柬埔寨劳工部推动AI技术提升就业服务效率

កម្ពុជាពង្រឹងការទាញយកអត្ថប្រយោជន៍ពីបញ្ញាសិប្បនិម្មិត (AI) ក្នុងការធ្វើទំនើបកម្មប្រព័ន្ធព័ត៌មានទីផ្សារការងារនិងការផ្តល់សេវាការងារ (ភ្នំពេញ)៖ លោកជំទាវ សុវណ្ណ វណ្ណារតន៍ រដ្ឋលេខាធិការប្រចាំការ នៃក្រសួងការងារនិងបណ្ដុះបណ្ដាលវិជ្ជាជីវៈ បានចូលរួមអញ្ជើញធ្វើជាវាគ្មិនក្នុងកិច្ចសន្ទនាគោលនយោបាយតំបន់ស្តីពី “ការប្រើប្រាស់បញ្ញាសិប្បនិម្មិត (AI) ដើម្បីកសាងទីផ្សារការងារដែលងាយស្រួលសម្រាប់ការងារនៅអាស៊ាន និងចិន” ក្នុងវគ្គទី៦ ក្រោមប្រធានបទ “ការផ្លាស់ប្តូរសេវាការងារសាធារណៈតាមរយៈបញ្ញាសិប្បនិម្មិត និងបច្ចេកវិទ្យាទំនើប” នាព្រឹកថ្ងៃទី២៧ ខែសីហា ឆ្នាំ២០២៦ តាមប្រព័ន្ធវីដេអូ។ វេទិកានេះមានរយៈពេល ២ថ្ងៃ ត្រូវបានរៀបចំឡើងនៅទីក្រុងបាងកក ប្រទេសថៃ ក្រោមកិច្ចសហការរបស់អង្គការអន្តរជាតិខាងការងារ (ILO) និងក្រសួងធនធានមនុស្សនិងសន្ដិសុខសង្គមនៃសាធារណរដ្ឋប្រជាមានិតចិន។ ថ្លែងក្នុងវេទិកានេះ លោកជំទាវបានគូសបញ្ជាក់ថា ទិន្នន័យទីផ្សារការងារដែលអាចទុកចិត្តបាន គឺជាមូលដ្ឋានគ្រឹះដ៏សំខាន់ក្នុងការប្រើប្រាស់បញ្ញាសិប្បនិម្មិត (AI) ប្រកបដោយប្រសិទ្ធភាព។ ជាកិច្ចខិតខំប្រឹងប្រែងរបស់កម្ពុជា ក្រសួងការងារនិងបណ្ដុះបណ្ដាលវិជ្ជាជីវៈ តាមរយៈទីភ្នាក់ងារជាតិមុខរបរនិងការងារ (NEA) បាននិងកំពុងពង្រឹងប្រព័ន្ធព័ត៌មានទីផ្សារការងារ (LMIS) របស់ខ្លួន និងធ្វើការឆ្ពោះទៅរកការធ្វើសមាហរណកម្មទិន្នន័យការងារ កម្លាំងពលកម្ម ការអប់រំបណ្តុះបណ្តាលបច្ចេកទេស និងវិជ្ជាជីវៈ (TVET) និងសន្តិសុខសង្គមកាន់តែប្រសើរឡើង ដើម្បីផ្តល់នូវមូលដ្ឋានកាន់តែរឹងមាំសម្រាប់ការយល់ដឹងអំពីតម្រូវការកម្លាំងពលកម្ម មុខរបរថ្មីៗ និងភាពមិនស៊ីគ្នានៃជំនាញ។ ទន្ទឹមនឹងនេះ លោកជំទាវក៏បានសង្កត់ធ្ងន់បន្ថែមទៀតអំពីសារៈសំខាន់នៃការពង្រឹងទំនាក់ទំនងរវាងសេវាការងារ និង TVET ដោយមានការគាំទ្របន្ថែមពីបញ្ញាសិប្បនិម្មិត និងបច្ចេកវិទ្យាដើម្បីធានាថាសេវាផ្គូផ្គងការងារ ការណែនាំអាជីព និងការអភិវឌ្ឍជំនាញ មានភាពប្រសើរឡើង និងឆ្លើយតបប្រកបដោយប្រសិទ្ធភាពទៅនឹងតម្រូវការទីផ្សារការងារបច្ចុប្បន្ន និងអនាគត។ គួរបញ្ជាក់ផងដែរថា គោលបំណងនៃកិច្ចសន្ទនាគោលនយោបាយតំបន់នេះដើម្បីជាវេទិកាដល់អ្នកបង្កើតគោលនយោបាយ និងដៃគូសង្គម ចែករំលែកនូវចំណេះដឹង ឧត្តមានុវត្តន៍ និងកិច្ចសហការក្នុងតំបន់អំពីរបៀបដែលអាចទាញយក និងគ្រប់គ្រងបញ្ញាសិប្បនិម្មិត (AI) ដើម្បីគាំទ្រដល់ទីផ្សារការងារ និងដើម្បីកំណត់ដំណោះស្រាយជាក់ស្តែងដែលស្របតាមអាទិភាពអភិវឌ្ឍរួមគ្នារបស់តំបន់៕ #MLVT #HENGSour