រុនឈាម» ជូនដល់បុគ្គលិកសុខាភិបាល នៅក្នុងខេត្តកំពង់ស្ពឺ។ វគ្គបណ្តុះបណ្តាលនេះ រៀបចំឡើងក្នុងគោលបំណងធ្វើវិក្រឹតការ ចែករំលែកបទពិសោធន៍ និងពង្រឹងជំនាញបច្ចេកទេសដល់បុគ្គលិកសុខាភិបាល ព្រមទាំងផ្សព្វផ្សាយវិធីសាស្ត្រថ្មីៗ ក្នុងការធ្វើរោគវិនិច្ឆ័យ និងការព្យាបាលជំងឺគ្រុនឈាម ដើម្បីធានាឱ្យការធ្វើរោគវិនិច្ឆ័យមានភាពឆាប់រហ័ស ត្រឹមត្រូវ និងការព្យាបាលមានប្រសិទ្ធភាព សំដៅលើកកម្ពស់គុណភាពសេវាថែទាំ និងសុវត្ថិភាពអ្នកជំងឺ។ ពិធីនេះមានការអញ្ជើញចូលរួមពីថ្នាក់ដឹកនាំមន្ទីរសុខាភិបាល នៃរដ្ឋបាលខេត្តកំពង់ស្ពឺ ក្រុមការងារគ្រូបង្គោលមកពីមន្ទីរពេទ្យគន្ធបុប្ផា និងមន្ទីរពេទ្យបង្អែកខេត្តកំពង់ស្ពឺ ព្រមទាំងមន្ត្រីសុខាភិបាលពាក់ព័ន្ធ មកពីមន្ទីរពេទ្យបង្អែក មន្ទីរពេទ្យបង្អែកស្រុក មណ្ឌលសុខភាព និងក្រុមគ្រូពេទ្យមកពីវិស័យសុខាភិបាលឯកជនផងដែរ។ ក្នុងឱកាសនោះ ឯកឧត្តមរដ្ឋលេខាធិការ បានផ្តល់អនុសាសន៍ដល់សិក្ខាកាមទាំងអស់ ឱ្យយកចិត្តទុកដាក់សិក្សា និងក្រេបចំណេះដឹងពីសាស្ត្រាចារ្យ និងអ្នកជំនាញជំងឺគ្រុនឈាម ដើម្បីពង្រឹងសមត្ថភាពវិជ្ជាជីវៈរបស់ខ្លួន និងក្លាយជាគ្រូបង្គោលនៅតាមមន្ទីរពេទ្យ និងអង្គភាពសុខាភិបាលរៀងៗខ្លួន។ បន្ទាប់មក គ្រូបង្គោលត្រូវបន្តចែករំលែក និងបណ្តុះបណ្តាលបន្តដល់គ្រូពេទ្យ គិលានុបដ្ឋាក និងបុគ្គលិកសុខាភិបាលក្នុងអង្គភាពរបស់ខ្លួន ដើម្បីពង្រឹងគុណភាពនៃការផ្តល់សេវាសុខាភិបាលឱ្យកាន់តែមានប្រសិទ្ធភាព។ ជាមួយគ្នានេះ ឯកឧត្តមរដ្ឋលេខាធិការ បានផ្តល់អនុសាសន៍ដល់ថ្នាក់ដឹកនាំ និងមន្ត្រីនៅគ្រប់មូលដ្ឋានសុខាភិបាល ឱ្យបន្តអនុវត្តការងារអាទិភាព ដូចខាងក្រោម៖ ១.បន្តតាមដាន និងរាយការណ៍ករណីជំងឺគ្រុនឈាមជាប្រចាំ ព្រមទាំងពង្រឹងសកម្មភាពឆ្លើយតបនៅតាមភូមិ និងតំបន់ដែលមានករណីជំងឺខ្ពស់ ឬមានចង្កោមឆ្លងខ្ពស់។ ២.ពង្រឹងគុណភាពនៃការធ្វើរោគវិនិច្ឆ័យ និងការព្យាបាល ដើម្បីកាត់បន្ថយករណីធ្ងន់ និងអត្រាស្លាប់ ព្រមទាំងធានាឱ្យមានស្តុកឱសថ សារធាតុរាវ ឈាម និងសម្ភារៈបរិក្ខារសង្គ្រោះបន្ទាន់គ្រប់គ្រាន់ និងត្រៀមជាស្រេចសម្រាប់ការព្យាបាលអ្នកជំងឺ។ ៣.បន្ត និងពង្រឹងយុទ្ធនាការ «សម្អាតបរិស្ថាន បំបាត់ដង្កូវទឹក និងកម្ចាត់មូសខ្លា» ដោយសហការជាមួយអាជ្ញាធរមូលដ្ឋាន សាលារៀន វត្តអារាម និងសហគមន៍ ដើម្បីកាត់បន្ថយប្រភពកើត និងការចម្លងជំងឺគ្រុនឈាម។ បន្ទាប់ពីពិធីបើកវគ្គបណ្តុះបណ្តាល ឯកឧត្តមរដ្ឋលេខាធិការ និងប្រតិភូអមដំណើរ បានអញ្ជើញចុះពិនិត្យ និងតាមដានការផ្តល់សេវាថែទាំ និងព្យាបាលអ្នកជំងឺគ្រុនឈាមជាក់ស្តែង នៅតាមមន្ទីរពេទ្យបង្អែកខេត្ត និងមន្ទីរពេទ្យបង្អែកស្រុក។ ក្នុងការចុះពិនិត្យនេះ ក្រុមការងារបានផ្តោតការយកចិត្តទុកដាក់លើការងារអាទិភាពមួយចំនួន រួមមាន៖ ១.ការរៀបចំ និងបែងចែកអ្នកជំងឺសម្រាកព្យាបាលនៅក្នុងមន្ទីរពេទ្យ ជាពិសេសអ្នកជំងឺគ្រុនឈាមដែលមានការកើនឡើង ឱ្យសមស្របតាមលក្ខណៈបច្ចេកទេស និងធានាបាននូវសុវត្ថិភាពអ្នកជំងឺ។ ២.ការពង្រឹងប្រព័ន្ធបញ្ជូនអ្នកជំងឺទៅកាន់មន្ទីរពេទ្យដែលមានកម្រិតបច្ចេកទេសខ្ពស់ជាង ឱ្យបានទាន់ពេលវេលា និងមានប្រសិទ្ធភាព ជាពិសេសសម្រាប់ករណីធ្ងន់ ឬករណីដែលត្រូវការការថែទាំជំនាញខ្ពស់។ ៣.ការពង្រឹងកិច្ចសហការជាមួយអាជ្ញាធរដែនដី និងភាគីពាក់ព័ន្ធ ដើម្បីពង្រីកការផ្សព្វផ្សាយ និងអប់រំសុខភាពអំពីវិធានការបង្ការ និងការការពារជំងឺគ្រុនឈាម ជូនប្រជាពលរដ្ឋក្នុងសហគមន៍ឱ្យបានទូលំទូលាយ និងមានប្រសិទ្ធភាពខ្ពស់។ គួរបញ្ជាក់ថា បេសកកម្មចុះតាមដាន និងពិនិត្យវឌ្ឍនភាពនៃការគ្រប់គ្រងជំងឺគ្រុនឈាម នៅខេត្តកំពង់ស្ពឺនេះ មានការចូលរួមអមដំណើរដោយ លោកវេជ្ជបណ្ឌិត ហុក គ្រី ប្រធានមន្ទីរសុខាភិបាល នៃរដ្ឋបាលខេត្តកំពង់ស្ពឺ លោកសាស្ត្រាចារ្យ គី សន់ទី ប្រធានមន្ទីរពេទ្យគន្ធបុប្ផា ព្រមទាំងមន្ត្រីសុខាភិបាល និងភាគីពាក់ព័ន្ធជាច្រើនរូបផងដែរ។ បេសកកម្មនេះ គឺជាផ្នែកមួយនៃការបន្តពង្រឹងការឆ្លើយតបរបស់ប្រព័ន្ធសុខាភិបាលចំពោះជំងឺគ្រុនឈាម ដោយផ្តោតលើការពង្រឹងសមត្ថភាពបុគ្គលិកសុខាភិបាល ការធ្វើរោគវិនិច្ឆ័យ និងព្យាបាលឱ្យបានទាន់ពេលវេលា ការត្រៀមលក្ខណៈសម្ភារៈ និងឱសថ ព្រមទាំងការចូលរួមរបស់សហគមន៍ក្នុងការបង្ការ និងទប់ស្កាត់ការចម្លងជំងឺគ្រុនឈាម។ **🌐**[Website](https://moh.gov.kh/kh/home) 📱[Facebook](https://www.facebook.com/MinistryofHealthofCambodia?mibextid=ZbWKwL) 📱[Telegram](https://t.me/MOHCambodia) 📱[X (twitter)](https://x.com/MohCambodia) 📱[Tiktok](https://www.tiktok.com/@mohcambodia) 📱[YouTube](https://www.youtube.com/@MOHCambodia)