洪玛奈重申柬埔寨领土主权立场 坚持外交途径解决

សម្ដេច ហ៊ុន ម៉ាណែត បានគូសបញ្ជាក់ថា កម្ពុជាមិនទទួលស្គាល់ការប្រើប្រាស់កម្លាំងប្រដាប់អាវុធដើម្បីកាន់កាប់ទឹកដីឡើយ ហើយនឹងបន្តប្រើប្រាស់យន្តការការទូត និងច្បាប់អន្តរជាតិ ដើម្បីទាមទារទឹកដីដែលកម្ពុជាចាត់ទុកថា ត្រូវបានភាគីថៃកាន់កាប់បណ្ដោះអាសន្ន ឱ្យត្រឡប់មកវិញ។ លោកបានរំលឹកពីប្រវត្តិនៃការកាន់កាប់ទឹកដីខេត្តបាត់ដំបងដោយសៀម និងការគ្រប់គ្រងក្រោមទាហានជប៉ុន ដោយបញ្ជាក់ថា ការដោះស្រាយបញ្ហាក្នុងអតីតកាលបានពឹងផ្អែកលើច្បាប់អន្តរជាតិ និងសម្ពាធការទូត។ សម្ដេចបានបញ្ជាក់ថា ការការពារទឹកដីជាកាតព្វកិច្ចរបស់កម្ពុជា ហើយប្រជាជននិងវីរយុទ្ធជនបានលះបង់ជីវិតនៅគ្រប់សមរភូមិ ដើម្បីការពារបូរណភាពទឹកដី។ ទោះជាកម្ពុជាមានការសោកស្ដាយចំពោះការបាត់បង់ការគ្រប់គ្រងតំបន់មួយចំនួនក្នុងការប៉ះទង្គិចនាពេលថ្មីៗនេះក៏ដោយ ក៏កម្ពុជាមិនទទួលស្គាល់ការផ្លាស់ប្ដូរស្ថានភាពទាំងនេះតាមរយៈការប្រើកម្លាំងឡើយ។ សម្ដេចធិបតីបានសង្កត់ធ្ងន់ថា កម្ពុជានៅតែបន្តតស៊ូតាមផ្លូវការទូត ដោយប្រើប្រាស់លិខិតបទដ្ឋានគតិយុត្ត និងច្បាប់អន្តរជាតិ ដើម្បីស្វែងរកដំណោះស្រាយ និងទាមទារទឹកដីត្រឡប់មកវិញ។ សម្ដេចក៏បានបង្ហាញក្ដីសង្ឃឹមថា ស្ថានការណ៍នឹងវិលត្រឡប់ទៅរកប្រក្រតីភាព ដើម្បីឱ្យប្រជាជនភៀសសឹកកម្ពុជាជាង ២ម៉ឺននាក់ អាចវិលត្រឡប់ទៅកាន់លំនៅឋានវិញ។ សូមជម្រាបថា ក្រោយបទឈប់បាញ់ថ្ងៃទី២៧ ធ្នូ ២០២៥ កម្ពុជាបានចោទប្រកាន់ថា កងកម្លាំងថៃបានបន្តកាន់កាប់ និងធ្វើសកម្មភាពនៅតាមទីតាំងមួយចំនួនក្នុងទឹកដីកម្ពុជា។ ទីតាំងទាំងនោះរួមមាន តំបន់បឹងត្រកួន តំបន់អូរទឹកចោល ក្នុងខេត្តឧត្តរមានជ័យ ភូមិជោគជ័យ ក្នុងខេត្តបន្ទាយមានជ័យ និងតំបន់ថ្មដា ក្នុងខេត្តពោធិ៍សាត់។ សកម្មភាពនៅតំបន់ទាំងនេះរួមមាន ការឈូសឆាយដី សាងសង់ផ្លូវនិងសំណង់បេតុង ការវាស់វែងនិងបែងចែកដី ព្រមទាំងការដាក់ទូកុងតឺន័រ រាយបន្លាលួស និងលើកទង់ជាតិថៃ។ [**Join AMS One-minute**](https://t.me/ams1minute)