柬埔寨卫生部参与CLMV区域合作 强化基层非传染性疾病服务

សិក្ខាសាលាថ្នាក់តំបន់ស្តីពី ការផ្ទៀងផ្ទាត់របកគំហើញ អនុសាសន៍ និងផែនទីបង្ហាញផ្លូវអភិវឌ្ឍសមត្ថភាព សម្រាប់ពង្រឹងសេវាជំងឺមិនឆ្លង (NCDs) ក្នុងការថែទាំសុខភាពបឋម (PHC) នៅប្រទេសកម្ពុជា ឡាវ មីយ៉ាន់ម៉ា និងវៀតណាម (CLMV)។ — ខេត្តហ្លួងព្រះបាង សាធារណរដ្ឋប្រជាធិបតេយ្យប្រជាមានិតឡាវ៖ ចាប់ពីថ្ងៃទី១២ ដល់ថ្ងៃទី១៣ ខែសីហា ឆ្នាំ២០២៦ ឯកឧត្តមសាស្ត្រាចារ្យ សុខ ជួរ អគ្គនាយករងបច្ចេកទេសសុខាភិបាល បានដឹកនាំក្រុមការងារសុខាភិបាលកម្ពុជា ចូលរួមសិក្ខាសាលាថ្នាក់តំបន់ស្តីពី ការផ្ទៀងផ្ទាត់របកគំហើញ អនុសាសន៍ និងផែនទីបង្ហាញផ្លូវអភិវឌ្ឍសមត្ថភាព សម្រាប់ពង្រឹងសេវាជំងឺមិនឆ្លង (NCDs) ក្នុងការថែទាំសុខភាពបឋម (PHC) នៅប្រទេសកម្ពុជា ឡាវ មីយ៉ាន់ម៉ា និងវៀតណាម (CLMV)។ សិក្ខាសាលានេះត្រូវបានរៀបចំក្រោមការគាំទ្រ របស់មូលនិធិកិច្ចសហប្រតិបត្តិការអាស៊ាន-ចិន (ASEAN-China Cooperation Fund)។ សិក្ខាសាលានេះផ្តោតលើការផ្ទៀងផ្ទាត់ លទ្ធផលវាយតម្លៃស្ថានភាពសេវា NCD កំណត់គម្លាតនៃការអនុវត្ត និងអាទិភាពសម្រាប់ពង្រឹងសមត្ថភាពនៅកម្រិតថែទាំសុខភាពបឋម។ ការពិភាក្សាបានសង្កត់ធ្ងន់លើការប្រែក្លាយ គោលនយោបាយ និងគោលការណ៍ណែនាំដែលមានស្រាប់ ទៅជាការអនុវត្តជាក់ស្តែងប្រកបដោយគុណភាព។ ភាគីកម្ពុជាបានចែករំលែកវឌ្ឍនភាព បទពិសោធន៍ និងបញ្ហាប្រឈមក្នុងការផ្តល់សេវា NCD។ ការវាយតម្លៃបង្ហាញថា កម្ពុជាមានមូលដ្ឋានគោលនយោបាយ ផែនការយុទ្ធសាស្ត្ររឹងមាំ និងមានវឌ្ឍនភាពល្អក្នុងការពិនិត្យស្វែងរកជំងឺលើសសម្ពាធឈាម និងទឹកនោមផ្អែម ខណៈការព្យាបាល និងថែទាំអ្នកជំងឺរយៈពេលវែង នៅកម្រិតមណ្ឌលសុខភាព ត្រូវការពង្រឹងបន្ថែម។ សិក្ខាសាលានេះបានផ្តល់ឱកាសដ៏សំខាន់សម្រាប់ប្រទេសកម្ពុជា ឡាវ មីយ៉ាន់ម៉ា និងវៀតណាម ក្នុងការចែករំលែកបទពិសោធន៍ និងរួមគ្នាកំណត់ទិសដៅជាក់ស្តែង ដើម្បីបន្តពង្រឹងសេវាជំងឺមិនឆ្លងនៅកម្រិតថែទាំសុខភាពបឋម ឱ្យកាន់តែមានប្រសិទ្ធភាព គុណភាព និងឆ្លើយតបនឹងតម្រូវការរបស់ប្រជាពលរដ្ឋ នៅក្នុងប្រទេសតំបន់ (CLMV)។ **🌐**[Website](https://moh.gov.kh/kh/home) 📱[Facebook](https://www.facebook.com/MinistryofHealthofCambodia?mibextid=ZbWKwL) 📱[Telegram](https://t.me/MOHCambodia) 📱[X (twitter)](https://x.com/MohCambodia) 📱[Tiktok](https://www.tiktok.com/@mohcambodia) 📱[YouTube](https://www.youtube.com/@MOHCambodia)