洪玛尼赴特本克蒙母校座谈 1040名师生到场

ពិធីសំណេះសំណាលជាមួយគណៈគ្រប់គ្រង លោកគ្រូ​ អ្នកគ្រូ​ និងសិស្សានុសិស្ស បានប្រពឹត្តទៅ​ក្រោមអធិបតីភាព​ដ៏ខ្ពង់ខ្ពស់ ឯកឧត្តម​ ហ៊ុន​ ម៉ានី ឧបនាយករដ្ឋមន្រ្តីរដ្ឋមន្រ្តីក្រសួងមុខងារសាធារណៈ និងជាប្រធានសហភាពសហព័ន្ធយុវជនកម្ពុជា​ តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ និងសម្តេចកិត្តិព្រឹទ្ធបណ្ឌិត ប៊ុន​ រ៉ា​នី​ នាព្រឹកថ្ងៃទី ០១ ខែវិច្ឆិកា ឆ្នាំ ២០២៦ នៅវិទ្យាល័យ​ ប៊ុន​ រ៉ានី​ ហ៊ុនសែន មេមត់ ខេត្តត្បូងឃ្មុំ។ កម្មវិធីនេះមានការអញ្ជើញចូលរួមពីសំណាក់ឯកឧត្តម ប៉ែន​ កុសល្យ អភិបាលនៃគណៈអភិបាលខេត្តត្បូងឃ្មុំ គណៈគ្រប់គ្រង លោកគ្រូ​ អ្នកគ្រូ​ និងសិស្សានុសិស្ស​ចំនួន​ ១០៤០ នាក់ ។ ជាកិច្ចចាប់ផ្តើមនៃកម្មវិធី លោក សាន អឿង នាយកវិទ្យាល័យ ប៊ុន រ៉ានី​ ហ៊ុនសែន មេមត់ បានធ្វើរបាយការណ៍ និងសម្តែងគារវកិច្ចស្វាគមន៍យ៉ាងកក់ក្តៅ​​ជូនចំពោះគណៈអធិបតី។ លោកបានបន្តទៀតថា វត្តមានដ៏ឧត្តុង្គឧត្តមរបស់ឯកឧត្តម​ ហ៊ុន​ ម៉ានី​ នាឱកាសនេះ មិនត្រឹមតែបានផ្តល់កិត្តិយសដ៏ធំធែងក្នុងអង្គពិធីទាំងមូលប៉ុណ្ណោះទេ ប៉ុន្តែថែមទាំងបានស្តែងចេញនូវសក្ខីភាពដ៏មោះមុត បញ្ជាក់ពីការយកចិត្តទុកដាក់ចំពោះវិស័យអប់រំ​ យុវជន​ និងកីឡា​ ជាពិសេសការយកចិត្តទុកដាក់ចំពោះគណៈគ្រប់គ្រង លោកគ្រូ​ អ្នកគ្រូ​ និងសិស្សានុសិស្ស​នៃ​វិទ្យាល័យ​ ប៊ុន រ៉ា​នី​ ហ៊ុនសែន មេមត់ ទាំងមូលផងដែរ ។ ជាកិច្ចបន្ទាប់ ឯកឧត្តម ប៉ែន​ កុសល្យ អភិបាលនៃគណៈអភិបាលខេត្តត្បូងឃ្មុំ​ បានសម្តែងនូវ​ការគោរព និងថ្លែងអំណរគុណយ៉ាងជ្រាលជ្រៅចំពោះវត្តមាន ឯកឧត្តម ហ៊ុន​ ម៉ានី ដែលតែងតែយកចិត្តទុកដាក់ចំពោះវិស័យអប់រំ ការអភិវឌ្ឍយុវជន និងការកសាងធនធានមនុស្ស ដែលជាកត្តាគន្លឹះសម្រាប់ការអភិវឌ្ឍសង្គមជាតិ។ ឆ្លៀតក្នុងឱកាសនេះឯកឧត្តមក៏បានសម្តែងការកោតសរសើរ និងថ្លែងអំណរគុណចំពោះគណៈគ្រប់គ្រងសាលា និងលោកគ្រូ អ្នកគ្រូ ដែលបានលះបង់កម្លាំងកាយចិត្ត ប្រាជ្ញាស្មារតី និងពេលវេលា ក្នុងបុព្វហេតុបណ្តុះបណ្តាលធនធានមនុស្ស ៕