柬埔寨体育法草案启动跨部门讨论 旨在规范体育产业发展

ឯកឧត្តម ឡុង គឹមឃន រដ្ឋលេខាធិការ ក្រសួងយុត្តិធម៌ បានអញ្ជើញចូលរួម " កិច្ចប្រជុំពិភាក្សាលើសេចក្ដីព្រាងច្បាប់ស្ដីពីអប់រំកាយ និងកីឡា ​" ==================== រាជធានីភ្នំពេញ៖ កាលពីព្រឹក ថ្ងៃពុធ ៩ រោច ខែបឋមាសាឍ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី០៨ ខែកក្កដា ឆ្នាំ២០២៦ ឯកឧត្តម ឡុង គឹមឃន រដ្ឋលេខាធិការ ក្រសួងយុត្តិធម៌  បានអញ្ជើញចូលរួម " កិច្ចប្រជុំពិភាក្សាលើសេចក្ដីព្រាងច្បាប់ស្ដីពីអប់រំកាយ និងកីឡា ​" ដែលបានប្រព្រឹត្តទៅនៅសាល​ប្រជុំនៃមជ្ឈមណ្ឌលជាតិហ្វឹកហ្វឺនកីឡា (ស្ថិតក្នុងពហុកីឡដ្ឋានជាតិអូឡាំពិក) រាជធានីភ្នំពេញ​ ក្រោមការដឹកនាំដោយ ឯកឧត្ដម វ៉ាត់ ចំរើន រដ្ឋលេខាធិការ ក្រសួងអប់រំ យុវជន និងកីឡា។ កិច្ចប្រជុំនេះ មានការអញ្ជើញចូលរួមពីសំណាក់ ឯកឧត្តម លោកជំទាវ លោក លោកស្រី ជាថ្នាក់ដឹកនាំ ទីប្រឹក្សា ក្រុមការងារ តំណាងមកពី​ ក្រសួង-ស្ថាប័ន និងអង្គភាពពាក់ព័ន្ធផ្សេងៗ ដែលមាន អគ្គនាយកដ្ឋានកីឡា នៃក្រសួងអប់រំយុវជន និងកីឡា ក្រសួងយុត្តិធម៌ ក្រសួងសេដ្ឋកិច្ច និងហិរញ្ញវត្ថុ ព្រមទាំងអង្គភាពប្រឆាំងអំពើពុករលួយ​ ផងដែរ។ កិច្ចប្រជុំនេះ ត្រូវបានរៀបចំឡើងក្នុងគោលបំណងពិភាក្សា ផ្លាស់ប្តូរមតិយោបល់ពីក្រសួង-ស្ថាប័ន និងអង្គភាពពាក់ព័ន្ធ ទៅលើគោលការណ៍ទូទៅ ព្រមទាំងការផ្តល់នូវធាតុចូលសំខាន់ៗ លើខ្លឹមសារនៃសេចក្តីព្រាងច្បាប់នេះ ក្នុងទិសដៅធ្វើយ៉ាងណាឱ្យសេចក្តីព្រាងច្បាប់នេះមានលក្ខណៈគ្រប់ជ្រុងជ្រោយ ស្របតាមបរិបទគតិយុត្តជាតិ និងអន្តរជាតិ ព្រមទាំងធានាបាននូវប្រសិទ្ធភាពខ្ពស់ក្នុងការអនុវត្តនាពេលខាងមុខ។​​ សេចក្តីព្រាងច្បាប់នេះ នឹងក្លាយជាឧបករណ៍គតិយុត្តដ៏សំខាន់មួយ ក្នុងការគ្រប់គ្រង លើកកម្ពស់ និងអភិវឌ្ឍវិស័យកីឡាជាតិ ឱ្យកាន់តែមានភាពរីកចម្រើនប្រកបដោយនិរន្តរភាព ឆ្លើយតបទៅនឹងបរិបទរបស់សង្គមជាតិ ព្រមទាំងស្តង់ដារតំបន់ និងអន្តរជាតិ។