实居省一工厂因环保违规被勒令关闭 涉及60户家庭安置

ប្រជាពលរដ្ឋភូមិត្រពាំងរុន ឃុំដំណាក់រាំងសម្តែងការអរគុណ និងគាំទ្រឯកឧត្តមឧបនាយករដ្ឋមន្រ្តី ហ៊ុន ម៉ានី ចំពោះការដោះស្រាយសំណូមពរប្រជាជនរបស់ក្រុមការងារ អាជ្ញាធរស្រុក និងឃុំ ដើម្បីធានាផលប្រយោជន៍និងសុខុមាលភាពជាក់ស្តែងសម្រាប់សហគមន៍។ ======== ខេត្តកំពង់ស្ពឺ៖ នារសៀលថ្ងៃច័ន្ទ ១រោច ខែជេស្ឋ ឆ្នាំមមី អដ្ឋស័ក ព.ស. ២៥៧០ ត្រូវនឹងថ្ងៃទី១ ខែមិថុនា ឆ្នាំ២០២៦ ក្រុមការងារមូលដ្ឋានឃុំដំណាក់រាំងបានចុះជួបសំណេះសំណាលជាមួយប្រជាពលរដ្ឋចំនួន ៦០គ្រួសារ នៅភូមិត្រពាំងរុន ឃុំដំណាក់រាំង ដើម្បីផ្សព្វផ្សាយអំពីការបិទដំណើរការរោងចក្រប្រេងខ្មៅតាមសេចក្តីសម្រេចលេខ ២០៧៥ ឧបវន ចុះថ្ងៃទី២៨ ខែឧសភា ឆ្នាំ២០២៦ របស់ក្រសួងឧស្សាហកម្ម ដោយមានការចូលរួមពឍិលោកអភិបាលស្រុក លោកមេឃុំ មេភូមិ ផងដែរ។ ក្នុងឱកាសនេះ ក្រុមការងារបានពន្យល់យ៉ាងច្បាស់អំពីមូលហេតុនៃការបិទរោងចក្រ ដែលផ្អែកលើការព្រួយបារម្ភអំពីផលប៉ះពាល់ដល់បរិស្ថាន សុខភាពប្រជាពលរដ្ឋ និងគុណភាពជីវិតនៅក្នុងសហគមន៍។ ការអនុវត្តសេចក្តីសម្រេចនេះ គឺជាជំហានសំខាន់ក្នុងការពារសុខុមាលភាពប្រជាពលរដ្ឋ និងធានាបាននូវបរិស្ថានរស់នៅដែលមានសុវត្ថិភាព និងស្អាតបរិសុទ្ធ ពិសេសពង្រឹងការគោរពនូវបទដ្ឋានរបស់រាជរដ្ឋាភិបាលចំពោះរោងចក្រសហគ្រាស។ ក្រៅពីការផ្សព្វផ្សាយ ក្រុមការងារក៏បានស្ដាប់យ៉ាងយកចិត្តទុកដាក់នូវសំណូមពរ និងបញ្ហាប្រឈមនានារបស់ប្រជាពលរដ្ឋ ដើម្បីយកទៅពិនិត្យ និងសម្របសម្រួលដោះស្រាយឱ្យបានសមស្របតាមគោលនយោបាយរបស់រាជរដ្ឋាភិបាល។ ប្រជាពលរដ្ឋបានសម្តែងការគាំទ្រ និងសំណូមពរឱ្យអាជ្ញាធរបន្តតាមដានការអនុវត្ត និងធានាថាមានដំណោះស្រាយជាក់ស្តែងសម្រាប់សហគមន៍។ ក្នុងឱកាសនោះ ក្នុងនាមក្រុមការងារ ខ្ញុំបានជូនជាទស្សនទានមួយចំនួន ដើម្បីរួមចំណែកដល់ការរួមគ្នាធានាបាននូវការអនុវត្តគោលនយោបាយរបស់រាជរដ្ឋាភិបាលប្រកបដោយប្រសិទ្ធភាព និងមានការចូលរួម : ១. ពង្រឹងការពារបរិស្ថាន និងសុខភាពសាធារណៈដោយត្រូវបន្តត្រួតពិនិត្យ និងអនុវត្តច្បាប់យ៉ាងម៉ឺងម៉ាត់ ដើម្បីធានាបាននូវបរិស្ថានរស់នៅស្អាត និងមានសុវត្ថិភាព។ ២. លើកកម្ពស់ការចូលរួមរបស់ប្រជាពលរដ្ឋដោយជំរុញឱ្យមានការចូលរួមរបស់ប្រជាពលរដ្ឋចូលរួមរាយការណ៍ បញ្ហាបរិស្ថាន និងរួមគ្នាថែរក្សាភូមិឃុំឱ្យមានសុវត្ថិភាព និងអនាម័យល្អ។ ៣. ស្វែងរកដំណោះស្រាយជីវភាពជំនួសដោយយកចិត្តទុកដាក់លើជីវភាពប្រជាពលរដ្ឋ ដែលអាចរងផលប៉ះពាល់ ដោយជំរុញឱកាសការងារ និងអភិវឌ្ឍជំនាញថ្មីៗ។ ៤. ពង្រឹងទំនាក់ទំនងអាជ្ញាធរនិងប្រជាជនដោយបន្តការចុះជួបផ្ទាល់ ស្តាប់មតិយោបល់ និងដោះស្រាយបញ្ហាដោយស្មារតីទទួលខុសត្រូវ និងសុចរិតភាព។