柬埔寨社保基金局高层官员吉·普纳里不幸逝世

ឯកឧត្តម ម៉េង ហុង សម្ដែងក្ដីសោកស្ដាយ និងចូលរួមរំលែកទុក្ខចំពោះការចាកចេញរបស់ លោក គាត ពុធណារិទ្ធិ សហការីរួមអាជីពដ៏ឆ្នើមក្នុងវិស័យសន្តិសុខសង្គម ---------------------- (ភ្នំពេញ)៖ នារសៀលថ្ងៃទី២៦ ខែតុលា ឆ្នាំ២០២៦នេះ ឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្ដុះបណ្ដាលវិជ្ជាជីវៈ ព្រមទាំងថ្នាក់ដឹកនាំ បានអញ្ជើញគោរពវិញ្ញាណក្ខន្ធ និងចូលរួមរំលែកទុក្ខយ៉ាងក្រៀមក្រំជាមួយក្រុមគ្រួសារសព ចំពោះការបាត់បង់ លោក គាត ពុធណារិទ្ធិ ប្រធាននាយកដ្ឋានគ្រប់គ្រងការវិនិយោគមូលនិធិសន្តិសុខសង្គម នៃ ប.ស.ស. ដែលជាសហការី និងជាមិត្តរួមអាជីពដ៏ឆ្នើមវ័យក្មេងមួយរូប។ ក្នុងសេចក្ដីរំលែកទុក្ខដ៏សោកសង្រេងនេះ ឯកឧត្តមប្រតិភូរាជរដ្ឋាភិបាល បានសម្ដែងនូវសមានទុក្ខដ៏ជ្រាលជ្រៅបំផុត ព្រមទាំងក្ដីសង្វេគ និងសេចក្ដីអាឡោះអាល័យជាទីបំផុត ដោយចាត់ទុកការបាត់បង់ លោក គាត ពុធណារិទ្ធិ គឺជាការបាត់បង់នូវមិត្តរួមអាជីពដ៏មានសមត្ថភាព និងជាថ្នាក់ដឹកនាំដ៏ស្មោះស្ម័គ្រមួយរូប ដែលបានខិតខំប្រឹងប្រែងបំពេញភារកិច្ច បម្រើការងារជូនស្ថាប័ន ប.ស.ស. ដោយស្មារតីទទួលខុសត្រូវខ្ពស់នាពេលកន្លងមក។ ការបាត់បង់ លោក គាត ពុធណារិទ្ធិ មិនត្រឹមតែជាការបាត់បង់មិត្តរួមអាជីពក្នុងវិស័យសន្តិសុខសង្គមប៉ុណ្ណោះទេ ប៉ុន្តែជាការបាត់បង់ដ៏ធំធេងនូវកូនដ៏ល្អ ស្វាមីដ៏ល្អ និងឪពុកពោរពេញដោយព្រហ្មវិហារធម៌ ដែលកន្លងមកលោកបានបន្សល់ទុកនូវស្នាដៃ ព្រមទាំងស្នាមញញឹមនៅក្នុងបេះដូងពួកយើងគ្រប់ៗគ្នា។ តាងនាមថ្នាក់ដឹកនាំ មន្ត្រី និងបុគ្គលិក នៃ ប.ស.ស. ទាំងអស់ យើងខ្ញុំសូមឧទ្ទិសបួងសួង សូមឱ្យដួងវិញ្ញាណក្ខន្ធ លោក គាត ពុធណារិទ្ធិ បានទៅសោយសុខក្នុងសុគតិភព និងសូមចែករំលែកនូវមរណទុក្ខដ៏ធំធេង និងសែនសោកសង្រេងនេះ ជូនចំពោះក្រុមគ្រួសារនៃសពផងដែរ៕