柬澳国防部长在堪培拉会晤 旨在深化防务合作

ប្រមុខការពារជាតិកម្ពុជា-អូស្ត្រាលី ជួបសន្ទនា ដើម្បីបន្តពង្រឹងកិច្ចសហប្រតិបត្តិការការពារជាតិ ដើម្បីសន្តិភាព វិបុលភាពតំបន់ ប្រមុខការពារជាតិកម្ពុជា នាយឧត្ដមសេនីយ៍ ទៀ សីហា ទទួលបានការស្វាគមន៍យ៉ាងកក់ក្តៅពីសំណាក់លោក Richard Marles រដ្ឋមន្ត្រីការពារជាតិអូស្ត្រាលី នៅទីក្រុងកង់បេរ៉ា នាថ្ងៃទី៩ ខែកញ្ញា។ ក្នុងជំនួប នៃដំណើរទស្សនកិច្ចជាប្រវត្តិសាស្ត្រ ឧបនាយករដ្ឋមន្ត្រី ទៀ សីហា វាយតម្លៃខ្ពស់នូវកិច្ចពិភាក្សាប្រកបដោយផ្លែផ្កា និងបន្តពង្រឹងកិច្ចសហប្រតិបត្តិការការពារជាតិជាមួយអូស្ត្រាលី ដើម្បីរួមចំណែកដល់សន្តិសុខ សន្តិភាព និងវិបុលភាពក្នុងតំបន់។ កម្ពុជា-អូស្ត្រាលី ភ្ជាប់ទំនាក់ទំនងការទូតជាមួយគ្នាជាផ្លូវការនៅឆ្នាំ១៩៥២។ នៅឆ្នាំ២០២៧ ទំនាក់ទំនងទ្វេភាគីនេះ នឹងឈានដល់វ័យ៧៥ឆ្នាំ។ ដំណើរទស្សនកិច្ចរបស់រដ្ឋមន្ត្រីការពារជាតិកម្ពុជាទៅកាន់អូស្ត្រាលី ធ្វើឡើងដើម្បីពង្រឹងទំនាក់ទំនងជាមិត្តភាព និងជាប្រវត្តិសាស្ត្រ ពិសេសកិច្ចសហប្រតិបត្តិការយោធាទ្វេភាគី ដែលកំពុងមានការរីកចម្រើនជាលំដាប់។ ការពង្រឹងនេះ ត្រូវបានគេមើលឃើញថា ស្របតាមគោលនយោបាយរដ្ឋាភិបាលទាំងពីរ ដែលឆ្ពោះទៅរកការលើកកម្រិតទំនាក់ទំនងទ្វេភាគីឱ្យដល់កម្រិត «ភាពជាដៃគូគ្រប់ជ្រុងជ្រោយ» ឆាប់ៗខាងមុខ៕