柬埔寨重申反地雷立场 呼吁国际合作排雷

កម្ពុជា ប្រាប់អន្តរជាតិពីផលប៉ះពាល់ធ្ងន់ធ្ងរនៃគ្រាប់បែកចង្កោមដែលបាញ់ដោយយោធាថៃក្នុងឆ្នាំ២០២៥** **បង្កើតតំបន់គ្រោះថ្នាក់ថ្មីជិត** **៤**.**០០០** **គីឡូម៉ែត្រការ៉េ ថ្លែងទៅកាន់ពិភពលោកក្នុងកិច្ចប្រជុំត្រួតពិនិត្យលើកទី៣ នៃអនុសញ្ញាស្តីពីគ្រាប់បែកចង្កោម នៅទីក្រុងវៀងចន្ទន៍ ប្រទេសឡាវ នាថ្ងៃទី១៤ ខែកញ្ញា ឆ្នាំ២០២៦ ឯកឧត្តមបណ្ឌិត លី ធុជ ប្រធានគណៈប្រតិភូកម្ពុជា បានប្រកាសជំហរយ៉ាងរឹងមាំក្នុងការប្រឆាំង និងថ្កោលទោសយ៉ាងដាច់ខាតចំពោះការប្រើប្រាស់គ្រាប់បែកចង្កោម។ ឯកឧត្តមបានគូសបញ្ជាក់ថា កម្ពុជាបានចំណាយពេលជាង ៣៣ឆ្នាំ ក្នុងការបោសសម្អាតមីន និងសំណល់ជាតិផ្ទុះពីសង្គ្រាមអតីតកាល ដោយបានរំដោះផ្ទៃដីជាង ៣.៥០០ គីឡូម៉ែត្រការ៉េ និងកម្ទេចយុទ្ធភណ្ឌគ្រឿងផ្ទុះរាប់លានគ្រាប់ ប៉ុន្តែកម្ពុជាមិនដែលរំពឹងថានឹងត្រូវចាប់ផ្តើមការងារមនុស្សធម៌ដ៏គ្រោះថ្នាក់នេះសារជាថ្មីនោះឡើយ។ ទោះជាយ៉ាងណា ក្នុងឆ្នាំ២០២៥ កន្លងទៅ ក្នុងបរិបទជម្លោះតាមបណ្តោយព្រំដែនកម្ពុជា-ថៃ គ្រាប់បែកចង្កោមត្រូវបានកងកម្លាំងយោធាថៃបាញ់ប្រហារមកលើទឹកដី និងសហគមន៍កម្ពុជា ដែលបានបង្កើតឱ្យមានតំបន់រងផលប៉ះពាល់ថ្មីរហូតដល់ជិត ៤.០០០ គីឡូម៉ែត្រការ៉េ ក្នុងនោះផ្ទៃដីជិត ៣.០០០ គីឡូម៉ែត្រការ៉េ រងការគំរាមកំហែងដោយសារគ្រាប់បែកចង្កោមដោយផ្ទាល់។ ការវាយប្រហារនេះបានបណ្តាលឱ្យប្រជាពលរដ្ឋស៊ីវិល ជាពិសេសកសិករ រងគ្រោះថ្នាក់ដល់ជីវិត និងរបួស ព្រមទាំងបង្ខំឱ្យប្រជាពលរដ្ឋជាង ២០០០០នាក់ ត្រូវផ្លាស់ទីលំនៅ និងមិនទាន់អាចវិលត្រឡប់ទៅកាន់ផ្ទះសម្បែង និងដីធ្លីកសិកម្មរបស់ខ្លួនវិញបាននៅឡើយ។ ឯកឧត្តមទេសរដ្ឋមន្ត្រី លី ធុជ បានសង្កត់ធ្ងន់ថា កម្ពុជាមិនទាន់បានបញ្ចប់ការបោសសម្អាតមរតកសង្គ្រាមពីអតីតកាលអស់ផង បែរជាត្រូវរ៉ាប់រងបន្ទុកមនុស្សធម៌ថ្មីបន្ថែមទៀត ដែលការណ៍នេះកាន់តែបង្កើនតម្រូវការធនធាន និងកិច្ចខិតខំប្រឹងប្រែងដើម្បីធានាសុវត្ថិភាពជូនប្រជាពលរដ្ឋ។ ជាមួយគ្នានេះ ឯកឧត្តមបានបញ្ជាក់ឡើងវិញថា ទោះបីជាកម្ពុជាមិនជារដ្ឋភាគីនៃអនុសញ្ញាស្តីពីគ្រាប់បែកចង្កោម ប៉ុន្តែកម្ពុជាគាំទ្រពេញទំហឹងចំពោះគោលបំណងនៃអនុសញ្ញានេះ ដោយមិនដែលផលិត ឬប្រើប្រាស់អាវុធនេះឡើយ ព្រមទាំងប្រកាសត្រៀមខ្លួនរួចជាស្រេចក្នុងការចែករំលែកបទពិសោធន៍បោសសម្អាត និងការជួយសង្គ្រោះជនរងគ្រោះជាមួយបណ្តាប្រទេសនៅលើពិភពលោក ដើម្បីរួមចំណែកកាត់បន្ថយការឈឺចាប់ពីយុទ្ធភណ្ឌគ្រឿងផ្ទុះទាំងនេះ៕