肺科医师协会第七届年会金边召开 卫生部出席

ពិធីបើកសន្និសីទប្រចាំឆ្នាំ លើកទី៧ របស់សមាគមគ្រូពេទ្យសួតកម្ពុជា។ — រាជធានីភ្នំពេញ៖ ព្រឹកថ្ងៃទី៣១ ខែតុលា ឆ្នាំ២០២៦ ឯកឧត្តមសាស្ត្រាចារ្យ កុយ វ៉ាន់នី រដ្ឋលេខាធិការក្រសួងសុខាភិបាល បានអញ្ជើញជាអធិបតីក្នុងពិធីបើក «សន្និសីទប្រចាំឆ្នាំលើកទី៧ របស់សមាគមគ្រូពេទ្យសួតកម្ពុជា» ដែលបានប្រព្រឹត្តទៅនៅសណ្ឋាគារភ្នំពេញ រាជធានីភ្នំពេញ។ ក្នុងឱកាសនេះ ឯកឧត្តមសាស្ត្រាចារ្យបានសម្តែងនូវការអបអរសាទរ និងវាយតម្លៃខ្ពស់ចំពោះសមាគមគ្រូពេទ្យសួតកម្ពុជា ដែលបានខិតខំប្រឹងប្រែង និងបន្តរួមចំណែកយ៉ាងសកម្មក្នុងការអភិវឌ្ឍវិស័យឯកទេស ជំងឺផ្លូវដង្ហើម តាមរយៈការបណ្តុះបណ្តាល ការស្រាវជ្រាវ ការផ្លាស់ប្តូរចំណេះដឹង និងបទពិសោធន៍ ព្រមទាំងការពង្រឹងកិច្ចសហប្រតិបត្តិការជាតិ និងអន្តរជាតិ។ ឯកឧត្តមសាស្ត្រាចារ្យ បានគូសបញ្ជាក់ថា វិស័យឯកទេសជំងឺសួត និងផ្លូវដង្ហើម គឺជាផ្នែកដ៏សំខាន់មួយនៃប្រព័ន្ធសុខាភិបាល ដោយសារជំងឺទាំងនេះ អាចបង្កផលប៉ះពាល់យ៉ាងធ្ងន់ធ្ងរដល់សុខភាព សមត្ថភាពការងារ ជីវភាពរស់នៅ និងគុណភាពជីវិតរបស់ប្រជាពលរដ្ឋ។ ហេតុដូច្នេះ ការពង្រឹងសមត្ថភាពអ្នកជំនាញ និងការអភិវឌ្ឍសេវាពិនិត្យ ព្យាបាល និងថែទាំអ្នកជំងឺប្រកបដោយគុណភាព គឺជាកត្តាចាំបាច់ក្នុងការឆ្លើយតបទៅនឹងតម្រូវការសុខភាពរបស់ប្រជាជន។ ពាក់ព័ន្ធនឹងប្រធានបទសំខាន់នៃសន្និសីទ គឺ «វឌ្ឍនភាពនៃការគ្រប់គ្រង និងព្យាបាលជំងឺផ្លូវដង្ហើម និងជំងឺមហារីក» ឯកឧត្តមសាស្ត្រាចារ្យបានលើកឡើងថា ការរីកចម្រើនក្នុងវិស័យវេជ្ជសាស្ត្រ មិនមែនពឹងផ្អែកតែលើបច្ចេកវិទ្យា និងឧបករណ៍ទំនើបប៉ុណ្ណោះទេ ប៉ុន្តែត្រូវការការអភិវឌ្ឍវិធីសាស្ត្រធ្វើរោគវិនិច្ឆ័យ និងព្យាបាលថ្មីៗ ការអនុវត្តវេជ្ជសាស្ត្រផ្អែកលើភស្តុតាងវិទ្យាសាស្ត្រ (Evidence-Based Medicine) ព្រមទាំងកិច្ចសហការរវាងអ្នកជំនាញពហុឯកទេស (Multidisciplinary Collaboration) ដើម្បីធានាបាននូវគុណភាព សុវត្ថិភាព ប្រសិទ្ធភាព និងមនុស្សធម៌ក្នុងការថែទាំអ្នកជំងឺ។ ជាមួយគ្នានេះ ឯកឧត្តមសាស្ត្រាចារ្យបានលើកទឹកចិត្តឱ្យសន្និសីទវិទ្យាសាស្ត្រនេះ ក្លាយជាវេទិកាដ៏មានសារៈសំខាន់សម្រាប់ការពិភាក្សា ការផ្លាស់ប្តូរបទពិសោធន៍ ការចែករំលែកលទ្ធផលស្រាវជ្រាវ និងការផ្សព្វផ្សាយនូវចំណេះដឹងថ្មីៗ ដែលអាចយកទៅអនុវត្តជាក់ស្តែង ដើម្បីលើកកម្ពស់ប្រសិទ្ធភាព នៃការធ្វើរោគវិនិច្ឆ័យ ការព្យាបាល និងការថែទាំអ្នកជំងឺឱ្យកាន់តែប្រសើរឡើង។ ទន្ទឹមនឹងនេះ ឯកឧត្តមសាស្ត្រាចារ្យក៏បានផ្តាំផ្ញើដល់គ្រូពេទ្យឯកទេសវ័យក្មេង វេជ្ជបណ្ឌិតដែលកំពុងបន្តការសិក្សា និងអ្នកស្រាវជ្រាវទាំងអស់ ឱ្យបន្តខិតខំអភិវឌ្ឍចំណេះដឹង និងជំនាញវិជ្ជាជីវៈ តាមរយៈការសិក្សាស្រាវជ្រាវ ការអនុវត្តជាក់ស្តែង និងការរៀនសូត្រជាបន្តបន្ទាប់ ព្រមទាំងប្រកាន់ខ្ជាប់នូវក្រមសីលធម៌វិជ្ជាជីវៈ និងការទទួលខុសត្រូវខ្ពស់ចំពោះអ្នកជំងឺ។ បន្ថែមពីនេះ ការអភិវឌ្ឍវិស័យឯកទេសជំងឺសួត និងផ្លូវដង្ហើម ទាមទារឱ្យមានកិច្ចសហការយ៉ាងជិតស្និទ្ធ រវាងសមាគមវិជ្ជាជីវៈ ស្ថាប័នបណ្តុះបណ្តាល មន្ទីរពេទ្យ អ្នកជំនាញ និងដៃគូជាតិ និងអន្តរជាតិ ដើម្បីពង្រឹងគុណភាពនៃការបណ្តុះបណ្តាល ការស្រាវជ្រាវ និងការផ្តល់សេវាសុខាភិបាលឱ្យកាន់តែមានប្រសិទ្ធភាព និងចីរភាព។ ជាទីបញ្ចប់ ឯកឧត្តមសាស្ត្រាចារ្យបានអំពាវនាវដល់សមាជិកសមាគម និងអ្នកប្រកបវិជ្ជាជីវៈសុខាភិបាលទាំងអស់ ឱ្យបន្តសាមគ្គីភាព និងកិច្ចសហការក្នុងការលើកកម្ពស់ចំណេះដឹង ជំនាញ សីលធម៌វិជ្ជាជីវៈ គុណភាព និងសុវត្ថិភាពអ្នកជំងឺ ដើម្បីរួមចំណែកដល់ការអភិវឌ្ឍវិស័យសុខាភិបាល និងការលើកកម្ពស់សុខុមាលភាព និងគុណភាពជីវិតរបស់ប្រជាពលរដ្ឋកម្ពុជា។ គួរបញ្ជាក់ផងដែរថា សន្និសីទប្រចាំឆ្នាំលើកទី៧ របស់សមាគមគ្រូពេទ្យសួតកម្ពុជា បានប្រព្រឹត្តទៅដោយមានការចូលរួមពីវាគ្មិនដែលមានបទពិសោធន៍ និងជំនាញខ្ពស់ ព្រមទាំងសាស្ត្រាចារ្យ វេជ្ជបណ្ឌិត អ្នកជំនាញ និងអ្នកចូលរួមសរុបប្រមាណ ១៩៣នាក់ ដើម្បីរួមគ្នាផ្លាស់ប្តូរចំណេះដឹង និងបទពិសោធន៍ ព្រមទាំងចែករំលែកនូវវឌ្ឍនភាពថ្មីៗក្នុងការគ្រប់គ្រង និងព្យាបាលជំងឺផ្លូវដង្ហើម និងជំងឺមហារីក។ **🌐**[Website](https://moh.gov.kh/kh/home) 📱[Facebook](https://www.facebook.com/MinistryofHealthofCambodia?mibextid=ZbWKwL) 📱[Telegram](https://t.me/MOHCambodia) 📱[X (twitter)](https://x.com/MohCambodia) 📱[Tiktok](https://www.tiktok.com/@mohcambodia) 📱[YouTube](https://www.youtube.com/@MOHCambodia)