洪森亲王辟谣国家财政危机 强调储备金充足

សម្តេចតេជោ ហ៊ុន សែន ឆ្លើយតបក្រុមអ្នកវិភាគក្រៅប្រទេស៖ កម្ពុជាមានទុនបម្រុងរាប់ពាន់លានដុល្លារ មិនមែនខ្វះខាតថវិកាដូចការមួលបង្កាច់ឡើយ … ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានចេញមុខប្រតិកម្មយ៉ាងខ្លាំងទៅលើក្រុមអ្នករិះគន់ជ្រុលនិយមមួយចំនួននៅក្រៅប្រទេស ដែលតែងតែមួលបង្កាច់ថា រាជរដ្ឋាភិបាលកម្ពុជាជួបវិបត្តិហិរញ្ញវត្ថុ រហូតដល់ត្រូវបោះពុម្ពក្រដាសប្រាក់ថ្មីប្រើប្រាស់។ សម្តេចតេជោបានលើកឡើងក្នុងសារយ៉ាងច្បាស់ថា ការចេញមុខបកស្រាយនេះ គឺដើម្បីកុំឱ្យប្រជាពលរដ្ឋមានការភ័ន្តច្រឡំចំពោះការឃោសនាបោកប្រាស់របស់ក្រុមប្រឆាំងមួយក្តាប់តូច។ សម្តេចបានសង្កត់ធ្ងន់ថា រាល់ពេលដែលរាជរដ្ឋាភិបាលដាក់ឱ្យចរាចរក្រដាសប្រាក់ថ្មីម្តងៗ ក្រុមអ្នករិះគន់ទាំងនោះតែងតែលើកឡើងដដែលៗថា រដ្ឋអស់លុយទើបត្រូវបោះពុម្ពក្រដាសប្រាក់ថ្មី។ ដើម្បីបញ្ជាក់ពីភាពរឹងមាំនៃសេដ្ឋកិច្ចជាតិ សម្តេចតេជោ ហ៊ុន សែន បានបើកបង្ហាញទិន្នន័យជាក់ស្តែងថា សាច់ប្រាក់ក្នុងរតនាគារជាតិមានមិនក្រោម ២,៥០០ លានដុល្លារអាមេរិកនោះទេ។ ខណៈដែលការចំណាយលើបៀវត្សមន្ត្រីរាជការមានត្រឹមតែ ២៣០ លានដុល្លារក្នុងមួយខែប៉ុណ្ណោះ។ បន្ថែមពីនេះ ចំណូលក្នុងរយៈពេល ៩ ខែ មានជាង ៥,០០០ លានដុល្លារ ដែលជាមធ្យមទទួលបាន ៥០០ ទៅ ៦០០ លានដុល្លារក្នុងមួយខែ ដែលចំនួននេះគឺគ្រប់គ្រាន់សម្រាប់ចំណាយ និងរក្សាទុកទុនបម្រុងក្នុងរតនាគារឱ្យនៅថេរក្នុងកម្រិតលើសពី ២,៥០០ លានដុល្លារ។ ក្នុងឱកាសនេះ សម្តេចតេជោក៏បានទម្លាយរឿងអាស្រូវរបស់ក្រុមអ្នករិះគន់នៅក្រៅប្រទេស ដែលបានយកលុយរៃអង្គាសពីសប្បុរសជនក្រោមលេសជួយដល់ជនភៀសខ្លួន ទៅប្រើប្រាស់ខុសគោលដៅ។ សម្តេចបញ្ជាក់ថា លុយដែលប្រមូលបានពី «វត្តភ្នំសេរី» គឺមិនបានទៅដល់ដៃជនភៀសខ្លួនឡើយ ប៉ុន្តែត្រូវបានគេយកទៅចិញ្ចឹមគណបក្សនយោបាយមួយនៅក្នុងស្រុកទៅវិញ។ សម្តេចបានប្រកាសថា នឹងត្រៀមបង្ហោះសារសំឡេងនៃការប្រជុំដែលនិយាយពីការបង្វែរលុយនេះនៅពេលខាងមុខ។ ជាចុងក្រោយ សម្តេចតេជោបានរិះគន់ចំៗទៅលើក្រុមអ្នកប្រឆាំងទាំងនោះថា ជាក្រុមបោកប្រាស់ និងបានដាស់តឿនថា៖ «បើចេះត្រូវចេះឱ្យគេកោត តែបើឆោតគឺត្រូវឆោតឱ្យគេអាណិត»។ សម្តេចបានបញ្ជាក់ដោយកំប្លែងថា ប្រសិនបើក្រុមទាំងនោះជឿថា រដ្ឋាភិបាលនឹងអស់លុយមែន ពួកគេគួរតែអបអរសាទរទៅវិញទេ ព្រោះវានឹងធ្វើឱ្យរដ្ឋាភិបាលឆាប់ដួលរលំ ហើយពួកគេនឹងបានត្រឡប់មកកាន់អំណាចដូចដែលពួកគេស្រមៃចង់បានជារៀងរាល់ថ្ងៃ៕