洪玛奈宣布启动柬泰海域争端UNCLOS强制调解

សម្តេចធិបតី ហ៊ុន ម៉ាណែត នៅថ្ងៃទី ០២ ខែមិថុនានេះ បានចេញសារវីដេអូដោយបញ្ជាក់យ៉ាងច្បាស់ថា កម្ពុជាបានសម្រេចចិត្តចាប់ផ្តើមដំណើរការដោះស្រាយជម្លោះដែនសមុទ្រជាមួយប្រទេសថៃ តាមរយៈយន្ដការផ្សះផ្សារដោយបង្ខំ ក្រោមអនុសញ្ញាអង្គការសហប្រជាជាតិស្តីពីច្បាប់សមុទ្រ (UNCLOS)ហើយ។ ការប្រកាសរបស់ប្រមុខរាជរដ្ឋាភិបាលកម្ពុជានេះ បានធ្វើឡើង បន្ទាប់ពីប្រទេសថៃ បានសម្រេចលុបចោលដោយឯកតោភាគីនូវអនុស្សរណៈនៃការយោគយល់គ្នា (MoU) ឆ្នាំ២០០១ ដែលជាក្របខណ្ឌទ្វេភាគីព្រមព្រៀងគ្នាតែមួយគត់សម្រាប់ដោះស្រាយបញ្ហាដែនសមុទ្រត្រួតគ្នាក្នុងរយៈពេល ២៥ឆ្នាំមកនេះ។ បើតាមនាយករដ្ឋមន្ត្រីកម្ពុជា ការសម្រេចជ្រើសរើសយកយន្ដ UNCLOS ពាក់ព័ន្ធនឹងការទាមទារដែនសមុទ្រត្រួតគ្នារវាងកម្ពុជា និងថៃ នាពេលនេះ គឺករណីដោះស្រាយទី២ នៅក្នុងប្រវត្តិសាស្ត្រ UNCLOS បន្ទាប់ពីយន្ដការអន្តរជាតិនេះ ត្រូវបានដោះស្រាយដោយជោគជ័យ នៅក្នុងករណីវិវាទរវាងប្រទេស ទីម័រខាងកើត និងអូស្ត្រាលី កាលពីឆ្នាំ ២០១៨។ សម្តេចធិបតី ហ៊ុន ម៉ាណែត បានបង្ហាញនូវក្ដីសង្ឃឹមយ៉ាងមុតមាំថា ដំណើរការនេះ នឹងបង្ហាញជាថ្មីម្ដងទៀតនូវតម្លៃពិតប្រាកដនៃច្បាប់អន្តរជាតិ និងការដោះស្រាយជម្លោះដោយសន្ដិវិធី។