柬埔寨司法部与韩国驻柬大使馆举行工作会谈

ឯកឧត្តមបណ្ឌិត ជិន ម៉ាលីន រដ្ឋមន្ត្រីស្តីទីនៃក្រសួងយុត្តិធម៌ បានអញ្ជើញជួបពិភាក្សាការងារជាមួយតំណាងស្ថានទូតសាធារណរដ្ឋកូរ៉េ ប្រចាំព្រះរាជាណាចក្រកម្ពុជា ==================== នាព្រឹកថ្ងៃចន្ទ ៨កើត ខែអស្សុជ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១៩ ខែតុលា ឆ្នាំ២០២៦ ឯកឧត្តមបណ្ឌិត ជិន ម៉ាលីន រដ្ឋមន្ត្រីស្តីទីនៃក្រសួងយុត្តិធម៌ បានអញ្ជើញជួបពិភាក្សាការងារជាមួយតំណាងស្ថានទូតសាធារណរដ្ឋកូរ៉េ ប្រចាំព្រះរាជាណាចក្រកម្ពុជា នៅទីស្តីការក្រសួងយុត្តិធម៌។ ជំនួបនេះបានប្រព្រឹត្តទៅក្នុងបរិយាកាសស្និទ្ធស្នាល និងយោគយល់គ្នាខ្ពស់ ដោយភាគីទាំងពីរបានផ្លាស់ប្ដូរយោបល់ និងពិភាក្សាលើកិច្ចសហប្រតិបត្តិការក្នុងវិស័យច្បាប់ និងយុត្តិធម៌ កម្ម្មវិធីបណ្តុះបណ្តាលនិងពង្រឹងសមត្ថភាពរបស់មន្រ្តីក្រសួងយុត្តិធម៌កម្ពុជានៅប្រទេសកូរ៉េ ព្រមទាំងការពង្រឹងទំនាក់ទំនងទ្វេភាគី ដើម្បីបន្តលើកកម្ពស់កិច្ចសហការល្អរវាងកម្ពុជា-កូរ៉េ ឱ្យកាន់តែរឹងមាំ និងមានប្រសិទ្ធភាពបន្ថែមទៀត សមាសភាពកិច្ចជំនួបខាងលើរួមមាន៖ ១- ភាគីកម្ពុជា ដឹកនាំដោយ ឯកឧត្តមបណ្ឌិត ជិន ម៉ាលីន រដ្ឋមន្ត្រីស្តីទីនៃក្រសួងយុត្តិធម៌, ឯកឧត្តម យ៉ម ផារ៉ូត ប្រតិភូរាជរដ្ឋាភិបាល និងជាអគ្គនាយកនៃអគ្គនាយកដ្ឋានកិច្ចការរដ្ឋប្បវេណី, ឯកឧត្តម ឃ្លោក ដារ៉ា ប្រតិភូរាជរដ្ឋាភិបាល និងជាអគ្គនាយកនៃអគ្គនាយកដ្ឋានកិច្ចការអន្តរជាតិ និងអភិវឌ្ឍន៍វិស័យយុត្តិធម៌, ព្រមទាំងជំនួយការ។ ២- ភាគីតំណាងស្ថានទូតសាធារណរដ្ឋកូរ៉េ ដឹកនាំដោយ លោកជំទាវ** Her Insun** អនុប្រធានបេសកកម្ម (Deputy Chief of Mission) នៃស្ថានទូតសាធារណរដ្ឋកូរ៉េ និងលោក** Kim Inchul** លេខាធិការទី២ និងជាកុងស៊ុល (Second Secretary and Consul) នៃស្ថានទូតសាធារណរដ្ឋកូរ៉េ, រួមទាំងមន្ត្រីស្ថានទូតផងដែរ។