台风摩羯重创越南北部 广宁省电力网络大面积中断

ព្យុះទីហ្វុង ម៉ៃសាក់ កាលពីល្ងាចថ្ងៃសៅរ៍ បានបោកបក់ឡើងគោកជាលើកទីពីរ លើឆ្នេរនៃខេត្តក្វាងនីញ ភាគខាងជើងវៀតណាម បានបង្កការខូចខាតយ៉ាងដំណំ និងរីករាលដាលពាសពេញតំបន់។ ឥទ្ធិពលនៃកម្លាំងខ្យល់ព្យុះដ៏ខ្លាំងនេះ បានបោកបក់ផ្តាច់ដើមឈើ និងរបើកដំបូលផ្ទះសម្បែងរបស់បពលរដ្ឋជាច្រើនខ្នង និងធ្វើឱ្យដាច់ចរន្តអគ្គិសនី និងប្រព័ន្ធអ៊ីនធឺណិតទ្រង់ទ្រាយធំ។ ព្យុះទីហ្វុងនាំមកនូវរបបទឹកភ្លៀងយ៉ាងគំហុក ដោយកម្រិតទឹកភ្លៀងនៅតំបន់ខ្លះបានហក់ឡើងហួស ៣៥០ មីលីម៉ែត្រ បង្កជាហានិភ័យខ្ពស់នៃការកើតមានគ្រោះទឹកជំនន់ និងបាក់ដីនៅតាមបណ្តាខេត្តភាគខាងជើងជាច្រើន។ តាមការព្យាករណ៍ពីអាជ្ញាធរឧតុនិយមវៀតណាម គ្រោះទឹកភ្លៀងធ្លាក់ជោកជាំបង្កឡើងដោយខ្យល់ព្យុះនេះ ត្រូវបានរំពឹងថានឹងបន្តអូសបន្លាយពេលជាច្រើនថ្ងៃខាងមុខ។ ជាការឆ្លើយតប រដ្ឋាភិបាលវៀតណាមបានជម្លៀសពលរដ្ឋចេញពីតំបន់ឆ្នេរ និងតំបន់ភ្នំដែលប្រឈមគ្រោះថ្នាក់។ នាពេលនេះ ក្រុមការងារសង្គ្រោះកំពុងញាប់ដៃញាប់ជើងធ្វើការជួសជុលស្តារប្រព័ន្ធអគ្គិសនី និងសេវាអ៊ីនធឺណិតឡើងវិញនៅក្នុងតំបន់ប៉ះពាល់។ រាល់ទូក និងនាវាទាំងអស់នៅតំបន់ឆ្នេរភាគខាងជើង ត្រូវបានបញ្ជាឱ្យចូលចតនៅកំពង់ផែបន្ទាន់ ហើយអាជ្ញាធរបានអំពាវនាវដល់ពលរដ្ឋ ជៀសវាងការធ្វើដំណើរចេញក្រៅផ្ទះបើមិនមានការចាំបាច់៕