卫生部会见东南亚青年船代表 21人含11名女性

ពិធីជួបសំណេះសំណាលជាមួយគណៈប្រតិភូយុវជន នៃក្រសួងអប់រំ យុវជន និងកីឡា និងសមាគមនាវាយុវជនអាស៊ីអាគ្នេយ៍កម្ពុជា។ —— រាជធានីភ្នំពេញ៖ ព្រឹកថ្ងៃសុក្រ ទី៣០ ខែតុលា ឆ្នាំ២០២៦ ឯកឧត្តមសាស្ត្រាចារ្យ កុយ វ៉ាន់នី រដ្ឋលេខាធិការក្រសួងសុខាភិបាល បានទទួលជួបសំណេះសំណាល និងផ្តល់អនុសាសន៍ដល់គណៈប្រតិភូយុវជន នៃក្រសួងអប់រំ យុវជន និងកីឡា និងសមាគមនាវាយុវជនអាស៊ីអាគ្នេយ៍កម្ពុជា នៅទីស្តីការក្រសួងសុខាបាល។ យោងតាមរបាយការណ៍សង្ខេបរបស់ លោក ម៉ិល ផនសីហា ប្រធាននាយកដ្ឋានអប់រំយុវជននិងកុមារ គណៈប្រតិភូយុវជន នៃកម្មវិធីនាវាយុវជនអាស៊ីអាគ្នេយ៍និងជប៉ុន (SSEAYP) លើកទី៥០ នេះ មានសមាសភាពចូលរួមសរុប ២១រូប (ស្រី១១រូប) ដែលក្នុងនោះរួមមានប្រធានប្រតិភូដឹកនាំ ០១រូប និងយុវជនឆ្នើមចំនួន ២០រូប ដែលបានឆ្លងកាត់ការជ្រើសរើសយ៉ាងសម្រិតសម្រាំងពីបណ្តាគ្រឹះស្ថានឧត្តមសិក្សានានា។ ក្នុងបរិយាកាសដ៏ស្និទ្ធស្នាល និងកក់ក្តៅនេះ ឯកឧត្តមសាស្ត្រាចារ្យ បានផ្តល់នូវពុទ្ធិ និងអនុសាសន៍ណែនាំដ៏មានតម្លៃប្រកបដោយអត្ថន័យជ្រាលជ្រៅ ដល់ប្អូនៗយុវជន ដោយបានគូសបញ្ជាក់យ៉ាងយកចិត្តទុកដាក់លើការថែរក្សាសុខភាព ដែលឯកឧត្តមបានចាត់ទុកថាជា “បេសកកម្មជីវិត”។ ឯកឧត្តមសាស្ត្រាចារ្យ បានសង្កត់ធ្ងន់អំពីសារៈសំខាន់នៃការថែទាំសុខភាពទាំងផ្លូវកាយ និងផ្លូវចិត្ត ដោយត្រូវប្រកាន់ខ្ជាប់ជានិច្ចនូវក្តីសង្ឃឹម ការយល់ចិត្តគ្នា ការអត់ឱន ករុណាធម៌ និងក្តីស្រឡាញ់។ ទន្ទឹមនឹងនេះ ឯកឧត្តមសាស្ត្រាចារ្យ ក៏បានផ្តាំផ្ញើប្រកបដោយក្តីមេត្តា ដោយឱ្យយុវជនទាំងអស់យកចិត្តទុកដាក់ខ្ពស់លើការតាមដានសុខភាពផ្ទាល់ខ្លួនជាប្រចាំ ជាមួយវិធានបង្ការចាំបាច់មួយចំនួន ព្រមទាំងត្រូវត្រៀមឱសថសារវន្ត័ជាប់ខ្លួន។ ជាពិសេស ឯកឧត្តមសាស្ត្រាចារ្យ បានលើកទឹកចិត្តយ៉ាងមុតមាំ ឱ្យយុវជនគ្រប់រូបប្រកាន់យកអាកប្បកិរិយាជា “ឯកអគ្គរាជទូត” តំណាងឱ្យព្រះរាជាណាចក្រកម្ពុជា ដោយត្រូវបង្ហាញនូវស្នាមញញឹមចេញពីចិត្តជាប់ជានិច្ច បង្ហាញក្តីស្រលាញ់ មេត្តាករុណា ការយោគយល់ និងទទួលរៀនសូត្រ ចែករំលែកបទពិសោធន៍ ជាមួយគ្រប់បណ្តាប្រទេសដែលនឹងចូលរួមកម្មវិធីដ៏ល្អប្រពៃនេះ។ សូមជម្រាបជូនផងដែរថា គណៈប្រតិភូយុវជនកម្ពុជា នៃកម្មវិធី SSEAYP លើកទី៥០ នេះ នឹងអញ្ជើញធ្វើដំណើរទស្សនកិច្ចទៅកាន់ប្រទេសចំនួន ០៤ រួមមាន ប្រទេសជប៉ុន កម្ពុជា ម៉ាឡេស៊ី និងហ្វីលីពីន ចាប់ពីថ្ងៃទី០៣ ខែមករា ដល់ថ្ងៃទី០៥ ខែកុម្ភៈ ឆ្នាំ២០២៧ ខាងមុខនេះ។ ក្នុងបេសកកម្មដ៏មានសារៈសំខាន់នេះ ប្អូនៗយុវជននឹងចូលរួមផ្លាស់ប្តូរមិត្តភាព វប្បធម៌ និងពិភាក្សាលើប្រធានបទសកលធំៗចំនួន៨ ដូចជា សុខាភិបាលនិងការថែទាំវេជ្ជសាស្ត្រ សង្គមឌីជីថលនិងបញ្ញាសិប្បនិម្មិត ព្រមទាំងបរិស្ថានសកលនិងបម្រែបម្រួលអាកាសធាតុ ជាដើម។ អ្វីដែលជាមោទនភាពបន្ថែមទៀតនោះ គឺព្រះរាជាណាចក្រកម្ពុជាយើង នឹងទទួលធ្វើជាម្ចាស់ផ្ទះទទួលនាវាយុវជនជាលើកទី៣ ដែលនឹងប្រព្រឹត្តទៅចាប់ពីថ្ងៃទី១៤ ដល់ថ្ងៃទី១៦ ខែមករា ឆ្នាំ២០២៧។ **🌐** [Website](https://moh.gov.kh/kh/home) 📱 [Facebook](https://www.facebook.com/MinistryofHealthofCambodia?mibextid=ZbWKwL) 📱 [Telegram](https://t.me/MOHCambodia) 📱 [X (twitter)](https://x.com/MohCambodia) 📱 [Tiktok](https://www.tiktok.com/@mohcambodia) 📱 [YouTube](https://www.youtube.com/@MOHCambodia)