ACMECS旅游部长会议通过2026-2028行动计划 旨在

[English Below] កិច្ចប្រជុំរដ្ឋមន្ត្រីទេសចរណ៍ ACMECS លើកទី៧​ បានអនុម័តលើផែនការសកម្មភាពរួមឆ្នាំ២០២៦-២០២៨ សំដៅបង្កើនភ្ញៀវទេសចរជាតិរវាងប្រទេសសមាជិក និងភ្ញៀវទេសចរអន្តរជាតិពីប្រទេសទី៣ ដោយទទួលបានគោលការណ៍អនុញ្ញាតដ៏ខ្ពង់ខ្ពស់អំពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងក្នុងឱកាសដឹកនាំគណៈប្រតិភូជាន់ខ្ពស់ក្រសួងទេសចរណ៍ និងវិស័យឯកជនចូលរួមពិព័រណ៍ទេសចរណ៍អន្តរជាតិទីក្រុងហូជីមិញលើកទី២០ (ITE-HCMC 2026) ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានអញ្ជើញដឹកនាំគណៈប្រតិភូជាន់ខ្ពស់ក្រសួងទេសចរណ៍ ចូលរួមកិច្ចប្រជុំរដ្ឋមន្ត្រីទេសចរណ៍ ACMECS លើកទី៧ ដោយមានការចូលរួមពីឯកឧត្តម និងលោកជំទាវរដ្ឋមន្រ្តី និងជាតំណាងប្រទេសកម្ពុជា ឡាវ មីយ៉ាន់ម៉ា ថៃ និងវៀតណាម នៅទីក្រុងហូជីមិញ សាធារណរដ្ឋសង្គមនិយមវៀតណាម។ កិច្ចប្រជុំរដ្ឋមន្ត្រីទេសចរណ៍ ACMECS លើកទី៧ នេះ គឺជាកិច្ចប្រជុំថ្នាក់រដ្ឋមន្ត្រីនៃប្រទេសសមាជិក ACMECS ទាំងប្រាំ រួមមាន កម្ពុជា ឡាវ មីយ៉ាន់ម៉ា ថៃ និងវៀតណាម ស្របតាមស្មារតីកិច្ចសហប្រតិបត្តិការសេដ្ឋកិច្ចក្នុងតំបន់ ACMECS ក្នុងគោលបំណងពង្រឹងកិច្ចសហប្រតិបត្តិការទេសចរណ៍រវាងប្រទេសសមាជិក ជំរុញការតភ្ជាប់គោលដៅទេសចរណ៍រួម ព្រមទាំងលើកកម្ពស់ការអភិវឌ្ឍទេសចរណ៍ប្រកបដោយចីរភាព និងភាពប្រកួតប្រជែងរបស់តំបន់ ACMECS។ នៅក្នុងកិច្ចប្រជុំនេះ ភាគីទាំងប្រាំ បានកត់សម្គាល់របាយការណ៍កិច្ចប្រជុំឧត្តមមន្ត្រីទេសចរណ៍ ACMECS លើកទី៧ និងបានអនុម័តផែនការសកម្មភាពរួមស្តីពីកិច្ចសហប្រតិបត្តិការទេសចរណ៍ ACMECS ឆ្នាំ២០២៦-២០២៨ ព្រមទាំងសេចក្តីថ្លែងការណ៍រួមនៃកិច្ចប្រជុំរដ្ឋមន្ត្រីទេសចរណ៍ ACMECS លើកទី៧ ដែលផែនការសកម្មភាពរួមនេះ បានកំណត់វិស័យអាទិភាពសំខាន់ៗ រួមមាន ការអភិវឌ្ឍ និងការតភ្ជាប់ផលិតផលទេសចរណ៍រួម ការផ្សព្វផ្សាយទីផ្សារទេសចរណ៍រួម ការអភិវឌ្ឍធនធានមនុស្សក្នុងវិស័យទេសចរណ៍ ការជំរុញការប្រើប្រាស់បច្ចេកវិទ្យាឌីជីថលក្នុងវិស័យទេសចរណ៍ និងការអភិវឌ្ឍទេសចរណ៍ប្រកបដោយចីរភាព។ តាមរយៈកិច្ចប្រជុំអន្តរជាតិប្រកបដោយផ្លែផ្កានេះ ភាគីទាំងប្រាំ បានឯកភាពបន្តជំរុញការអនុវត្តចក្ខុវិស័យ តាមរយៈការរៀបចំកញ្ចប់ទេសចរណ៍រួម ការពង្រឹងការតភ្ជាប់ការធ្វើដំណើរ និងការដឹកជញ្ជូនរវាងប្រទេសសមាជិក ការផ្សព្វផ្សាយរួមនូវគោលដៅទេសចរណ៍ ACMECS ការពង្រឹងសមត្ថភាពធនធានមនុស្ស និងការជំរុញការចូលរួមរបស់វិស័យឯកជន និងដៃគូអន្តរជាតិ ដើម្បីបង្កើនលំហូរភ្ញៀវទេសចរជាតិ និងពីប្រទេសទី៣ ពង្រឹងកិច្ចសហប្រតិបត្តិការទេសចរណ៍ ពាណិជ្ជកម្ម និងការវិនិយោគ និងនាំមកនូវផលប្រយោជន៍ជាក់ស្តែងរួមសម្រាប់ប្រទេស និងប្រជាជននៃប្រទេសសមាជិក។ កម្មវិធីទី១៣ នៃដំណើរទស្សនកិច្ចការងារនៅទីក្រុងហូជីមិញ សាធារណរដ្ឋសង្គមនិយមវៀតណាម ទីក្រុងហូជីមិញ ថ្ងៃទី២៧ ខែសីហា ឆ្នាំ២០២៦។