柬埔寨环境部报告称，今年4月至6月期间，在豆蔻山脉的豆蔻山野

ដំរីព្រៃ ខ្លាឃ្មុំ និងសត្វកម្រ ៨ប្រភេទទៀត បង្ហាញវត្តមានច្រើននៅតំបន់ជួរភ្នំក្រវាញ ភ្នំពេញ៖ នៅរវាងខែមេសា ដល់មិថុនាឆ្នាំនេះ សត្វព្រៃកម្រ ជិតផុតពូជ ចំនួន១០ប្រភេទ បានបង្ហាញវត្តមានច្រើននៅក្នុងដែនជម្រកសត្វព្រៃភ្នំសំកុស ភូមិសាស្ត្រខេត្តពោធិ៍សាត់ បាត់ដំបង និងកោះកុង។ វត្តមានរបស់ពួកវា ត្រូវបានថតជាប់ដោយកាមេរ៉ាស្វ័យប្រវត្តិ និងមន្ត្រីបរិស្ថាន។ បើតាមក្រសួងបរិស្ថាន សត្វទាំងនោះរួមមាន ដំរីអាស៊ី, ខ្ទីង, ប្រើសស្បូវ, កែះ, ខ្លាឃ្មុំតូច, ខ្លាឃ្មុំធំ, ឆ្កែព្រៃ, ជ្រូកពោន (ឬជ្រូកព្រុល), សំពោចកលឿង និងស្វាត្រោស រួមទាំងប្រភេទថនិកសត្វ និងបក្សីមួយចំនួនទៀតដែរ។ លោក ខ្វៃ អាទិត្យា អនុរដ្ឋលេខាធិការ និងជាអ្នកនាំពាក្យក្រសួងបរិស្ថាន បានកត់សម្គាល់ថា បច្ចុប្បន្ន សត្វព្រៃ និងជីវៈចម្រុះនៅតំបន់ជួរភ្នំក្រវាញ បានបង្ហាញវត្តមានកាន់តែច្រើនឡើង គួរឱ្យកត់សម្គាល់។ ចំពោះការថតបានរូបភាពសត្វព្រៃកម្រៗនេះ អ្នកនាំពាក្យរូបនេះ ចាត់ទុកថា គឺជាសញ្ញាល្អនៃកិច្ចខិតខំប្រឹងប្រែង លើការងារអភិរក្សធនធានធម្មជាតិរបស់កម្ពុជា៕