干拉省警方下乡办理身份证 提升基层服务效率

បន្តផ្តល់សេវាធ្វើអត្តសញ្ញាណប័ណ្ណជូនប្រជាពលរដ្ឋនៅតាមមូលដ្ឋាន ដើម្បីបង្កើនភាពងាយស្រួល និងកាត់បន្ថយការលំបាក... នាថ្ងៃទី២៥ ខែសីហា ឆ្នាំ២០២៦ ដោយអនុវត្តតាមបទបញ្ជារបស់លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្ដាល និងក្រោមការបញ្ជាផ្ទាល់ពីលោក ព្រុំ សំណាង អធិការនគរបាលស្រុកកៀនស្វាយ ក្រុមការងារផ្នែកអត្តសញ្ញាណកម្មស្រុកកៀនស្វាយ បានបន្តចុះបំពេញសំណុំបែបបទ និងថតធ្វើអត្តសញ្ញាណប័ណ្ណសញ្ជាតិខ្មែរ ជូនប្រជាពលរដ្ឋនៅតាមផ្ទះ និងតាមមូលដ្ឋាននានាក្នុងស្រុកកៀនស្វាយ។ ការចុះផ្តល់សេវាដោយផ្ទាល់ដល់មូលដ្ឋាននេះ មានគោលបំណងបង្កើនភាពងាយស្រួល និងកាត់បន្ថយការចំណាយពេលវេលា ក៏ដូចជាការធ្វើដំណើររបស់ប្រជាពលរដ្ឋ ព្រមទាំងជួយធានាឱ្យប្រជាពលរដ្ឋមានឯកសារសម្គាល់អត្តសញ្ញាណត្រឹមត្រូវ សម្រាប់ប្រើប្រាស់ក្នុងការបំពេញតម្រូវការផ្សេងៗតាមផ្លូវច្បាប់។ សកម្មភាពនេះក៏ជាការបង្ហាញពីការយកចិត្តទុកដាក់របស់កម្លាំងនគរបាល ក្នុងការបម្រើសេវាសាធារណៈជូនប្រជាពលរដ្ឋឱ្យកាន់តែមានប្រសិទ្ធភាព រហ័ស និងឆ្លើយតបទៅនឹងតម្រូវការរបស់ប្រជាពលរដ្ឋនៅមូលដ្ឋាន។ សម្រាប់ព័ត៌មានបន្ថែម និងទំនាក់ទំនងទៅកាន់ផ្នែកអត្តសញ្ញាណកម្ម សូមទាក់ទងតាមទូរសព្ទ៖ ☎️097 232 3989 / 097 358 8895៕ (ពីខ្ញុំប៊ុនធឿនហៅខ្លាពីរ)