柬埔寨劳工部向桑园区寺庙捐赠物资

ក្រុមការងាររាជរដ្ឋាភិបាលចុះមូលដ្ឋានខណ្ឌចំការមន នាំយកទៀនព្រះវស្សា និងទេយ្យទានប្រគេនព្រះសង្ឃគង់ចាំព្រះវស្សានៅវត្តចំនួន ៤ ក្នុងខណ្ឌចំការមន រាជធានីភ្នំពេញ (ភ្នំពេញ)៖ លោកជំទាវ ស៊ើង សរសុចិត្តា រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ហេង សួរ រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ និងជាប្រធានក្រុមការងាររាជរដ្ឋាភិបាលចុះមូលដ្ឋានខណ្ឌចំការមន ព្រមទាំងសមាជិកក្រុមការងាររាជរដ្ឋាភិបាល ក្រុមប្រឹក្សាខណ្ឌ និងគណៈអភិបាលខណ្ឌចំការមន បាននាំយកទៀនព្រះវស្សា និងទេយ្យទានប្រគេនព្រះសង្ឃ និមន្តមកពីវត្តចំនួន៤ ក្នុងខណ្ឌ រួមមាន វត្តថាន់ វត្តស្វាយពពែ វត្តទួលទំពូង និងវត្តប្រយូរវង្ស និងជូនយាយជីតាជី និងអាចារ្យ លោកយាយលោកតាជាពុទ្ធបរិស័ទ នៅវត្តនួនមណីរាម ហៅវត្តថាន់ ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ នាព្រឹកថ្ងៃសុក្រ ទី២១ ខែសីហា ឆ្នាំ២០២៦។ ទេយ្យទាន និងបច្ច័យរបស់ក្រសួង និងរដ្ឋបាលខណ្ឌ ដែលបានប្រគេនវត្តនីមួយៗ រួមមាន៖ ទៀនចំណាំព្រះវស្សា ២គូ សំពត់ងូតទឹកភ្លៀង៥ ប្រេងឥន្ធនៈ ៤០លីត្រ សាដកនិងបរិក្ខារ ៥ឈុត ទៀនក្រមួនឃ្មុំ ធូបមាស អង្ករ ២០០ គីឡូក្រាម មី ៩កេស ត្រីខ ១កេស ទឹកដោះគោខាប់ ១កេស ទឹកបរិសុទ្ធ ៩កេស ទឹកក្រូច ៩កេស ចង្ហាន់ កន្ត្រកផ្លែឈើ ស្ករស តែ ទឹកត្រី ទឹកស៊ីអ៊ីវ បច្ច័យវារកភត្ត និងបច្ច័យបួនមួយចំនួនទៀត។ ការប្រគេនទៀនព្រះវស្សា និងទេយ្យទានទាំងនេះ គឺជាការរួមចំណែកទ្រទ្រង់ដល់ព្រះសង្ឃ ដែលត្រូវគង់ចាំព្រះវស្សាអស់កាលត្រីមាសក្នុងពុទ្ធសីមា។ នាឱកាសនោះ លោកជំទាវ ក្រុមការងារ និងពុទ្ធបរិស័ទទាំងអស់បានវេរទេយ្យទានទាំងអស់ប្រគេនព្រះសង្ឃ ដែលគង់ចាំព្រះវស្សាអស់កាលត្រីមាសតាមព័ទ្ធសីមាវត្តទាំង៤ប្រកបដោយសទ្ធាជ្រះថ្លាបំផុត ហើយក៏បានឧទ្ទិសកុសលផលបុណ្យដែលបានកសាងនាពេលនេះ ជូនដល់ដួងវិញ្ញាណក្ខន្ធញាតកាទាំងប្រាំពីរសន្តាន និងវីរកងទ័ព ព្រមទាំងវីរកងនគរបាលជាតិទាំងអស់ ដែលបានពលីជីវិតក្នុងបុព្វហេតុការពារបូរណភាពទឹកដី និងប្រជាជនកម្ពុជា។ ពិធីបុណ្យចូលព្រះវស្សា គឺជាពិធីបុណ្យមួយដ៏មានសារៈសំខាន់ក្នុងព្រះពុទ្ធសាសនា និងជាពេលវេលាដ៏សំខាន់សម្រាប់ភិក្ខុសង្ឃ និងសាមណេរបានរៀនធម៌ និងវិន័យយ៉ាងខ្ជាប់ខ្ជួនតាមពុទ្ធោវាទ។ ពុទ្ធបរិស័ទតែងតែនាំគ្នាប្រារព្ធពិធីបុណ្យនេះ ដោយនាំយកទៀនព្រះវស្សា និងទេយ្យទានចាំបាច់ផ្សេងៗទៅប្រគេនព្រះសង្ឃតាមលទ្ធភាព និងសទ្ធាជ្រះថ្លារៀងៗខ្លួន៕ #MLVT #HENGSour