柬埔寨司法部启动第二届技术合同官员法律培训 30人入选

ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាប្រធានក្រុមប្រឹក្សាភិបាលនៃបណ្ឌិត្យសភាភូមិន្ទយុត្តិធម៌កម្ពុជា បានអញ្ជើញជាអធិបតីដ៏ខ្ពង់ខ្ពស់ក្នុងពិធីបើកវគ្គបណ្ដុះបណ្ដាលមន្ត្រីជាប់កិច្ចសន្យាបច្ចេកទេស ជំនាញច្បាប់ ជំនាន់ទី២ ===================== បណ្ឌិត្យសភាភូមិន្ទយុត្តិធម៌កម្ពុជា៖ នៅព្រឹកថ្ងៃអង្គារ ១២កើត ខែពិសាខ ឆ្នាំមមី អដ្ឋស័ក ព.ស.២៥៦៩ ត្រូវនឹងថ្ងៃទី២៨ ខែមេសា ឆ្នាំ២០២៦ ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាប្រធានក្រុមប្រឹក្សាភិបាលនៃបណ្ឌិត្យសភាភូមិន្ទយុត្តិធម៌កម្ពុជា បានអញ្ជើញជាអធិបតីដ៏ខ្ពង់ខ្ពស់ក្នុងពិធីបើកវគ្គបណ្ដុះបណ្ដាលមន្ត្រីជាប់កិច្ចសន្យាបច្ចេកទេស ជំនាញច្បាប់ ជំនាន់ទី២ សរុបចំនួន ៣០ រូប (ស្រី ១២) ដែលបានប្រឡងជាប់ជាស្ថាពរកាលពីថ្ងៃទី៦ ខែកុម្ភៈ ឆ្នាំ២០២៦ កន្លងទៅនេះ។ ពិធីនេះមានការអញ្ជើញចូលរួមពីឯកឧត្ដម លោក លោកស្រី ជាថ្នាក់ដឹកនាំ នៃក្រសួងយុត្តិធម៌ និងនៃបណ្ឌិត្យសភាភូមិន្ទយុត្តិធម៌កម្ពុជាផងដែរ។ កម្មវិធីបណ្តុះបណ្តាលនេះត្រូវបានរៀបចំឡើងក្នុងគោលបំណងពង្រឹងសមត្ថភាព និងចំណេះដឹង ក៏ដូចជា តម្រង់ទិសដល់មន្រ្តីជាប់កិច្ចសន្យាបច្ចេកទេស ជំនាញច្បាប់ ជំនាន់ទី២ ទាំង ៣០ រូប ដើម្បីត្រៀមលក្ខណៈទៅបំពេញការងារនៅតាមអង្គភាពនានាចំណុះក្រសួងយុត្តិធម៌ ដោយផ្ដោតការបណ្ដុះបណ្ដាលលើ៖ (១)-អំពីរចនាសម្ព័ន្ធនៃអង្គភាពចំណុះរបស់ក្រសួងយុត្តិធម៌, (២)-អំពីមុខងារ និងក្រមសីលធម៌របស់មន្ត្រី, (៣)-អំពីការងារជំនាញតាមអង្គភាពចំណុះក្រសួងយុត្តិធម៌, (៤)-ការរៀបចំ និងការតាក់តែងលិខិតបទដ្ឋានគតិយុត្ត និង (៥)-ការងារពាក់ព័ន្ធផ្សេងៗទៀត។ កម្មវិធីបណ្តុះបណ្តាលសម្រាប់មន្ត្រីជាប់កិច្ចសន្យាបច្ចេកទេស ជំនាញច្បាប់ ជំនាន់ទី២ នេះ នឹងប្រព្រឹត្តទៅរយៈពេល ១ ខែ នៅបណ្ឌិត្យសភាភូមិន្ទយុត្តិធម៌កម្ពុជា។ ថ្លែងក្នុងពិធីនេះ, ឯកឧត្ដមឧបនាយករដ្ឋមន្ត្រី បានគូសបញ្ជាក់ដល់មន្ត្រីជាប់កិច្ចសន្យាបច្ចេកទេស ជំនាញច្បាប់ ជំនាន់ទី២ ទាំង ៣០ រូប អំពីគោលការណ៍នៃការជ្រើសរើសមន្ត្រី ដែលបានកំណត់យកគោលការណ៍ “គុណាធិបតេយ្យ” គឺ “អ្នកមានសមត្ថភាព ត្រូវបំពាក់សមត្ថកិច្ច ហើយអ្នកមានសមត្ថកិច្ច ត្រូវបំពាក់សមត្ថភាព” ។ ទន្ទឹមនេះ, ឯកឧត្ដមឧបនាយករដ្ឋមន្ត្រី ក៏បានធ្វើការណែនាំថា នេះជាឱកាសមួយ ដែលអនុញ្ញាតឱ្យមន្ត្រីជាប់កិច្ចសន្យាបច្ចេកទេស ជំនាញច្បាប់ ជំនាន់ទី២ ទាំង ៣០ រូប បានបង្ហាញនូវសមត្ថភាពរបស់ខ្លួន និងអាចចូលរួមជាមួយវិស័យយុត្តិធម៌ក្នុងការបម្រើប្រជាពលរដ្ឋបាន៕