商务部部长出席WIPO大会 推动知识产权与经济增长

លោកជំទាវ ចម និម្មល អញ្ជើញចូលរួមពិធីបើកកិច្ចប្រជុំមហាសន្និបាតលើកទី៦៨ របស់អង្គការកម្មសិទ្ធិបញ្ញាពិភពលោក (WIPO) និងគូសបញ្ជាក់ពីតួនាទីកម្មសិទ្ធិបញ្ញាក្នុងការជំរុញប្រព័ន្ធនវានុវត្តន៍ និងកំណើនសេដ្ឋកិច្ចប្រកបដោយចីរភាព ​(ហ្សឺណែវ, ស្វ៊ីស) នាព្រឹកថ្ងៃអង្គារ ទី៧ ខែកក្កដា ឆ្នាំ២០២៦ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម និងជាប្រធានគណៈកម្មាធិការជាតិគ្រប់គ្រងកម្មសិទ្ធិបញ្ញា បានអញ្ជើញចូលរួមក្នុងពិធីបើកកិច្ចប្រជុំមហាសន្និបាតលើកទី៦៨ របស់សមាជិកអង្គការកម្មសិទ្ធិបញ្ញាពិភពលោក (WIPO) ដែលប្រារព្ធឡើងនៅទីស្នាក់ការកណ្តាលនៃអង្គការ WIPO នាទីក្រុងហ្សឺណែវ ប្រទេសស្វ៊ីស ដោយមានការចូលរួមពីរដ្ឋមន្ត្រី និងថ្នាក់ដឹកនាំជាន់ខ្ពស់មកពីបណ្តាប្រទេសជាសមាជិក WIPO ដើម្បីពិភាក្សាអំពីការពង្រឹងប្រព័ន្ធកម្មសិទ្ធិបញ្ញាអន្តរជាតិ ការលើកកម្ពស់ប្រព័ន្ធអេកូឡូស៊ីនវានុវត្តន៍ និងការពង្រីកកិច្ចសហប្រតិបត្តិការអន្តរជាតិ ក្នុងគោលបំណងជំរុញកំណើនសេដ្ឋកិច្ចប្រកបដោយចីរភាព បរិយាបន្ន និងភាពធន់។ ​ក្នុងឱកាសនោះ លោកជំទាវរដ្ឋមន្ត្រី បានសម្តែងនូវការអបអរសាទរចំពោះការទទួលបានការបោះឆ្នោតជ្រើសតាំងរបស់ ឯកឧត្តម Carlos D. Sorreta ជាប្រធានមហាសន្និបាត WIPO លើកទី៦៨ និងការទទួលបានការបោះឆ្នោតជ្រើសតាំងសារជាថ្មីរបស់ ឯកឧត្តម Daren Tang ជាអគ្គនាយក WIPO សម្រាប់អាណត្តិទី២។ ​លោកជំទាវរដ្ឋមន្ត្រី បានគូសបញ្ជាក់ថា ខណៈដែលនវានុវត្តន៍កំពុងជំរុញការផ្លាស់ប្តូរសេដ្ឋកិច្ចពិភពលោកយ៉ាងឆាប់រហ័ស បញ្ហាប្រឈមដ៏សំខាន់គឺការធានាឱ្យបណ្តាប្រទេសទាំងអស់អាចចូលរួមក្នុងប្រព័ន្ធនវានុវត្តន៍ពិភពលោកប្រកបដោយសមធម៌ និងទទួលបានអត្ថប្រយោជន៍ពីការអភិវឌ្ឍសេដ្ឋកិច្ចពឹងផ្អែកលើចំណេះដឹង និងភាពច្នៃប្រឌិត៕ **——————** Connect with AKP: 🌐[Telegram ](https://t.me/TheAKP)🌐[Facebook ](https://www.facebook.com/akp.official/)🌐[Website ](http://akp.gov.kh/)👉[X](https://twitter.com/kampucheapresse) ([Twitte](https://twitter.com/kampucheapresse)[r](https://twitter.com/kampucheapresse)) 🌐[Instagram](https://www.instagram.com/akp_news/) 🌐[TikTok](https://www.tiktok.com/@agencekampucheapresse) 🌐[YouTube](https://www.youtube.com/@agencekampucheapresse/featured) #CambodiaWantsPeace #JusticeForCambodia