文化部举办传统服饰培训 旨在提升民族文化认同

**ក្រសួងវប្បធម៌ រៀបចំបណ្តុះបណ្តាលពី «ការស្លៀកពាក់ប្រពៃណីខ្មែរ» ដើម្បីលើកកម្ពស់តម្លៃវប្បធម៌ និងកាត់បន្ថយភាពអវិជ្ជមានក្នុងសង្គម** **ភ្នំពេញ៖** ក្រសួងវប្បធម៌ និងវិចិត្រសិល្បៈ បានរៀបចំ **វគ្គបណ្តុះបណ្តាលស្តីពី «សម្លៀកបំពាក់ប្រពៃណីខ្មែរនៅក្នុងពិធីបុណ្យជាតិ ពិធីមង្គលការ សុជីវធម៌ ក្នុងការប្រាស្រ័យទាក់ទងគ្នាក្នុងសង្គម»** ក្នុងគោលបំណងលើកកម្ពស់ ការពារ និងថែរក្សាសិល្បៈ វប្បធម៌ និងទំនៀមទម្លាប់ប្រពៃណីដ៏ល្អផូរផង់របស់ជាតិ។ កម្មវិធីនេះ មានការអញ្ជើញចូលរួមពីសំណាក់តំណាងសមាគមពិធីករ ពិធីការិនីកម្ពុជា, តំណាងមន្ទីរវប្បធម៌ និងវិចិត្រសិល្បៈទាំង ២៥ រាជធានី-ខេត្ត, ផលិតករ, សិល្បករ សិល្បការិនី, មន្ត្រីជំនាញ និងអង្គការដៃគូនានា។ វគ្គបណ្តុះបណ្តាលនេះ នឹងត្រូវរៀបចំឡើងនៅ ទីស្តីការក្រសួងវប្បធម៌ និងវិចិត្រសិល្បៈ នៅ ថ្ងៃទី១៣ ខែសីហា ឆ្នាំ២០២៦ នេះ។ ការរៀបចំនេះក៏ដើម្បីចូលរួមកាត់បន្ថយរូបភាព ឬសកម្មភាពអវិជ្ជមានពាក់ព័ន្ធនឹងការស្លៀកពាក់ និងការប្រើប្រាស់វប្បធម៌ខុសឆ្គងក្នុងសង្គមនាពេលបច្ចុប្បន្ន ព្រមទាំងបន្តផ្សព្វផ្សាយទម្រង់វប្បធម៌ប្រពៃណីដ៏ត្រឹមត្រូវទៅកាន់ស្រទាប់យុវជន និងសាធារណជនទូទៅផងដែរ។ វគ្គបណ្តុះបណ្តាលនេះ នឹងប្រព្រឹត្តទៅក្រោមអធិបតីភាព **លោកជំទាវ នេត្រ ភូម៉ារី** រដ្ឋលេខាធិការ នៃក្រសួងវប្បធម៌ និងវិចិត្រសិល្បៈ ជាតំណាងដ៏ខ្ពង់ខ្ពស់ **លោកជំទាវបណ្ឌិតសភាចារ្យ ភឿង សកុណា** រដ្ឋមន្ត្រីក្រសួងវប្បធម៌ និងវិចិត្រសិល្បៈ។ កម្មវិធីនេះនឹងប្រព្រឹត្តទៅតាមរយៈការធ្វើបទបង្ហាញ និងការបកស្រាយផ្ទាល់ពីសំណាក់ថ្នាក់ដឹកនាំ និងអ្នកជំនាញរបស់ក្រសួងវប្បធម៌ រួមមាន លោកជំទាវ ឡុងឌី សាន់ណារ៉ា រដ្ឋលេខាធិការ និងឯកឧត្តម ចំរើន វ៉ាន់ថា អនុរដ្ឋលេខាធិការ ដោយផ្តោតលើក្បួនខ្នាតនៃការស្លៀកពាក់ និងសុជីវធម៌ក្នុងពិធីការផ្សេងៗ។ ជាចុងក្រោយក្រសួងវប្បធម៌ និងវិចិត្រសិល្បៈ សង្ឃឹមយ៉ាងមុតមាំថា វគ្គសិក្សានេះនឹងក្លាយជាដើមទុនដ៏សំខាន់សម្រាប់អ្នកចូលរួម ក្នុងការនាំយកចំណេះដឹងត្រឹមត្រូវទៅប្រើប្រាស់ និងផ្សព្វផ្សាយបន្តដើម្បីរួមគ្នារក្សាអត្តសញ្ញាណជាតិឱ្យបានគង់វង្ស និងថ្លៃថ្នូរ៕