柬埔寨艺术家协会呼吁艺人坚守职业道德 维护文化形象

**ស្ថាប័នអ្នកនាំពាក្យសមាគមសិល្បករខ្មែរ អំពាវនាវដល់សិល្បករ-សិល្បការិនី ប្រកាន់ខ្ជាប់ក្រមសីលធម៌ និងរក្សាតម្លៃសិល្បៈខ្មែរ** **ភ្នំពេញ៖** ស្ថាប័នអ្នកនាំពាក្យសមាគមសិល្បករខ្មែរ បានចេញសារបន្ទាន់មួយជូនចំពោះសិល្បករ សិល្បការិនី និងក្រុមអ្នកផលិតមាតិកាពាក់ព័ន្ធ ដោយអំពាវនាវឱ្យប្រកាន់ខ្ជាប់ក្រមសីលធម៌ វិជ្ជាជីវៈ និងភាពថ្លៃថ្នូរ ដើម្បីរួមគ្នាថែរក្សាតម្លៃសិល្បៈ និងវប្បធម៌ជាតិ។ តាមសារនោះ ស្ថាប័នអ្នកនាំពាក្យបានលើកឡើងថា សិល្បៈមិនមែនជាមធ្យោបាយសម្រាប់ស្វែងរកប្រជាប្រិយភាព ឬផលប្រយោជន៍ត្រឹមតែមួយពេលនោះទេ ប៉ុន្តែជាបេតិកភណ្ឌដែលត្រូវការការថែរក្សា ការពារ និងការទទួលខុសត្រូវចំពោះសង្គម និងជាតិ។ ជាមួយគ្នានេះ ស្ថាប័នបានអំពាវនាវឱ្យសិល្បករ-សិល្បការិនី និងអ្នកផលិតមាតិកាទាំងអស់ ជៀសវាងការប្រើភាពសិចស៊ីជ្រុលហួសហេតុ ឬសកម្មភាពដែលមិនសមរម្យ និងអសីលធម៌ ដើម្បីទាក់ទាញការចាប់អារម្មណ៍ ឬស្វែងរកភាពល្បីល្បាញក្នុងរយៈពេលខ្លី ដែលអាចប៉ះពាល់ដល់តម្លៃ កិត្តិយស និងកេរ្តិ៍ឈ្មោះរបស់ខ្លួន ព្រមទាំងប៉ះពាល់ដល់មុខមាត់សិល្បៈ និងវប្បធម៌ដ៏ល្អផូរផង់របស់កម្ពុជា។