柬埔寨旅游部与土耳其大使会晤，深化双边旅游合作

ក្រសួងទេសចរណ៍ និងស្ថានទូតសាធារណរដ្ឋតួកគីយ៉េប្រចាំកម្ពុជា បន្តពង្រឹង និងពង្រីកកិច្ចសហប្រតិបត្តិការទេសចរណ៍ដ៏ល្អ និងប្រកបដោយផ្លែផ្កាឱ្យកាន់តែសកម្ម និងជ្រាលជ្រៅបន្ថែមទៀត ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានអនុញ្ញាតជូនលោកជំទាវ Ülkü Kocaefe ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋតួកគីយ៉េប្រចាំព្រះរាជាណាចក្រកម្ពុជា ចូលជួបសម្ដែងការគួរសម និងជម្រាបលា ក្នុងឱកាសដែលលោកជំទាវបានបញ្ចប់អាណត្តិបេសកកម្មការទូតនៅកម្ពុជា នាទីស្តីការក្រសួង។ ឆ្លៀតក្នុងឱកាសនៃជំនួបនេះ លោកជំទាវឯកអគ្គរដ្ឋទូត បានថ្លែងអំណរគុណយ៉ាងជ្រាលជ្រៅចំពោះកិច្ចសហការគាំទ្រដល់ស្ថានទូតពីសំណាក់រាជរដ្ឋាភិបាលកម្ពុជា និងក្រសួងទេសចរណ៍កន្លងមក ដែលបាននាំមកនូវសមិទ្ធផលសំខាន់ៗ និងគួរជាទីមោទនៈ អាចសម្រេចបានក្នុងអំឡុងអាណត្តិបេសកកម្មការទូតរបស់លោកជំទាវ។ ជាកិច្ចឆ្លើយតប ឯកឧត្តមរដ្ឋមន្ត្រី បានថ្លែងអំណរគុណ និងកោតសរសើរវាយតម្លៃខ្ពស់ចំពោះកិច្ចខិតខំប្រឹងប្រែងដ៏សកម្ម និងពុំចេះនឿយហត់របស់លោកជំទាវ ក្នុងការពង្រឹងពង្រីកព្រូនជ្រុំចំណងការទូត និងកិច្ចសហប្រតិបត្តិការដ៏ល្អ និងប្រកបដោយផ្លែផ្កាខ្ពស់លើគ្រប់វិស័យ ជាពិសេសក្នុងវិស័យទេសចរណ៍រវាងព្រះរាជាណាចក្រកម្ពុជា និងសាធារណរដ្ឋតួកគីយ៉េ។ ទន្ទឹមនឹងនេះដែរ ឯកឧត្តមរដ្ឋមន្ត្រី ក៏បានគូសបញ្ជាក់ថាការតភ្ជាប់ការហោះហើរត្រង់រវាងទីក្រុងអ៊ីស្តាន់ប៊ុល និងរាជធានីភ្នំពេញក្នុងអាណត្តិទូតលោកជំទាវ ពិតជាសមិទ្ធិផលជាប្រវត្តិសាស្ត្រ និងបានចូលរួមយ៉ាងសំខាន់ក្នុងការជំរុញកិច្ចសហប្រតិបត្តិការរវាងប្រទេសទាំងពីរ ទាំងក្នុងវិស័យពាណិជ្ជកម្ម ទេសចរណ៍ វប្បធម៌ ការផ្លាស់ប្តូរប្រជាជន និងប្រជាជន ការដឹកជញ្ជូនអ្នកដំណើរ និងភ្ញៀវទេសចរអន្តរជាតិ ការតភ្ជាប់កម្ពុជាទៅកាន់ច្រកទ្វារពិភពលោក និងការជួយផ្សព្វផ្សាយសក្តានុពលទេសចរណ៍កម្ពុជាដល់ប្រជាជនតួកគី និងពិភពលោកទាំងមូល។ ជាកិច្ចបញ្ចប់ ឯកឧត្តមរដ្ឋមន្ត្រី បានជូនពរលោកជំទាវឯកអគ្គរដ្ឋទូត និងក្រុមគ្រួសារទទួលបានសុខភាពល្អ និងជោគជ័យក្នុងភារកិច្ចការងារបន្តទៀត ព្រមទាំងបានបញ្ជាក់ឡើងវិញអំពីមិត្តភាពយូរអង្វែងរវាងកម្ពុជា និងតួកគី និងការប្តេជ្ញាចិត្តរួមគ្នាបន្តពង្រឹង និងពង្រីកកិច្ចសហប្រតិបត្តិដ៏ល្អ និងផ្លែផ្កានេះ ឱ្យកាន់តែរីកចម្រើន និងជ្រាលជ្រៅបន្ថែមទៀត ដើម្បីជាប្រយោជន៍ដល់ប្រទេស និងប្រជាជននៃប្រទេសទាំងពីរកម្ពុជា និងតួកគីយ៉េ។ សូមបញ្ជាក់ថាព្រះរាជាណាចក្រកម្ពុជា និងសាធារណរដ្ឋតួកគី បានបង្កើតទំនាក់ទំនងការទូតជាមួយគ្នាតាំងពីឆ្នាំ១៩៥៩ ហើយកិច្ចសហប្រតិបត្តិការលើវិស័យទេសចរណ៍ ត្រូវបានពង្រឹង តាមរយៈអនុស្សរណៈនៃការយោគយល់គ្នាស្តីពីកិច្ចសហប្រតិបត្តិការទេសចរណ៍ដែលបានចុះហត្ថលេខាកាលពីឆ្នាំ២០១៨។ ក្នុងឆ្នាំ២០២៥ កន្លងទៅ មានភ្ញៀវទេសចរតួកគីមកទស្សនាកម្ពុជាជិត១១.០០០ នាក់ ហើយក្នុងរយៈពេល៣ខែដើមឆ្នាំ២០២៦ មានចំនួនជិត៤.៧០០នាក់ ពោលបានកើនឡើងជិត១៦% ដែលបង្ហាញពីនិន្នាការកើនឡើងជាបន្តបន្ទាប់ និងជាផ្លែផ្កាជាក់ស្តែងពីវត្តមានជើងហោះហើរត្រង់រវាងទីក្រុងអ៊ីស្តាន់ប៊ុល និងរាជធានីភ្នំពេញ ខេត្តសៀមរាប។​ ទីស្តីការក្រសួងទេសចរណ៍ ថ្ងៃទី៩ ខែមេសា ឆ្នាំ២០២៦។ (កម្មវិធីជំនួបជាមួយដៃគូសហប្រតិបត្តិការអន្តរជាតិលើកទី២៧ ក្នុងឆ្នាំ២០២៦)។