柬埔寨公务员选拔引入反腐败单位监督 确保公平

អនុគណៈកម្មការត្រួតពិនិត្យនិងវាយតម្លៃ បំពេញភារកិច្ចយ៉ាងហ្មត់ចត់គ្រប់ដំណាក់កាល ដើម្បីធានាបាននូវគុណាធិបតេយ្យ តម្លាភាព និងយុត្តិធម៌ នៅក្នុងដំណើរការរៀបចំការប្រឡងប្រជែងជ្រើសរើសមន្ត្រី ដែលដឹកនាំដោយក្រសួងមុខងារសាធារណៈ ក្រៅពីការចូលរួមសង្កេតការណ៍ពីអង្គភាពប្រឆាំងអំពើពុករលួយ (ACU) ព្រមទាំងតំណាងសាកលវិទ្យាល័យ និងសាធារណជនស្ម័គ្រចិត្ត ក៏មានអនុគណៈកម្មការត្រួតពិនិត្យ និងវាយតម្លៃ ដែលតែងតែតាមដានត្រួតពិនិត្យនូវរាល់គ្រប់សកម្មភាព និងគ្រប់ដំណាក់កាលទាំងអស់ ដើម្បីធានាសុក្រឹតភាព តម្លាភាព និងយុត្តិធម៌។ សម្រាប់ដំណើរការប្រឡងលើវិញ្ញាសាសួរផ្ទាល់មាត់ក្នុងថ្ងៃនេះ ក្រុមការងារអនុគណៈកម្មការត្រួតពិនិត្យ និងវាយតម្លៃ បានអនុវត្តការងារយ៉ាងហ្មត់ចត់ និងប្រកាន់ខ្ជាប់នូវតួនាទី ភារកិច្ចរបស់ខ្លួនទៅតាមគោលដៅរៀងៗខ្លួនជាប់ជាប្រចាំ ចាប់តាំងពីដំណាក់កាលរៀបចំដំបូង ដំណាក់កាលដំណើរការប្រឡង ការបូកស្រង់ផ្ទៀងផ្ទាត់ពិន្ទុ រហូតដល់ការប្រកាសលទ្ធផលជូនបេក្ខជន។ ការបំពេញភារកិច្ចនេះ គឺដើម្បីធានាបាននូវរាល់ការអនុវត្តការងារ សម្រាប់ប្រឡងប្រជែងឱ្យមានភាពរលូន ល្អប្រសើរ និងត្រឹមត្រូវតាមស្តង់ដា SOP ព្រមទាំងធានាការសម្រេចបាននូវគោលការណ៍គុណាធិបតេយ្យ តម្លាភាព យុត្តិធម៌ បរិយាបន្ន និងប្រសិទ្ធភាព។