柬埔寨司法部代表团赴新加坡参加“新加坡法律周”及“首席法律顾

ឯកឧត្តម នាក់ សើគីរីន រដ្ឋលេខាធិការក្រសួងយុត្តិធម៌ ដឹកនាំគណៈប្រតិភូកម្ពុជា ចូលរួមក្នុងព្រឹត្តិការណ៍សប្តាហ៍នៃអនុសញ្ញាសិង្ហបុរី (Singapore Convention Week) និងវេទិកាប្រធានក្រុមអ្នកប្រឹក្សាច្បាប់ (Chief Legal Advisors Forum) ២០២៦ នៅប្រទេសសិង្ហបុរី ===================== ប្រទេសសិង្ហបុរី៖ នាថ្ងៃអង្គារ ដល់ថ្ងៃព្រហស្បតិ៍ ១២ ដល់ ១៤កើត ខែស្រាពណ៍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២៥ ដល់ ២៧ ខែសីហា ឆ្នាំ២០២៦ ដោយទទួលបានការអនុញ្ញាតដ៏ខ្ពង់ខ្ពស់ពីឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្រ្តីក្រសួងយុត្តិធម៌ ឯកឧត្តម នាក់ សើគីរីន រដ្ឋលេខាធិការក្រសួងយុត្តិធម៌ អមដោយឯកឧត្តមបណ្ឌិត ឃ្លោក ដារ៉ា ប្រតិភូរាជរដ្ឋាភិបាល និងជាអគ្គនាយកនៃអគ្គនាយកដ្ឋានកិច្ចការអន្តរជាតិ និងអភិវឌ្ឍន៍វិស័យយុត្តិធម៌ និងឯកឧត្តម យ៉ម ផារ៉ូត ប្រតិភូរាជរដ្ឋាភិបាល និងជាអគ្គលេខាធិការនៃអាជ្ញាធរជាតិដោះស្រាយវិវាទក្រៅប្រព័ន្ធតុលាការ បានចូលរួមក្នុងព្រឹត្តិការណ៍សប្តាហ៍នៃអនុសញ្ញាសិង្ហបុរី (Singapore Convention Week) និងវេទិកាប្រធានក្រុមអ្នកប្រឹក្សាច្បាប់ (Chief Legal Advisors Forum) ឆ្នាំ២០២៦ នៅប្រទេសសិង្ហបុរី។ សម្រាប់ព្រឹត្តិការណ៍សប្តាហ៍នៃអនុសញ្ញាសិង្ហបុរី និង UNCITRAL Academy អង្គប្រជុំបានផ្តោតការយកចិត្តទុកដាក់លើការធ្វើសមាហរណកម្មបច្ចេកវិទ្យាបញ្ញាសិប្បនិម្មិត (AI) ទៅក្នុងវិស័យច្បាប់ និងសន្ធានកម្ម (The AI-Enabled Mediation) ព្រមទាំងការចែករំលែកបទពិសោធន៍ និងវឌ្ឍនភាពឆ្ពោះទៅរកការចូលជាសមាជិកនៃអនុសញ្ញាសិង្ហបុរីស្តីពីសន្ធានកម្ម (Singapore Convention on Mediation -SCM) ពីបណ្តាប្រទេសនានា។ ទន្ទឹមគ្នានេះ វេទិកាប្រធានក្រុមអ្នកប្រឹក្សាច្បាប់ ត្រូវបានរៀបចំឡើងក្រោមមូលបទ «រដ្ឋ និងវិវាទពាក់ព័ន្ធនឹងការវិនិយោគ ៖ អ្វីដែលនឹងកើតឡើងនៅពេលខាងមុខ (States and Investment Disputes - What lies ahead)»។ វេទិកានេះមានគោលបំណងប្រមូលផ្តុំប្រធានក្រុមអ្នកប្រឹក្សាច្បាប់នៃរដ្ឋាភិបាលជុំវិញពិភពលោក ដែលជាអ្នកធ្វើសេចក្តីសម្រេចចិត្តគន្លឹះលើបញ្ហាវិវាទរវាងរដ្ឋនិងវិនិយោគិន តាមរយៈវេទិកាកម្រិតខ្ពស់ ដើម្បីជួបពិភាក្សាអំពីបញ្ហាប្រឈម និន្នាការចុងក្រោយ និងការផ្លាស់ប្តូរគំនិត ព្រមទាំងឧត្តមានុវត្តន៍ក្នុងការដោះស្រាយវិវាទនេះ។ បន្ថែមពីនេះ កិច្ចប្រជុំក៏បានផ្តោតការយកចិត្តទុកដាក់លើការពិនិត្យមើលពីការវិវត្តនៃវិធីសាស្ត្រថ្មីៗ (Novel approaches) ក្នុងការដោះស្រាយបញ្ហាប្រឈមបច្ចុប្បន្ន ដែលរដ្ឋនានាជួបប្រទះក្នុងវិវាទពាក់ព័ន្ធរដ្ឋនិងអ្នកវិនិយោគ និងការពិចារណាលើសំណើកែទម្រង់ផ្សេងៗ ដើម្បីឆ្លើយតបឱ្យកាន់តែប្រសើរឡើងទៅនឹងតម្រូវការរួម។