暹粒良好治理论坛圆满闭幕 推动公共服务数字化改革

វេទិកាស្តីពីអភិបាលកិច្ចល្អ ក្រោមមូលបទ «នវានុវត្តន៍សម្រាប់ការផ្តល់សេវាសាធារណៈឱ្យកាន់តែប្រសើរឡើង» បានបិទបញ្ចប់ដោយជោគជ័យ ក្រោយការពិភាក្សាយ៉ាងផុសផុលចំនួន ៣វគ្គ សៀមរាប៖ វេទិកាស្តីពីអភិបាលកិច្ចល្អ ក្នុងក្របខ័ណ្ឌនៃកិច្ចប្រជុំកិច្ចសហប្រតិបត្តិការអាស៊ាន ស្តីពីកិច្ចការមុខងារសាធារណៈលើកទី២៣ (23rd ACCSM) និងអាស៊ានបូកបីលើកទី៨ (8th ACCSM+3) ក្រោមមូលបទ «នវានុវត្តន៍សម្រាប់ការផ្តល់សេវាសាធារណៈឱ្យកាន់តែប្រសើរឡើង» បានបិទបញ្ចប់ដោយជោគជ័យគួរឱ្យកត់សម្គាល់ នាថ្ងៃទី០៤ ខែសីហា ឆ្នាំ២០២៦ ក្រោមអធិបតីភាពដ៏ខ្ពង់ខ្ពស់របស់ ឯកឧត្តម យក់ ប៊ុនណា រដ្ឋលេខាធិការប្រចាំការនៃក្រសួងមុខងារសាធារណៈ នៅសណ្ឋាគារសុខា សៀមរាប។ ថ្លែងក្នុងពិធីបិទវេទិការ ឯកឧត្តម យក់ ប៊ុនណា បានបង្ហាញសេចក្ដីសោមនស្សបំផុតដែលបានឃើញស្មារតីនៃកិច្ចសហប្រតិបត្តិការ ការរៀនសូត្រពីគ្នាទៅវិញទៅមក និងការចែករំលែកដោយបើកចំហនៅក្នុងវេទិកានាព្រឹកនេះ។ ឯកឧត្តម ក៏បានបន្តថា ស្មារតីនេះ នឹងកសាងបានជាមូលដ្ឋានដ៏រឹងមាំបន្ថែមទៀត សម្រាប់ការពង្រឹង និងពង្រីកកិច្ចសហប្រតិបត្តិការ ក្នុងវិស័យមុខងារសាធារណៈរវាងបណ្តាប្រទេសសមាជិកអាស៊ាន និងអាស៊ានបូកបី នាពេលអនាគត សំដៅរួមចំណែកអភិវឌ្ឍរដ្ឋបាលសាធារណៈឱ្យកាន់តែមានភាពធន់ ប្រសិទ្ធភាព និងត្រៀមខ្លួនកាន់តែប្រសើរ ក្នុងការឆ្លើយតបនឹងការប្រែប្រួលនានា ដែលពិបាកប៉ាន់ប្រមាណជាមុន។ វេទិកាដ៏មានសារៈសំខាន់នេះ បានប្រព្រឹត្តទៅដោយរលូន តាមរយៈការកសាងបរិយាកាសជជែកដេញដោល និងចែករំលែកបទពិសោធយ៉ាងស៊ីជម្រៅតាមរយៈបទបង្ហាញជាយុទ្ធសាស្ត្រចំនួន ៣វគ្គផ្ដោតលើ៖ វគ្គទី១.ផ្តោតទៅលើការអនុវត្តប្រកបដោយនវានុវត្តន៍ នៅក្នុងក្របខ័ណ្ឌនៃការផ្តល់សេវាសាធារណៈ, វគ្គទី២.ផ្តោតទៅលើការប្រើប្រាស់ឌីជីថល ជាឧបករណ៍ជំរុញ នៅក្នុងក្របខ័ណ្ឌនៃការផ្តល់សេវាសាធារណៈ និងវគ្គទី៣.ផ្តោតទៅលើនិន្នាការប្រែប្រួលថ្មីៗ និងដំណោះស្រាយប្រកបដោយនវានុវត្តន៍ នៅក្នុងក្របខ័ណ្ឌនៃការផ្តល់សេវាសាធារណៈ។ លើសពីនេះ ឯកឧត្តម យក់ ប៊ុនណា បានបញ្ជាក់ថា ក្នុងនាមជាប្រធានប្តូរវេនរៀបចំកិច្ចប្រជុំ ក្រសួងមុខងារសាធារណៈកម្ពុជា នឹងរៀបចំចងក្រងនូវលទ្ធផលសំខាន់ៗ រួមមាន គំនិតផ្តួចផ្តើមថ្មីៗ អនុសាសន៍ និងឧត្តមានុវត្តន៍នានា ដែលបានចែករំលែកនៅក្នុងវេទិកានេះ ដើម្បីផ្សព្វផ្សាយជូនដល់ប្រទេសដែលបានចូលរួមទាំងអស់ សម្រាប់ជាឯកសារយោង និងជាមូលដ្ឋាន ក្នុងការបន្តជំរុញកិច្ចសហប្រតិបត្តិការបន្ថែមទៀតនាពេលអនាគត។ ជារួម ផ្អែកទៅលើវេទិកាដែលយើងបានពិភាក្សានាព្រឹកនេះ យើងអាចឃើញថា ការកែទម្រង់រដ្ឋបាលសាធារណៈ គឺផ្តើមចេញពីប្រជាជន យកមនុស្សជាចំបង។ ការធ្វើកំណែទម្រង់នវានុវត្តន៍ ដោយប្រើប្រាស់បច្ចេកវិទ្យា ការកែលម្អស្ថាប័ន ការកែលម្អអភិក្រមការងារ គឺក្នុងគោលដៅតែមួយគត់ គឺដើម្បីប្រជាជន។ ឯកឧត្តមបានថ្លែងអំណរគុណយ៉ាងជ្រាលជ្រៅចំពោះវត្តមានដ៏ឧត្តុង្គឧត្តមរបស់ប្រតិភូ ACCSM និង ACCSM+3 លេខាធិការដ្ឋានអាស៊ាន មន្ត្រីជាន់ខ្ពស់ និងមន្ត្រីបង្គោល ACCSM និង ACCSM+3 ថ្នាក់ដឹកនាំក្រសួង-ស្ថាប័នថ្នាក់ជាតិ និងថ្នាក់ក្រោមជាតិ ភ្ញៀវកិត្តិយសជាតិ និងអន្តរជាតិ​ទាំងអស់ ដែលបានចូលរួមយ៉ាងសកម្ម និងបានរួមចំណែកធ្វើឱ្យវេទិកានាព្រឹកនេះ ប្រព្រឹត្តទៅដោយរលូន ប្រកបដោយផ្លែផ្កា និងទទួលបានលទ្ធផលជាទីមោទនៈ៕ #23ACCSM #ACCSMCambodia #ACCSMPlus3Cambodia #PublicServiceReformKH #ASEANCivilService #BetterServiceDelivery